Misé 1 - Kazambale lé Sebe Sauunu 1979

Bale bon‐ɛn Izraɛl valé Juda nya

¹ Gakelebale we fe Morésɛtzan Misé lɛ, Juda munu nwiinzannu Jotam koo, Akaz koo, Ézékia koo, wozé bléyi va. É balelawe fe Samari valé Jérusalɛm ma.

² ’Kaa munu faa, ’ka tɔné dɔ. Tɛrɛ valé é tafɛnu, ’ka we ’ma ma. Mizan Gakelebale ’é kɛlɛ ka ma wefezan nya ma, Mizan lé ke élé fuakɔn ’lɛzan gi, yee lé.

³ Ka yua, Gakelebale si é nyanana, É a zunna, é a tawona tɛrɛ ta loru.

⁴ Gɔnu ’yi a bona a wuo, ’Té gɔ woronanu lɛ éé soo a wuo, Bélé kyɛ éé wele ’yiboo fɛan zo, a zo, Bélé ’yi éé yoroan gɔ zunna fɛan zo, a zo.

⁵ We ’konu faa bɔ Jakɔb lé wenyané blɛnnu lé we ma; Izraɛlnu lé wenyanénu ma lé é bɔ. Jakɔb lé wenyané blɛn a mɛ fɛ nyaa? Samari kaan loo? Juda munu lé gɔ nwiin yobannanu a kyɛɛn? Jérusalɛm kaan loo?

⁶ Maa dan Samari kɛlɛ lɛ gɔlɛ zun nya bwi gi; é dan kɛlɛ lɛ dɔrɔféi pana nya. Maa dan alé kɔndɔgɔlɛnu vuli lɛ gɔ worona; maa dan alé kɔn ganenu ma bɔra lɛ.

⁷ Maa dan alé miyili nyaalenu faa yéli lɛ; maa dan wolé tɔnɔyémafɛ naanénu faa kyɛ ble lɛ, maa dan wolé miyilinu faa sɛrɛ lɛ; wo wo ye gɔné ginile nya, yé wo dan kɛlɛ lɛ gɔnéginifɛ nya.

⁸ Bɛwemalé an dan wuvɔ lɛ, yé an dan gyɛ la lɛrɛ vɔ lɛ. Maa dan tawo lɛ an porole, ’té sawala ’ka an gane ma lo. Maa dan siaa lɛ bélé blén zo, maa dan we lɛ bélé miané lé duo zo.

⁹ Wo manɔn a tɔntɔn, ’bɛzama. Éé goo fɔɔ Juda tɛrɛ la; éé goo fɔɔ anlé munu lé flagɔrɔ ’léé, fɔɔ yé é bɔ Jérusalɛm.

¹⁰ Té bé zuo fe Gat lo; té ka wuvɔ Ako lo. An burulan vun va Bɛt‐Léafra.

¹¹ Saafiizan, ’i gié é porole ’té yara i gya. É ’ka dɔa Saananzan gi lé é bɔra béera lo. Bɛt‐Aésɛl munu a gyɛbona, amalé wo ’ka bɔa i va lo.

¹² Di kini Marɔtzan gi, dé é ’ka dan vo lɛ drɔɔ loo? Naa, we tɔntɔn si Gakelebale va, yé é da fɔɔ Jérusalɛm flagɔrɔ ’léé.

¹³ Lakiszan, ’i wisoonu dɔ ilé gulidangoro ’lɛ. Bii lé we ma lé wenyané vɔ Siɔn munu lee. Wenyané blɛn faa lé Izraɛlnu a kɛlɛ, wa bii ɛ va.

¹⁴ Bɛwemalé é a lé i sɔn vɔ Morésɛt‐Gat ma; Azib munu wo dan dabli kɛlɛ lɛ Izraɛl nwiinzannu lɛ.

¹⁵ Marésa munu, maa dan mi dɛrɛ kɛlɛ lɛ kazan nya; Izraɛl lé mi blɛnnu wo dan vɔ lɛ fli gi yé wo go fɔɔ Adulam.

¹⁶ ’I puo ma gun bo, ’i nwin puiɛ ilé né wezannu lé we ma. ’Ibo kɛlɛ palogyɛzan nya bélé gyɛn zo; ilé nénu é dan go lɛ luu gi tɛrɛ baa la, ’bɛzama.