Matio 9 - Kazambale lé Sebe Sauunu 1979

Jézu furuagyɛzan béli

¹ Jézu vɔ ’yitagoro gi yé é wɛyi kini yé é go élé fla.

² Yé munu da furuagyɛzan nya a va é yiale yialafɛ ta. Jézu a ye aan wo léé, wo bli a ’é lɛ, yé é lé furuagyɛzan lɛ léé: Anlé né, ’i bli ta dɔ plɛplɛ. Maa i ma we vo ilé wenyanénu ma.

³ Sɛbɛgifemi kenu lé wo bli gi léé: Mi ’ko Kazambale sɔnɔ.

⁴ Jézu wolé gi bɔrɔlenu dɔɔ, yé é léé: Mɛmalé gi bɔrɔle naané ’ko ke ka bli gii?

⁵ Dé maa fe a lɛ léé, maa i ma we vo ilé wenyanénu ma, ’bɛ a do; dé maa fe a lɛ léé, ’i nwa, ’i tawo, ’bɛ a do, ’naan, a kyɛzan ɛ ke we blɛn nya é mini é bɔluzan taa?

⁶ É sɔ an lɛ léé, ka a gi dɔɔ léé, a se a maa blami Be lɛ léé, an mi ma we vo tɛrɛ la, amalé é lé furuagyɛzan lɛ léé, ’i nwa, ’ilé yialafɛ sia, yé ’i go ilé kɔn ’léé.

⁷ É nwa, yé é go élé kɔn ’léé.

⁸ Naa, mi gu ’bɛ ye aan wo, kana zén wo gi, yé Bale lé é se ’ko kɛlɛ munu lɛ, wa tɔ zin bɔ.

Jézu Matio laa

⁹ Jézu si ’bɛna yé é a giéna, yé é mi do ye vagɔɔli sina, wa laama Matio. É lé a lɛ léma: ’I da an zuo. Yé Matio nwa, yé é go a zuo.

¹⁰ Jézu a fɛ blena aan wo kɔn gi, vagɔɔlisizannu kiɛre valé wenyanékɛlɛmunu nyana fɛblele zi, Jézu valé é zuomunu va.

¹¹ Farizimunu a ye aan wo yé wo lé a zuomunu lɛ léé: Mɛmalé kazan éé fɛ blé vagɔɔlisizannu valé wenyanékɛlɛmunu vaa?

¹² Jézu ’bɛ ’ma aan wo yé é léé: Munu lé wo ke plɛplɛ, wo mawe ’ka dɔtrɔ gi lo, naa, gyɛgyɛmunu ɛ mawe ke dɔtrɔ gi.

¹³ ’Ka go, yé ’ka gi bɔrɔ we ’ko ma, dé a gi lé nɔɔ? Nyanai zénle ɛ sɔa an lɛ, yé saraka bole ’ka sɔa an lɛ lo. An ’ka da lɛ mi tegelenu laa lɛ lo; an da wenyanékɛlɛmunu ɛ laa lɛ.

Wo lɔrɔsɔnle lé we laa Jézu lee

¹⁴ Jan zuomunu da Jézu va yé wo léé: Mɛmalé ko valé Farizimunu éé lɔrɔ sɔn‐o ’naan, yé i zuomunu ’ka lɔrɔ sɔn‐o loo?

¹⁵ Jézu lé wo lɛ léé: Dé ledɛrɛsizan a é béénu va, wo bli kyɛ éé dɔa kaa? Bléyi do é dan bɔ lɛ yé wo dan ledɛrɛsizan si lɛ wo va; ’bɛ bléyi nya lé wo dan lɔrɔ sɔn lɛ.

¹⁶ Wo ’ka sɔ kuruné dɛrɛ paan sɔ kwa buruna lo; dé wa kɛlɛ, sɔ kwa éé fiaan yé a buruna é kɛlɛ blɛn.

¹⁷ Yé é ziin, wo ’ka dɔrɔ dɛrɛ zén‐é wikɔlɛkuo kwanu gi lo; dé wa kɛlɛ, kuonu éé faama yé dɔrɔ éé zanaan, yé wikɔlɛkuonu éé sɛra. Naa, é a lé wo dɔrɔ dɛrɛ zén wikɔlɛkuo dɛrɛnu gi, yé dɔrɔ valé kuonu ’ka sɛra lo.

Minwiinzan lu valé le lé é mane Jézu lé varɔ ma

¹⁸ É a dére ’konu fena aan wo wo lɛ, bazorokɔn nwiinzan do da, yé é dia é bli la Jézu ’lɛ, yé é léé: An lu lɛ bo, naa, ’i da i bɛnu pla a ta yé é dan vuo lɛ.

¹⁹ Jézu nwa, yé yee valé é zuomunu go a zuo.

²⁰ Yé bé ye, lezan do lé, é vɔ lomu va lɛɛ vu ta fié, ’té é ’ka sié a ma lo, é bié Jézu ma a zuozia yé é bɛ mane alé sɔ lɔlu ma.

²¹ É lé é bli gi léé: Dé an bɔ an bɛ manele lɛ alé varɔ ma é pla, an dan béli lɛ.

²² Jézu nɔla yé é a ye yé é léé: An lu, ’i bli ta dɔ plɛplɛ. Ilé blipale ma lé i béli. Yé lezan ’ko béli a bléyi duo nya.

²³ Jézu bɔ aan wo bazorokɔn nwiinzan lé kɔn ’léé, é séénfɛnzannu valé siaamunu kiɛre ye,

²⁴ yé é lé wo lɛ léé: ’Ka si ana mi, blɛnné ’ka é gale lo, naa, é a yigyɛna. Yé wa ma we nana.

²⁵ Dé wo munu bin faa, Jézu wɔra yé é kun blɛnné bɛ ma, yé blɛnné nwa.

²⁶ Wo go we ’ko zuo fele nya fɛfaana.

Yuɛwiimunu fié yuɛ fuo

²⁷ Jézu si aan wo ’bɛna, yuɛwiimunu fié go a zuo siaale nya léé: David be, ’i nyanai zén ko ta.

²⁸ É bɔ aan wo kɔn ’léé, yuɛwiimunu bié a sɔnɔ, yé Jézu lé wo lɛ léé: É a ka bli gi léé, an bɔa we ’ko kɛlɛle lɛɛ? Yé wo lé a lɛ léé: Iin, Mizan.

²⁹ Yé é bɛ mane wo yuɛnu ma, yé é léé: É a ka bli gi fɛan zo, ’é kɛlɛ ka lɛ a zo ma.

³⁰ Yé wo yuɛnu fuo. Jézu we fe wo lɛ yara tɔntɔn nya yé é léé: ’Ka yuɛ pa kabozen va, té mi do kpen é we ’ko ’ma lo.

³¹ Naa, é si wo va tɔɔn, wa tɔ zin bɔ tɛrɛ ’ko faa la.

Bobogyɛzan we fe

³² Wa gona aan wo, bobogyɛzan lé yo ke a gi, munu da a nya Jézu va.

³³ É yo si aan wo a gi yé bobogyɛzan we fe. Mi gu gi vuru yé wo léé, ’wo ’ka tan we ’ko zoɛ vinin ye lɛ Izraɛl tɛrɛ la monomono lo.

³⁴ Naa, Farizimunu léma: Yonufaatagɔné lé plɛplɛ nya lé éé yonu sié munu gi.

Jézu nyanai zén munu ta

³⁵ Jézu gié fla kuru ’léénu valé flanénu faa ta, we paale nya munu gi bazorokɔnnu gi, ’té éé Kazambale plale mi nwiin lé Wenéné fé, ’té éé gyɛamamunu faa valé mayaamunu faa bélié.

³⁶ Jézu mi gu ye aan wo a nyanai zén wo ta; wo fuu ’ka wo ta lo, yé wa tɔɔtɔɔ bélé ’blanu lé wo tabinzan ’ka lo, wo zo.

³⁷ Yé é lé é zuomunu lɛ léé: ’Sa tana kiɛre yé a gyɛmunu ’ka di lo.

³⁸ Amalé ’ka zanté vɔ ’sazan lɛ léé, ’é nyanamapazannu pa zia, yé ’wo alé ’sa gyɛ.