Matio 5 - Kazambale lé Sebe Sauunu 1979

We lé Jézu a fe gɔ nwiin, a pélisiana

¹ Jézu mi gu yé aan wo é go gɔ nwiin, yé é nyana, yé a zuomunu bié a sɔnɔ.

² Yé é kun we paale ma wo gi a fele nya léé:

³ Munu lé wo ’ka ’wobo yé ’wo bli gi mi nya lo, wa bɛan ’bɛ gi bɛ, ’bɛ a é zima wozé nya, naa, Kazambale a é plale wo nwiin.

⁴ Gikyɛdɔmunu a bɛan ’bɛ gi bɛ, ’bɛ a é zima wozé nya, naa, Bale é dan wo tɔrɔ paa lɛ.

⁵ Mi drɔɔnu a bɛan ’bɛ gi bɛ, ’bɛ a é zima wozé nya, naa, tɛrɛ é dan kɛlɛ lɛ wozé nya.

⁶ Munu lé, we tegele lɔrɔ ke wo ma bélé ’yiminilɔrɔ zo, wa bɛan ’bɛ gi bɛ, ’bɛ a é zima wozé nya, naa, Bale é dan lɔrɔ si lɛ wo ma.

⁷ Nyanaizénmunu a bɛan ’bɛ gi bɛ, ’bɛ a é zima wozé nya, naa, Bale é dan nyanai zén lɛ wo ta.

⁸ Munu lé wo bɔn‐in ke fu, wa bɛan ’bɛ gi bɛ, ’bɛ a é zima wozé nya, naa, wo dan Kazambale ye lɛ.

⁹ Mi woronawe blezannu a bɛan ’bɛ gi bɛ, ’bɛ a é zima wozé nya, naa, Kazambale é dan wo laa lɛ ’é benu.

¹⁰ Munu lé woo nyané blé we tegele kɛlɛle ma, wa bɛan ’bɛ gi bɛ, ’bɛ a é zima wozé nya, naa, Kazambale a é plale wo nwiin.

¹¹ Dé wo ka sɔnɔ anlé we maoo, dé wo kle pa ka ta anlé we maoo, dé wo ka tɔ sɛrɛ bɛ faa ma anlé we maoo, ka a bɛan ’bɛ gi bɛ, ’bɛ a é zima kazé nya.

¹² Ka bli ’é vo drɔɔ yé ’ka vo gi nanale blɛn gi, naa, ka gooli é dan kɛlɛ lɛ blɛn la gi. A zo duo lé balelayemunu lé wo ke ka ’lɛ é vinin, wo nyané pa wo ta yee ɛ zo.

Wɛ valé san lé we

¹³ Ka a tɛrɛlamunu ma wɛ nya. Dé wɛ néné si é ma ’naan, mɛ fɛ nya lé wa kɛla nénéé? Wo ’ka we do kɛla a nya é dɛrɛ lo; wa vulian béera yé munu a zɔn‐o ’wo gane nya.

¹⁴ Ka a san nya tɛrɛ la. Fla lé wa pa gɔ nwiin, wo ’ka bɔa a yɔɔle lɛ lo;

¹⁵ yé wo ’ka kyɛbɔ bié yé wa wɔra bɔ wuo lo, naa, wa dɔraan kyɛbɔ dɔrana, ’té munu faa lé wo ke kɔn gi, ’té éé wo va kinié.

¹⁶ Kalé san ’é munu va kini yee ɛ zo ma, wolé ka kɛlɛwe zinnu yele we ma yé ka Ti lé é ke la gi yé wa tɔ zin bɔ.

We lé Jézu a fe bélidɔwe ma

¹⁷ Té é dɔ ka gi léé, an da Bale lé bélidɔwenu valé balelayemunu dérenu yi ga lɛ lo; an ’ka da lɛ wo yi ga lɛ lo, an da wo kɛlɛle lɛ sɔɔ lɛ.

¹⁸ Naa, maa lé ka lɛ webozen nya léé, dé la valé tɛrɛ ’ka tan gié lɛ lo, bélidɔwe gyɛwɔlɛ kiiéné valé a bale kiiéné do kpen ’ka dan san lɛ a va lo, fɔɔ, yé a kɛlɛle faa lɛ é sɔɔ.

¹⁹ Mi lé éé bélidɔwe kiiéné boen lɛganma, ’té éé we paan munu gi léé, ’wa lɛgama, dé Kazambale lé plale mi faa nwiin da bléyian va, é dan ’bɛzan kɛlɛ lɛ mi kiiéné boen nya, naa, mi lé éé bélidɔwe lɛdɔama, ’té éé a paan munu gi léé, ’wa lɛdɔma, dé Kazambale lé plale mi faa nwiin da bléyian va, é dan ’bɛzan kɛlɛ lɛ mi blɛn nya.

²⁰ Maa lé ka lɛ léé, dé kazé Kazambale zuo tawole tegele ’ka minié sɛbɛgifemunu valé Farizimunu zé ta lo, dé Kazambale lé plale mi faa nwiin da bléyian va, kazé ’ka dan kɛlɛ lɛ a va lo.

We lé Jézu a fe bliflile ma

²¹ Ka a ’ma léé, wa fe mi vininnu lɛ léé: Té i mi gyɛ lo; mi lé é mi gyɛ, a yara lé weblezannu é we lɛdɔ a gi.

²² Naa, maa lé ka lɛ léé, miomian é bli fli é bwe ma, a yara lé weblezannu é we lɛdɔ a gi; yé mi lé é a fe é bwe lɛ léé: Tavozan, a yara lé webolikinimunu wo we lɛdɔ a gi; yé mi lé é é bwe laa, ’wuosɛrɛzan, a yara lé Bale é we lɛdɔ a gi kyɛ plɛplɛ lé wa laama jéɛna, a va.

²³ Bɛwemalé, dé i da ilé blan nya balebanna, yé ’bɛna a sele dɔ i gi léé, ’é vawe a ’é bwe bli gi,

²⁴ ’ilé blan vo balebanna ’lɛ, ’i go é vinin bii valé i bwe ’é zén ékeva, a zuo ’i da ilé blan nya Bale lɛ.

²⁵ ’Ilé we bɛ pa ékema i nyanézan va fiéfié, bléyian va lé ka ke gona a nya zia, dé é da i nɔ weblezan lɛ, yé weblezan i pa sunya lee, yé ’bɛ i vɔ bokɔn gi.

²⁶ Maa lé i lɛ webozen nya léé, i ’ka dan bɔra lɛ ’bɛna lo fɔɔ, ’té i alé gɔɔli faa nɔ ɛ wo, ’té alé su do kpen ’ka vo lɛ i lee lo.

We lé Jézu a fe leginile ma

²⁷ Ka a ’ma léé, wa fe léé: Té i le bɛ gini lo.

²⁸ Naa, maa lé ka lɛ léé, miomian é yuɛ vɔ le do ta é bli bɔle a ma we gi, ’té é a gini é bli gi kwakwa.

²⁹ Dé i bɛyila yuɛ i vɔ wenyané gi, bé bɔra a gi, yé bé vuli i ma baa, naa, i kɔlɛvafɛ do sanle i lee fila vɔ é mini Bale lé i kɔlɛ faa vulile jéɛna kyɛ plɛplɛ va ta.

³⁰ Yé dé i bɛyila bɛ i vɔ wenyané gi, bé kini, yé bé vuli i ma baa, naa, i kɔlɛvafɛ do sanle i lee fila vɔ é mini i kɔlɛ faa gole jéɛna kyɛ plɛplɛ va ta.

We lé Jézu a fe le bɔrale ma

³¹ Wa fe léé: Dé mian é na bɔra, ’é lebɔrasɛbɛ nɔ a lɛ ma,

³² naa, maa lé ka lɛ léé, mian é na bɔra, ’té dé é ’ka gɔné bɛ gini lɛ lo, ’té a zana ɛ a kɛlɛ gɔnéginizan nya; yé mi lé é le bɔrale si, é mi bɛ na si.

We lé Jézu a fe bale ’nyɔɔnle ma

³³ Ka a ’ma é ziin léé, wa fe mi vininnu lɛ léé: té i bale ’nyɔɔn vié nya lo, naa, we faa lé bé fe Mizambale lɛ balekunle nya, bé lɛ sɔɔ ma.

³⁴ Naa, maa lé ka lɛ léé, té ka fɛ do kpen ’nyɔɔn lo; la a Kazambale nyanana nya, amalé té ka la ’nyɔɔn lo;

³⁵ tɛrɛ a a ganewuofɛ nya, amalé té ka tɛrɛ ’nyɔɔn lo; Jérusalɛm a minwiinzan blɛn lé fla nya, amalé té ka Jérusalɛm ’nyɔɔn lo.

³⁶ I ’ka bɔa i nwin gɔ do nɔlale lɛ é ti valé é fu lo, amalé té i ’wuo ’nyɔɔn lo.

³⁷ Ka dére ’é kɛlɛ in valé gba nya ma; yee lé wa paan a ta éé sié yo va.

We lé Jézu a fe we lɛgi pale ma

³⁸ Ka a ’ma léé, wa fe léé: ’Wo yuɛ lɛgi pa yuɛ nya yé ’wo suiɛ lɛgi pa suiɛ nya.

³⁹ Naa, maa lé ka lɛ léé, té kazé lɛgi pa wenyanékɛlɛzan ma lo. Dé mi i bɛyila blin gyɛ, bé koɛzan nɔla a lɛ.

⁴⁰ Dé mi do i tɔ fe ilé varɔ ma, ’ilé sɔ nɔ a lɛ é ziin.

⁴¹ Dé mi do a a va léé, i go élé kɔné nya kilo do la gla nya, ’i goan kilo fié.

⁴² Mi lé é fɛ laa i lee, bé nɔ a lɛ, yé mi lé é da vɛɛn si lɛ i va, té i sɔn vɔ a nɔle ma a lɛ lo.

É a lé i nyanézannu é sɔ i lɛ

⁴³ Ka a ’ma léé, wa fe léé: I bɔluzan ’é sɔ i lɛ, yé i nyanézan za ’é vo i gi ma.

⁴⁴ Naa, maa lé ka lɛ léé: Ka nyanézannu ’é sɔ ka lɛ ma; munu lé woo bale paan ka ma, ’ka wo drɔɔ vo ma; ’ka wezin kɛlɛ ka zapamunu lɛ ma; munu lé woo nyané valé kle paan ka ta, ’ka bazoro wolé we ma ma.

⁴⁵ É a lé ka kɛlɛ yee ɛ zo, ka Ti lé é ke la gi, ka kɛlɛle a benu nya we gi, naa, é élé yiri bié wenyanékɛlɛmunu valé wezinkɛlɛmunu ta, yé éé lɛɛ dan mi plenu valé mi tegelenu ta.

⁴⁶ Munu lé ka sɔ wo lɛ, dé wo saa ɛ sɔ ka lɛ, ’té a yara lé ka mɛ tɔnɔ ye ’bɛ maa? Vagɔɔlisimunu é ziin, yee duoan wa kɛla loo?

⁴⁷ Yé dé ka we ka bwenu saa ɛ va, ’té ka wezin kyɛn ɛ kɛlɛɛ? Yolémunu é ziin, yee duoan wa kɛla loo?

⁴⁸ Ka Lagi Ti a fɛan zo, yé gun ’ka a ma lo, a zo lé té gun é vo ka ma lo ma.