Matio 4 - Kazambale lé Sebe Sauunu 1979

Satan Jézu gi dan

¹ Kazambale Léli go Jézu nya bwi gi, yonufaatagɔné lé a gi danle we gi.

² É lɔrɔ sɔn yi yɔ fié, béli koo, yiéyi koo, amalé lɔrɔ a gyɛ,

³ migidanzan bié a sɔnɔ yé é léé: Dé i a Kazambale Be nya, bé fe gɔlɛ ’konu lɛ léé, ’wo kinin buru nya.

⁴ Naa, Jézu a zi pa a lɛ léé: Wa gyɛ Kazambale lé sɛbɛ gi léé: Mi ’ka voo é yuɛma fɛblele saa nya lo, naa, mi éé voo é yuɛma dére faa lé éé sié Kazambale ’léé, yee ɛ nya.

⁵ Yonufaatagɔné go a nya fla sauun ta, yé é a vɔ Balebangikɔn nwiin loru yé é lé a lɛ léé:

⁶ Dé i a Kazambale Be nya, ’i fɔrɔ, ’i zun, naa, é a é gyɛle Kazambale lé sɛbɛ gi léé: É dan ilé we fe lɛ lanjenu lɛ léé, ’Wo bɛ dɔ i wuo, Dé i sɔné é da san gɔlɛ ma.

⁷ Jézu lé a lɛ léma: É a é gyɛle é ziin Kazambale lé sɛbɛ gi léé: Té i Mizan ilé Bale gi dan lo.

⁸ Yonufaatagɔné go a nya é ziin gɔ grɔgrɔ nwiin, yé é tɛrɛ la bɛntɛrɛ faa valé ’wolé fua gɔɔn a lɛ,

⁹ yé é lé a lɛ léé: Dé i dia i bli la an ’lɛ yé i an bɔ, maa dan fɛnu ’ko faa nɔ lɛ i lɛ.

¹⁰ Jézu lé a lɛ léé: Satan, ’i si an ma. É a é gyɛle Kazambale lé sɛbɛ gi léé: ’I ’wuo tua Mizan izé Bale lɛ, yé ’i yee do kpen ɛ bɔ.

¹¹ Yé yonufaatagɔné daan a ma. Yé bé ye, lanjenu da Jézu va, yé wa mawe kɛlɛ.

Jézu kun élé nyanama pale ma Galilé tɛrɛ la

¹² Jézu a ’ma aan wo léé, wo Jan vɔ bokɔn gi, é go Galilé tɛrɛ la.

¹³ É si Nazarɛt, yé é da nyana lɛ Kapɛnaum, wɛyi sɔnɔ, Zabulɔn valé Néfitali tɛrɛ la,

¹⁴ we lé balelayezan Ézai a fe, a lɛsɔɔle we gi. É léé:

¹⁵ Zabulɔn valé Néfitali munu, Tɛrɛ lé é ke wɛyi sɔnɔ, tɛrɛ lé é ke Juudɛn yuu zi, Galilé tɛrɛ lé é ke bɛn bɛnu lee,

¹⁶ Munu ’ko, wa é nyanale gunutinu va yé wo san blɛn ye; Yé wo lé wo ke é nyanale ga furɔ wuo, ga tɛrɛ la, san nwɛɛn wo ta.

¹⁷ É sia bléyi ’ko va, Jézu kun Bale lé wefele ma, yé é léma: Kazambale plale mi nwiin bɔ é pu, amalé ’ka bli nɔla.

Jézu pɔgyɛmunu ziɛn laa

¹⁸ Jézu a giéna aan wo Galilé wɛyi gɔ la, é mi fié ye, Simɔn lé wa laama Piɛri, é valé é zuané André nya; wa pɔgyɛséli nwɛɛnna wɛyi va. Wa pɔgyɛmunu nya.

¹⁹ Yé é lé wo lɛ léma: ’Ka da an zuo, yé an ka kɛlɛ munu ginizannu nya.

²⁰ Tɔɔn, wo daan ’wolé pɔgyɛsélinu ma yé wo go a zuo.

²¹ É si aan wo ’bɛna yé é bɔ é ’lɛ sɛ, é mi fié bɛ ye, Zébédé be Jak valé é zuané Jan, ’té wa ’yitagoro gi ’wo ti Zébédé va. Wa ’wolé pɔgyɛsélinu buruna bééna.

²² É wo laa, yé kele tɔɔn, wo ’yitagoro valé ’wo ti vo bɛ, yé wo go a zuo.

Jézu mi gu mawe kɛlɛ

²³ Jézu gié Galilé tɛrɛ faa la, we paale nya munu gi bazorokɔnnu gi, ’té éé Bale plale mi nwiin lé Wenéné fé, ’té éé gyɛgyɛmunu valé mayaamunu faa bélié.

²⁴ A tɔ zin fele bɔ Siri tɛrɛ faa la, yé munu faa lé wo ma éé yaan yé wa nyané blena gyɛ gɔnɔ faa lee, wo da wo faa nya Jézu va, yé é wo béli; wo faa lé yonu ke wo gi koo, gwegyɛzannu valé furuagyɛzannu koo, woo lé.

²⁵ Mi gu blɛn go a zuo. Wo si Galilé tɛrɛ koo, fla vu lé tɛrɛ koo, Jérusalɛm koo, Judé tɛrɛ koo, Juudɛn yuu zi tɛrɛ koo, wona.