Matio 6 - Kazambale lé Sebe Sauunu 1979

We lé Jézu a fe fɛ nɔle nyanégyɛmunu lɛ lé we ma

¹ ’Ka yuɛ pa kabozen va, té ka kalé Bale zuo tawowenu kɛlɛ munu yuɛ va, wolé ka naginile we gi lo; dé ’bɛ kaan lo, ka ’ka dan ka gooli ye lɛ ka Ti lé é ke la gi, a va lo.

² Dé i a fɛ nɔna nyanégyɛmunu lɛ, té bé pa i lɔlu ma béli nya lo, bélé bodrɔzannu a kɛla fɛan zo, a zo lo. Woo fɛ no bazorokɔnnu gi, yé woo fɛ no vuun la, munu lé wo tɔ zin bɔle we gi. Té ka kɛlɛ wo zo lo. Maa lé ka lɛ webozen nya léé, wo ’wozé ma gooli ye.

³ Naa, dé i a fɛ nɔna nyanégyɛmunu lɛ, té i bɛbola bɛ i bɛyila bɛ lé fɛ nɔle gi dɔɔ lo.

⁴ ’I fɛ nɔ kyeen gi yé i Ti lé éé kyeengiwe yé, é dan i gooli pa lɛ.

We lé Jézu a fe bazorole ma

⁵ Dé ka a bazorona, té ka we kɛlɛ bélé bodrɔzannu zo lo. É sɔ wo lɛ léé, munu ’wo nagini, amalé woo dɔa loru, ’té woo bazoroan bazorokɔnnu gi, ’té woo bazoroan flaworo dii zi blannu ta. Maa lé ka lɛ webozen nya léé, wo ’wozé gooli ye.

⁶ Naa, dé i a bazorona, ’i wɔra ilé kɔnmi zi, bé lɛ tan, yé ’i bazoro i Ti lé é ke ana kyeen gi, a lɛ, yé i Ti lé éé kyeengiwe yé, é dan i gooli pa lɛ.

⁷ Dé i a bazorona, té i boadérenu kiɛre kiɛre fe bélé bɛn bɛnu zé zo lo. É dɔ wo gi léé, ’wolé wefele kiɛre ma lé Bale é dan wo dére ’ma lɛ.

⁸ Té ka kɛlɛ bélé wo zo lo, naa, ka Ti ka mawe dɔɔ é kyɛn faa yé ka a laana a lee.

⁹ ’Ka bazoro ’ko zo: Ko Ti lé é ke la gi, munu ’é kana i tɔ ma ma;

¹⁰ ilé plale munu nwiin ’é da ma; fɛan zo lé woo ilé sɔlɛwe kɛla la gi na, a zo lé ’wa kɛlɛ tɛrɛ la ’ko ma.

¹¹ ’I kolé kyɔ fɛblele nɔ ko lɛ kyɔ;

¹² ’i ko ma we vo, munu lé wo wenyané kɛlɛ ko lɛ, ko wo ma we vo fɛan zo, a zo.

¹³ Té i go ko nya ko gi danna lo; ’i ko si Satan lé plɛplɛ wuo. Plale mi nwiin koo, plɛplɛ koo, fuablele koo, wa izé nya lɛɛfaama. Amɛɛn.

¹⁴ Dé ka munu ma we vo, ka Lagi Ti é dan ka ma we vo lɛ é ziin.

¹⁵ Naa, dé ka ’ka munu ma we voo lo, ka Ti ’ka ka ma we voo lo é ziin.

We lé Jézu a fe lɔrɔsɔnle lé we ma

¹⁶ Dé ka a lɔrɔ sɔnna, té ka yara kyɛ vɔ a gi, bélé bodrɔzannu zo lo; woo yara wɔraan a ma, a gɔɔnle nya munu lɛ léé, ’wa lɔrɔ sɔnna. Wo ’wozé gooli ye; maa fe ka lɛ.

¹⁷ Dé i a lɔrɔ sɔnna, ’i yara foli yé ’i nyɔnɔ gié i nwiin,

¹⁸ té munu ilé lɔrɔsɔnle gi dɔɔ lo we gi, naa, i Ti lé é ke ana kyeen gi, é a dɔɔ, yé i Ti lé éé kyeengiwe yé, é dan i gooli pa lɛ.

Lagi fɛwezannu

¹⁹ Tɛrɛ la ’ko, té ka fɛwezannu téé kabo zé nya lo; boworo valé gyan éé wo sɛra ’bɛna; kyeenwozannu éé wɔraan kɔn gi, yé wo fɛnu sia kyeen nya ’bɛna.

²⁰ Naa, ’ka fɛwezannu téé la gi; boworo valé gyan ’ka wo sɛra ’bɛna lo; kyeenwozannu ’ka wɔraan kɔn gi yé wo fɛnu sia kyeen nya ’bɛna lo.

²¹ Naa, fɛana lé ilé fɛwezannu ke, ana duo lé i bli ke.

Mi kɔlɛ lé kyɛbɔ

²² Mi yuɛwɔlɛ a mi kɔlɛ lé kyɛbɔ nya. Dé i yuɛ fuu a é ta, ’té i kɔlɛ faa va a é kinile;

²³ naa, dé i yuɛ fuu ’ka é ta lo, ’té i kɔlɛ faa kɛlɛ gunutinu va. Bɛwemalé san lé ke i gi, dé é kinin gunu nya, ’té gunuti tiritiri lé ke bɛ.

Kazambale valé fuafɛnu

²⁴ Mi ’ka bɔa kɛlɛle lɛ mi fié wuozan nya lo. Naa, a do za é dan vo lɛ a gi, yé a koɛzan é dan sɔ lɛ a lɛ; é dan nana lɛ a do va, yé é dan a koɛzan ye lɛ boami nya. Ka ’ka bɔa kɛlɛle lɛ Kazambale valé tɛrɛlafuafɛnu wuozannu nya lo.

Gibɔrɔpale

²⁵ Bɛwemalé maa lé ka lɛ léé: Té ka kalé tɛrɛla gi bɔrɔ pa lo, dé ka dan mɛ fɛ ble lɛɛ? Dé ka dan mɛ fɛ mini lɛɛ? Té ka ka kɔlɛ gi bɔrɔ pa lo, dé ka dan mɛ fɛ zén lɛ ka taa? Mi lé tɛrɛla ’ka mini lɛ fɛblele ta loo? Kɔlɛ ’ka mini lɛ sɔnu ta loo?

²⁶ ’Ka mianénu nagini. Wo ’ka fɛ do féi paan lo yé wo ’ka fɛ do kulian lo, yé wo ’ka fɛ do kpen zun dɔa lo; yé ka Lagi Ti éé fɛblele no wo lɛ. Ka we ’ka mini lɛ wo ta loo?

²⁷ Ka va mi kyɛn ɛ bɔalɛ yé alé gi bɔrɔ pale alé yi do taa zén a vaa?

²⁸ Yé mɛmalé ka sɔnu gi bɔrɔ paan? Bolu lé goo éé tin‐é fɛan zo, ’ka gi bɔrɔ ’bɛ ma do. Wo ’ka nyanama paan lo; yé wo ’ka kununu zunwo lo.

²⁹ Naa, maa lé ka lɛ léé, Salomɔn bozen lé fua faa gi, é ’ka sɔ zima zén lɛ é ta bélé bolu lé goo vwi zo lo.

³⁰ Bli paan tegele lo zannu. Dé Kazambale éé sɔ zén‐é féi lunu ta ’ko zo, ’té ’bɛnu ke ana kyɔ yé tɛlɛ wo ’bɛnu vulian ’furu gi, é ’ka dan kazé mini lɛ wozé ta loo?

³¹ Amalé té ka fɛ do kpen gi bɔrɔ pa lo. Té ka fe léé: Mɛ fɛ lé ko dan a ble lɛɛ? mɛ fɛ lé ko dan a mini lɛɛ? mɛ fɛ lé ko dan zén lɛ ko taa? lo.

³² Fɛ ’konu faa lé kwa lé tɛrɛlamunu ke a kulina. Naa, ka Lagi Ti a gi dɔɔ léé, ka mawe a wo faa gi.

³³ Naa, ’ka kwa kuli léé, ka kɛlɛ munu lé Kazambale ke é plale wo nwiin, wo vazannu nya, ’bɛ valé Kazambale lé we tegele kɛlɛzannu nya, yé Kazambale é dan fɛ ’konu faa nɔ lɛ ka lɛ ’bɛnu ta loru.

³⁴ Té ka tɛlɛ gi bɔrɔ pa lo, naa, dé tu kini yé wo ’bɛ gi bɔrɔ pa. Tu faa valé élé gi bɔrɔ pale lé.