Matio 3 - Kazambale lé Sebe Sauunu 1979

Mi batizéwozan Jan Bale lé we fe

¹ Bléyi ’ko va mi batizéwozan Jan bɔra; é Kazambale lé we fe Judé bwi la.

² É léé: Kazambale lé plale mi nwiin bɔ é pu, amalé ’ka bli nɔla.

³ Balelayezan Ézai a fe aan wo léé: Mi lé é ke siaana bwi gi, a dére lé ke ’ko: ’Ka zi ma’lɛrɛ Mizan lɛ; ’Ka alé zinu ta bɔ ékema, mian Ézai a mawe fe bɛ, Jan lé.

⁴ Nyɔgɔmé kyɛɛ varɔ a é zénle Jan ta, yé wikɔlɛ kyɛsidi a é dɔle a gyɛn. Flɛlɛ valé bwi gi zɔrɔnyɔnɔ ɛ ke alé fɛblele nya.

⁵ Jérusalɛm munu koo, Judé tɛrɛlamunu faa koo, Juudɛn zi tɛrɛlamunu faa koo, wo go a va.

⁶ Wo ’wolé wenyanénu fe yé é wo batizéwo Juudɛn yuu va.

⁷ Juifinu palu do ana, woo wo laama Farizimunu. Wo dɔ bélidɔwe gi plɛplɛ. Juifinu palu do ana é ziin, wo ’bɛnu laama Sadusémunu. Naa, Farizimunu valé Sadusémunu kiɛre da Jan lé mi batizéwona nagini lɛ. É wo ye aan wo, é lé wo lɛ léé: ménénwunnu bɛn, de ɛ we paa ka gi léé, bliflile lé é dan da lɛ bɛ, ka fwi a ’lɛɛ?

⁸ We lé ka kɛla yé ’bɛ a gɔɔn léé, ka bli nɔla, ’ka ’bɛ kɛlɛ,

⁹ yé té ka fe ka bli gi léé, Abraam a ’wo tra nya, lo. Naa, maa lé ka lɛ léé, Kazambale é bɔalɛ léé, é gɔlɛ ’konu kinin Abraam gɔnɔlazannu nya.

¹⁰ Wo zaa dɔ kɔɔn yili suni ma é kwakwa; bɛwemalé yili faa lé wo ’ka ’wo poro zima baan lo, woo wo bɔié yé woo wo vulian kyɛ va.

¹¹ Maa ka batizéwo ’yi nya ka bli nɔlale we gi, naa, mian é dan da lɛ an zuo, a plɛplɛ mini an ta, yé a yara ’ka an yara lé maa alé sawala si lo. Yee ɛ dan ka batizéwo lɛ Léli Sauun valé kyɛ nya.

¹² Alé guli a a lee. É dan élé ’sa sunwo lɛ, yé é a fɛɛ, yé é dan élé ’sawɔlɛ zén lɛ ’sawɔlɛ tadɔna, naa, é dan ’sa pɛɛnu kyɛ ble lɛ, kyɛ lé é ’ka dirian monomono lo, a va.

Jan Jézu batizéwo

¹³ ’Bɛ zuo Jézu si Galilé tɛrɛ la yé é da Jan va Juudɛn yuu bai, ’é batizéwole we gi.

¹⁴ Naa, Jan lé a lɛ léé: Gba. É a lé i an batizéwo ’naan, yé i léé, maa ’é batizéwoo?

¹⁵ Jézu a zi pa a lɛ léé: ’I bli si izé lɛ, ’i anzé kɛlɛ. Naa, é a é zima léé, ko Bale dére tawe faa kɛlɛ tegele. Yé Jan ’ka we bɛ fe lɛ é dɛrɛ lo.

¹⁶ Jézu batizéwole zuo é si ’yi va tɔɔn, la lɛ so, yé é Kazambale Léli ye zunna ’é ta é kɔlɛ nya bélé plala zo.

¹⁷ Yé bé ye, dére do we la gi yé é léé: Mi ’ko, é a an be lé é sɔ an lɛ é baba, a nya. A va sɔlɛle a an gi blɛn.