Matio 7 - Kazambale lé Sebe Sauunu 1979

Mi bɛnu ma weblele

¹ Té i mi bɛ ma we ble monomono lo, té wo i ma we ble lo we gi.

² Bɛan zo lé i mi bɛ ma we blé, a bɛ duo gi lé wo dan i ma we ble lɛ. I fɛ no mi lɛ fɛan zo, a zo lé wo dan izé nɔ lɛ.

³ Mɛmalé lɔɔ gɔ do lé é ke i bwe yuɛ va, i ’bɛ yé ’naan, yé yilifee blɛn lé é ke ibo yuɛ va, i ’ka ’bɛ yé loo?

⁴ Bii lé, yilifee blɛn ke i yuɛ va, é kɛlɛ kaa ’naan, yé i lé i bwe lɛ léé: ’I an vo yé an lɔɔ gɔ do si i yuɛ vaa?

⁵ Bodrɔzan, ’i yuɛ va yilifee blɛn si faa ’lɛ, yé i fɛna ye wéiin yé i lɔɔ gɔ do si i bwe yuɛ va.

’I fɛ laa, ’i fɛ gini, ’i duoli gyɛ

⁶ Té ka fɛ sauunnu nɔ blénnu lɛ lo, dé wo da nɔla yé wo ka wi kini ékema; yé té ka fɛwezannu zana surunu wuo lo, dé wo da a zɔn wo gane nya.

⁷ ’Ka fɛ laa, yé wo dan a nɔ lɛ ka lɛ; ’ka fɛ gini, yé ka dan a ye lɛ; ’ka duoli gyɛ yé wo dan kɔn lɛ so lɛ ka lɛ.

⁸ Naa, dé miomian éé fɛ laan, woo fɛ no a lɛ; mian éé fɛ ginian, éé fɛ yé; yé woo kɔn lɛ soo mian éé duoli gya, a lɛ.

⁹ Ka va mi kyɛn lé, dé a be buru laa a lee, yé é gɔlɛ nɔ a lɛɛ?

¹⁰ Yé dé ’bɛ pɔ laa a lee, yé é méné nɔ ’bɛ lɛɛ?

¹¹ Naa, ka‐an, ka ke é naané, dé ka fɛ zin nɔle gi dɔɔ kalé nénu lɛ, ka Ti lé é ke la gi, é ’ka dan fɛ zinnu nɔ lɛ munu lé wa laan a lee, wo lɛ loo?

¹² We faa lé é sɔ ka lɛ léé, munu a kɛlɛ ka lɛ, yee duo lé ’ka kɛlɛ wo lɛ ma, naa, yee ɛ ke bélidɔwe valé balelayemunu dére nya.

Zi ’léé kiéné

¹³ ’Ka wɔra zi ’léé kiénéna. Zi lé éé goo mi sanlenu gona, a ’léé a blɛn yé a laala a é gyɛle, yé mi kiɛre éé wɔraan yee ɛ na.

¹⁴ Naa, zi lé éé goo mi bélina, a ’léé a kiéné yé a laala a prɔɔné yé mi kiɛre ’ka a yé lo.

Woo yili dɔɔan é poro ma

¹⁵ ’Ka yuɛ pa kabo va viébalelayemunu lé we ma. Woo dan ka va bélé ’blanu zo, naa, wo bli a wo gi bélé lɔrɔgyɛ glau zo.

¹⁶ Ka dan wo dɔɔ lɛ wo kɛlɛwe ma. Woo dɔrɔporo soo léliyili maa? Woo bɔrɔyiliporo soo goligyɛné maa?

¹⁷ Yili zima faa éé poro zima baan, yé yili lɛrɛlɛrɛ éé poro lɛrɛlɛrɛ baan.

¹⁸ Yili zima ’ka bɔa é poro naané baale lɛ lo, yé yili naané ’ka bɔa é poro zima baale lɛ lo.

¹⁹ Yili faa lé wo ’ka ’wo poro zima baan lo, woo wo bɔié yé woo wo vulian kyɛ va.

²⁰ Amalé ka dan viébalelayemunu dɔɔ lɛ wo kɛlɛwe ma.

Maa ’ka ka dɔɔ lɛ monomono lo

²¹ Munu lé wa fé an lɛ léé: Anzan, anzan, Kazambale ’ka dan pla lɛ wo faa nwiin lo, naa, an Ti lé é ke la gi, mi lé éé alé blibɔmawe kɛla, Kazambale a é plale ’bɛzan do kpen ɛ nwiin.

²² Mi kiɛre é dan a fe lɛ an lɛ ’bɛ yi la léé: Anzan, anzan, ko ’ka balelawe fe lɛ i tɔ nya loo? Ko ’ka yonu si lɛ munu gi i tɔ nya loo? Ko ’ka gyɛzorowe kiɛre kɛlɛ lɛ i tɔ nya loo?

²³ Naa, an dan a fe lɛ wo lɛ kpaklaa léé: Maa ’ka ka dɔɔ lɛ monomono lo. Ka lé ka weple kɛla, ’ka si an ma.

Kɔn fié dɔle lé we

²⁴ Bɛwemalé, dére ’konu lé maa a fé, dé mian éé a maan, yé azan a tawenu kɛla, éé kɛla bélé gikinizan lé é ’élé kɔn dɔ gɔlɛ ta, a zo.

²⁵ Lɛɛ da, yé ’yi fan; fu gié plɛplɛ yé é zén kɔn ’ko ma. É a é dɔle gɔlɛ ta, bɛwemalé é ’ka zana lɛ monomono lo.

²⁶ Naa, dére ’konu lé maa a fé, dé miomian éé a maan, yé azan ’ka a tawenu kɛla lo, éé kɛla bélé tavozan lé é ’élé kɔn dɔ nyéné ta, a zo.

²⁷ Lɛɛ da, yé ’yi fan; fu gié plɛplɛ yé é zén kɔn ’ko ma, yé é zana, yé é sɛrɛ tata.

Se lé ke Jézu lɛ

²⁸ Jézu nyaa we ’konu fele nya aan wo, mi gu gi vuru alé we paale ma.

²⁹ Éé we paan wo gi bélé mian a se ke a lɛ, a zo. É ’ka a paana wo gi bélé wolé sɛbɛgifemunu zé zo lo.