Matio 8 - Kazambale lé Sebe Sauunu 1979

Jézu pantɛn si mi do ma

¹ Jézu zun aan wo gɔ blɛn nwiin, mi gu blɛn da a zuo.

² Yé bé ye, pantɛngyɛzan do da a va yé é dia é bli la a ’lɛ, yé é léé: Mizan, dé é sɔ i lɛ, i bɔalɛ léé, i pantɛn si an ma.

³ Jézu é bɛ soi yé é bɛ mane a ma yé é léé: É sɔ an lɛ; ’é si i ma. Tɔɔn, yé alé pantɛn si a ma.

⁴ Yé Jézu lé a lɛ léé: Té bé fe mi do kpen lɛ lo, naa, ’i go ibo nagɔɔn Balebanzan lɛ, yé balebanfɛ lé Moizi a nɔle béli dɔ, bé banwo yé ’é kɛlɛ munu lɛ i bélile tɔmase nya.

Jézu sunyayɔsoru ’lɛzan wuozan béli

⁵ Jézu bɔra Kapɛnaum bléyian va, sunyayɔsoru ’lɛzan da a va yé é we laa a lee dunu vɔ ma dére nya léé:

⁶ Mizan, an wuozan a é yiale kɔn gi; gyɛ ’wii a ta yé é vo furua nya, yé é a nyané blena é baba.

⁷ Jézu lé a lɛ léé: Maa dan go lɛ yé maa a béli.

⁸ Sunyayɔsoru ’lɛzan lé a lɛ léé: Mizan, gba, a yara ’ka an yara léé, i wɔra anlé kɔn gi lo. ’I dére do fe é pla, yé an wuozan é dan béli lɛ.

⁹ Naa, maa a é plale an nwiinzannu wuo, yé sunyanu a an wuo é ziin. Dé maa a fe a do lɛ léé: ’I go, éé goo. Yé dé maa a fe a koɛ lɛ léé: ’I da, éé dan. Yé dé maa a fe an wuozan lɛ léé: ’I we ’ko kɛlɛ, éé a kɛla.

¹⁰ Jézu a ’ma aan wo, a gi vuru yé munu lé wo ke a zuo, é lé wo lɛ léé: Maa ’ka a ye lɛ léé, Izraɛl mi do kpen bli a é pale tegele bélé mi ’ko zo lo, maa fe ka lɛ.

¹¹ Naa, maa lé ka lɛ léé, munu kiɛre é dan si lɛ yirinwana valé yirivɔnazia, yé wo dan fɛ ble lɛ Abraam koo, Izak koo, Jakɔb koo, wo va, Kazambale lé fla.

¹² Naa, alé munu lé é a kɔɔn léé, ’bɛnu é wɔra, wo dan ’bɛnu vuli lɛ gunutinu va béera, fɛana lé wuvɔle valé suiɛ la blele ke, ana.

¹³ ’Bɛ zuo, Jézu lé sunyayɔsoru ’lɛzan lɛ léé: ’I go, yé bɛan zo lé i bli ke a lɛ, ’é kɛlɛ i lɛ a zo ma. Yé ’bɛ bléyi duo nya lé a wuozan béli.

Jézu Piɛri na bu béli

¹⁴ ’Bɛ zuo, Jézu wɔra Piɛri lé kɔn gi, yé é a na bu ye é yiale é kɔlɛ gi kyɛ dɔle nya.

¹⁵ Jézu é bɛ mane a bɛ ma, yé a kɔlɛ gi kyɛdɔle si. Yé é nwa yé é fɛ nɔ a lɛ.

Jézu munu kiɛre béli é nyanadi

¹⁶ É nyanadi, munu da yoagizannu kiɛre nya Jézu va. É yonu si wo gi é dére nya, yé é gyɛgyɛmunu faa béli,

¹⁷ we lé balelayezan Ézai a fe, a lɛsɔɔle we gi. É léé: É ko mayaalenu si, yé é ko gyɛgyɛnu kɛlɛ ’ébo nwiin kɔné nya.

Munu lé é sɔ wo lɛ léé, wo go Jézu zuo

¹⁸ Jézu a ye aan wo léé, mi gu blɛn ’é zi lɛ sɔɔ, é lé é zuomunu lɛ léé: Kaa wɛyi kini.

¹⁹ Yé sɛbɛgifezan do bié yé é lé a lɛ léé: Anzan, dé i go fɛofɛana, ’maa goo i zuo.

²⁰ Jézu a zi vɔ a lɛ léé: Kwanénu yɛrɛ a, yé mianénu kɔn a, naa maa blami Be yiɛna ’ka lo.

²¹ A zuomunu va mi do léé: Anzan, ’i zi nɔ an lɛ yé an go an ti pa é vinin faa ’lɛ.

²² Naa, Jézu a zi vɔ ’bɛ lɛ léé: ’I da an zuo; ’i mi galenu vo yé ’wo wozé mi galenu pa.

Jézu fu dɔ

²³ É vɔ ’yitagoro gi, yé a zuomunu vɔ a va.

²⁴ Yé fu blɛn kun giéle ma wɛyi la, yé wɛyi nwa loru ’té éé zén‐é ’yitagoro gi. ’Té Jézu a yigyɛna.

²⁵ A zuomunu go a vuo lɛ yé wo léé: Mizan, ’i bɔ ko va, ga lé ko wo ’ko.

²⁶ Yé é lé wo lɛ léé: Bli pa Bale lɛ kiénézannu, mɛmalé ka a kananaa? Yé é nwa, yé é siaa fu valé wɛyi ta yé fɛ faa vɔ drɔɔ.

²⁷ Munu ’ko gi vuru yé wo léé: Mi kaa lé ke ’ko, yé funu valé wɛyi boen yé wa lɛdɔamaa?

Jézu yoagizannu béli Gadaré tɛrɛ la

²⁸ Wo bɔ aan wo ’yi gɔɔn bɛ ma, Gadaré munu lé tɛrɛ la, mi fié lé yonu ke wo gi, wo si mi vunnu méléna, yé woo valé Jézunu kee. Wa lɛrɛlɛrɛ bɛ nyané nyané wo, amalé é ’ka dɔa mi do kpen gi léé, ’é gié ’bɛna lo.

²⁹ Yé wo kun siaale ma léé: Bale be, mɛmalé i we kolé we maa? I da ’ko nyané pa lɛ ko ta a bléyi ’lɛɛ?

³⁰ Suru palu blɛn do a fɛ blena é sile wo ma baa mi.

³¹ Yé yonu zanté vɔ Jézu lɛ yé wo léé: Dé i ko si munu ’konu gi, ’i ko pa zia surunu va mun, yé ko wɔra wo gi.

³² Yé é lé wo lɛ léé: ’Ka go. Yé wo si gɔnézannu gi yé wo go wɔra lɛ surunu gi. I yua, suru palu faa gɔ nyé zunle wééé zun za ma yé wo zén wɛyi va, yé wo zamaga wo ’yi va.

³³ Wo tabinmunu ’wii vlan nya, yé wo go fla yé we faa lé é bɔ wo ma mi, ’é valé we lé é kɛlɛ yoagizannu lɛ, wa zuo fe flamunu lɛ.

³⁴ Yé flamunu faa si fla yé wo go Jézu vazia. Wolé Jézu yele tɔɔn, wo zanté vɔ a lɛ léé, ’é si ’wolé tɛrɛ la.