Matio 28 - Kazambale lé Sebe Sauunu 1979

Jézu nwale

¹ Dé wolé flinyi nyaa, dimansi nya bladi, yirinwabléyi va, Magadala le Mari valé Mari bɛ, wo go gɔlɛkoro nagini lɛ.

² Tɔɔn, tɛrɛ ma nyɔɔn plɛplɛ yé Mizambale lé lanje do si la gi yé é gɔlɛ ’ko burula yé é nyana a ta.

³ A yara a bélé lɛɛ yuɛwuovɔle zo, yé alé sɔ a fu tata bélé tɔrɛ lé a gi éé bié, a zo.

⁴ Kana zén sunyanu gi yé wo dia yé wo kɛlɛ bélé mi galenu zo.

⁵ Lanje lé lomu lɛ léé: Té ka kana lo, naa, maa a gi dɔɔ léé, Jézu lé wa gyɛ yili ta, ka a a naginina.

⁶ É ’ka ’ko lo; é nwa, fɛan zo lé é a fe, a zo. ’Ka da, ’ka a plana gini,

⁷ yé ’ka go fiéfié yé ’ka fe a zuomunu lɛ léé, é nwa gale va. Yé é go ka ’lɛ Galilé tɛrɛ la; ana lé ka dan a ye lɛ. Yee lé maa a fe ka lɛ.

⁸ Wo si gɔlɛkoro ’léé é kele, kanale valé gi nanale blɛn nya, yé wo vlan si we ’ko zuo fele a zuomunu lɛ we ma.

⁹ Tɔɔn, woo valé Jézunu kee zia yé é léma: Ka nyɔn‐o. Wo bié a ma yé wo kun a gane ma yé wo dia ’wo bli la a ’lɛ.

¹⁰ Jézu lé wo lɛ léé: Té ka kana lo. ’Ka go ’ka fe an zuanénu lɛ léé, ’wo go Galilé tɛrɛ la; ana lé wo dan an ye lɛ.

Sunyanu we ’ko zuo fe

¹¹ Lomu a zia aan wo Jézu vun tabin sunyanu kenu go fla yé we lé é bɔ, wa zuo faa fe Balebanmunu segelenu lɛ.

¹² Balebanmunu segelenu zén aan wo ékeva mi segelenu va, wo ’wuo tɛn ékema yé wo gɔɔli kiɛre nɔ sunyanu lɛ yé wo léé:

¹³ ’Ka fe léma: Ko a yi gyɛna aan wo, a zuomunu da é béli yé wa si.

¹⁴ Dé gbɔrɔnama a ’ma, ko dan a bli dɔrala lɛ yé we ’ko ’ka dan kɛlɛ lɛ we nya ka ma lo.

¹⁵ Sunyanu gɔɔli si yé we lé wa fe wo lɛ, wa kɛlɛ, yé a gun gyɛle nwɛɛn Juifinu worona fɔɔ kyɔ yi nya.

Jézu é zuomunu nwunvɔ

¹⁶ Jézu zuomunu vu ta do go Galilé tɛrɛ la, gɔ lé Jézu a fe wo lɛ, a nwiin.

¹⁷ Dé wa ye wo dia ’wo bli la a ’lɛ, naa, wo va mi kenu ’é gi bɔrɔan léé, dé wezen léé? dé wezen kaan loo?

¹⁸ Jézu bié aan wo yé é lé wo lɛ léé: Wo plɛplɛ faa nɔ an lɛ tɛrɛ la valé la gi.

¹⁹ ’Ka go, ’ka bɛnnu faa kɛlɛ an zuomunu nya, yé ’ka wo batizéwo Ti koo, Be koo, Léli Sauun koo, wo tɔ gi,

²⁰ yé we faa lé maa ka béli dɔ a nya, ’ka a ta tawole paa wo gi. Yé ka ye, maa a ka va yifaama, fɔɔ yé tɛrɛ la é nyaa a zo.