Matio 27 - Kazambale lé Sebe Sauunu 1979

Wo da Jézu nya Pilat lɛ

¹ ’Bɛ é tu kini Balebanmunu segelenu faa valé mi segelenu wo ’wo va we ble Jézu gyɛle we ma.

² Wo bale vɔ a ma yé wo goan yé wa nɔ gbɔrɔnama Pɔns Pilat lɛ.

Judas ga

³ A pamunuleezan Judas a ye aan wo léé, wo ga dɔ a nwiin, a bli kyɛ dɔ yé é da gɔɔlifu yɔ do wɔlɛ vu nya Balebanmunu segelenu valé mi segelenu lɛ é ziin,

⁴ yé é léé: An wenyané kɛlɛ we?-?anwiinlozan pale nya ka lee. Wo lé a lɛ léé: ’Bɛ é mɛ ɛ kɛla ko lɛɛ? Ilé we bɛ.

⁵ Judas gɔɔlifu nwɛɛn Balebangikɔn gi yé é go ébo dun lɛ.

⁶ Balebanmunu segelenu gɔɔlifu sia yé wo léé: Nyɛ mafɛ lé, amalé a se ’ka ko lɛ léé, ko a pa Balebangikɔn lé gɔɔlipagifɛ gi lo.

⁷ Dé wo ’wo va we ble faa wo bɔdɔzan lé féi lɔ gɔɔlifu ’ko nya, bɛnnu pana nya.

⁸ Amalé wo vo féi ’ko laana nyɛféi fɔɔ kyɔ yi nya.

⁹ ’Bɛ zo lé we lé balelayezan Jérémi a fe, a lɛ sɔɔ; é léé: Wo gɔɔlifu yɔ do wɔlɛ vu si, mi lé wa vlɛ fe, mi lé Izraɛl lé nénu a vlɛ fe, a mafɛ lé.

¹⁰ Yé yee lé wa nɔ bɔdɔzan lé féi ma, wean Mizambale a fe an lɛ, a yɛrama.

Pilat we laa Jézu lee

¹¹ Jézu dɔ gbɔrɔnama ’lɛ. Gbɔrɔnama we laa a lee léé: Juifinu nwiinzan blɛn lé i nyaa? Jézu lé a lɛ léé: Yee lé bé fe bɛ.

¹² We lé Balebanmunu segelenu valé mi segelenu a dɔna a nwiin é ’ka a do kpen zi vɔ lɛ lo.

¹³ Yé Pilat lé a lɛ léé: We kiɛre lé wa dɔna i nwiin, i ’ka a maan loo?

¹⁴ Yé Jézu ’ka a zi do kpen vɔ lɛ wo lɛ lo; amalé gbɔrɔnama gi vuru é baba.

Wo ga dɔ Jézu nwiin

¹⁵ Gbɔrɔnama vawe lé ke léé, fɛti faa do do nya éé bokɔngizan do bɔraan, mian mi gu a laa a lee, yee lé.

¹⁶ ’Bɛ bléyi va bokɔngizan do ana, wa laama Barabas. A tɔ naané bɔ.

¹⁷ Pilat lé zén‐ékevamunu lɛ léé: Ka a a va léé, maa a kyɛnzan ɛ bɔra ka lɛ, Barabas léé, taa, Jézu lé wa laama Krist, yee léé?

¹⁸ É a gi dɔɔ léé, wa maawona Jézu va amalé wo da a nya ’é lɛ.

¹⁹ É a é nyanale fɛana lé woo we blé, ana, yé a na we do pa a lɛ zia léé: Té i wɔra mi tegele ’ko lé we gi lo. Kyɔ an nyané ble é baba nyɛ fla alé we ma.

²⁰ Balebanmunu segelenu valé mi segelenu mi gu ma kyɛ dɔ léé, ’wo Barabas laa a lee, yé ’wo zamaga dɔ Jézu nwiin.

²¹ Gbɔrɔnama lé wo lɛ léé: É sɔ ka lɛ léé, maa mi fié ’ko va mi kyɛnzan ɛ bɔra ka lɛɛ? Yé wo léé: Barabas lé.

²² Pilat lé wo lɛ léé: Jézu lé wa laama Krist, maa kɛlɛ a nya kaa? Yé wo faa léé: ’Wa gyɛ yiliblan ta ma.

²³ Gbɔrɔnama léé: Mɛ wenyané lé é a kɛlɛɛ? Wo siaa é ziin taawo plɛplɛ léé: ’Wa gyɛ yiliblan ta ma!

²⁴ Pilat a ye aan wo léé, wo ’ka ’é dére nyi sina lo, yé wele wooo gi gyɛ, é ’yi si yé é bɛ ma foli mi gu yuɛ va yé é léma: Mi tegele ’ko, an bɛ ’ka ’bɛ nyɛ wuo lo. Kalé we ’bɛ.

²⁵ Munu faa léé: Iin. A nyɛwe ’é dɔ ko valé kolé nénu nwiin ma.

²⁶ Pilat Barabas bɔra wo lɛ yé dé é Jézu bla wɛsɛné nya faa é a nɔ wo lɛ, a gyɛle yili ta we ma.

Sunyanu we nana Jézu ma

²⁷ Gbɔrɔnama lé sunyanu go Jézu nya weblekɔn gi yé wo ’wo pɔnénu laa yé wo diri a zi.

²⁸ Wo alé sɔnu si a ta, yé wo sɔ sɔɔn zén a ta.

²⁹ Wo lélinu vuru ékema yé wa wo a ’wuo ma alé tɔkoro nya, yé wo gyan do pa a bɛyi lee yé wo powuo zun a ’lɛ, yé wa ma we nana a fele nya léé: Juifinu nwiinzan blɛn, i nyɔn‐o.

³⁰ Yé wo ’lélibɔlɛ vɔ a ma yé wo gyan si a lee yé wa blin é nwiin a nya.

³¹ Dé wa ma we nana ’ko zo faa wo sɔ si a ta yé wo abo zé sɔnu zén a ta é ziin yé wo goan a gyɛle yili ta we gi.

Wo Jézu gyɛ yili la

³² Wo bɔra aan wo, wo kee Sirɛnezan do nya wa laama Simɔn, yé wo Jézu lé yiliblan nɔ a lɛ gla nya a gole a nya we gi.

³³ Dé wo bɔ fɛ lé wana laama Gɔlgɔta, ’bɛ gi léé, mi ’wuowɔlɛ lé fɛna, ana,

³⁴ wi nyɛtoro lé wa vɔɔ dɔrɔ nya wa nɔ a lɛ; naa, dé é a lɛ dan é ’ka a minile nyi si lɛ lo.

³⁵ Jézu gyɛle yiliblan ta zuo, wo ’munnu zun alé sɔ do do ta, we lé balelayezan a fe, a lɛsɔɔle we gi; é léé: Wo anlé sɔnu guli ’wo ke ma, yé wo ’munnu zun anlé varɔ grɔgrɔ ma.

³⁶ A zuo wo nyana, yé wa nagini.

³⁷ Wean ma lé wo ga dɔ a nwiin, wa sɛbɛ gyɛ yé wa pa a nwiin loru léé: Juifinu nwiinzan blɛn Jézu lé ke ’ko.

³⁸ Wo kyeenwomunu fié gyɛ a va, a do a bɛyilazia, yé a do a bɛbolazia.

³⁹ Giémunu a sɔnɔ, ’té woo ’wuo nyɔɔn‐an yé wo léé:

⁴⁰ Bii lé i Balebangikɔn sɛra yé bé dɔa é ziin yi yaa nya, ’ibo si we gi. Dé bii a Bale Be nya, ’i si yili ta, ’i zun.

⁴¹ Balebanmunu segelenu koo, sɛbɛgifemunu koo, mi segelenu koo, wo we nana a ma é ziin, yé wo léé:

⁴² É mi bɛnu si we gi, naa, é ’ka bɔa ébo sile lɛ we gi lo. Izraɛl nwiinzan blɛn lé baa? ’É si yili ta, ’é zun ma, yé ko dan ko bli vo lɛ a lɛ.

⁴³ Ébo bɛ pa Kazambale lee, naa, dé é sɔ Kazambale lɛ, ’bɛ a si we gi sin ma. Jézu a fe é kyɛn léé, ’é a Kazambale Be nya, amalé wa fe.

⁴⁴ Kyeenwomunu lé wo wo gyɛ yili ta a va, wa sɔnɔ yee dére duo nya.

Jézu gale

⁴⁵ É sia yiéyi yiri ma, ’té gunu a é dɔrale tɛrɛ faa la fɔɔ yé é bɔ yiri tɛnlale plɛplɛ ma.

⁴⁶ Yiri tɛnlale plɛplɛ nya Jézu siaa dére plɛplɛ nya léé: Éli, Éli, lama sabakatani? ’Bɛ gi léé, anzé Bale, anzé Bale, mɛmalé i an vo an doo?

⁴⁷ ’Bɛna mi kenu a ’ma aan wo yé wo léma: É a Éli laana.

⁴⁸ Tɔɔn, wo va mi do go vlan nya yé é nézurufɛ sia, yé é a vɔ dɔrɔ tɔndɔle va, yé é a pa gyan do ’léé, yé é a dɔ Jézu lɔ ma léé, ’é a gi ’yi mini.

⁴⁹ Mi pɔnénu léé: Bé vo, dé Éli é dan da lɛ a si lɛ we gii? Ko dan a ye lɛ.

⁵⁰ Jézu siaa plɛplɛ é ziin do yé a lɛ bo.

⁵¹ Yé bé ye, Balebangikɔn gi sɔ lé wa kɛlɛ kɔnmi nya, a fee bo, é sia loru yé é bɔ tɛrɛ, yé tɛrɛ ma nyɔɔn, yé gɔlɛ blɛnnu fee gyɛ,

⁵² mi vunnu lɛ so yé Kazambale lé munu kiɛre nwa gale va.

⁵³ Dé Jézu nwa gale va faa wo si ’wo vun gi, yé wo go fla sauun ta, yé wo bɔra mi kiɛre yuɛ va.

⁵⁴ Sunyayɔsoru ’lɛzan valé munu lé wo ke a va yuɛ pana Jézu ta, dé wo tɛrɛ ma nyɔɔnle ye, é valé we lé é bɔ bɛ, a nya, wo gi nyɛ blɛn kini yé wo léma: Mi ’ko a Bale Be nya webozen nya.

⁵⁵ Lomu kenu ana bɛ é ziin, wa é dɔle baa ’té wa naginian. Jézu si Galilé tɛrɛ la bléyian va, wo go a zuo a mawe kɛlɛle we gi.

⁵⁶ Magadala le Mari koo, Jak valé Jozɛfu bu Mari koo, Zébédé benu bu koo, wa wo va le kenu nya.

Jézu pale

⁵⁷ Nyanadi pa aan wo fuablezan do lé é si Arimaté, wa laama Jozɛfu, é da. Yee a é ziin Jézu zuomi do nya.

⁵⁸ É go Pilat va, yé é Jézu gale laa a lee. Pilat léé, ’wa nɔ a lɛ.

⁵⁹ Jozɛfu a gale si yé é sɔ dɛrɛ vuru a ma.

⁶⁰ Yé guru dɛrɛ do lé Jozɛfu léé, ’wa bo gɔlɛ gi ’ézé nya, é Jézu pa a gi. A zuo é gɔlɛ blɛn burula yé é a lɛ tan a nya yé é go.

⁶¹ Magadala le Mari valé Mari bɛ, wa é nyanale mi vun la mi.

Jézu vun tabinle

⁶² ’Bɛ é tu kini, fɛ ma’lɛrɛ yi zuo, Balebanmunu segelenu valé Farizimunu go ékeva Pilat va

⁶³ yé wo léma: Kozan, a sele dɔ ko gi léé, bléyian va lé midɔnasizan gla nya ’ko ke é yuɛma, é léé, yi yaa bɔle nya é dan nwa lɛ.

⁶⁴ Amalé, ’i munu béli dɔ léé, ’wo yuɛ pa a vun ta fɔɔ yi yaazan nya, dé a zuomunu é da a gale si kyeen nya yé wo lé munu lɛ léé: É nwa gale va. Dabli voélazan ’ko, ’bɛ é dan kɛlɛ lɛ blɛn yé ’bɛ é mini a vininzan ta.

⁶⁵ Pilat lé wo lɛ léma: Sunyanu lo; ’ka go yé é sɔ ka lɛ fɛan zo, ’ka kɛlɛ.

⁶⁶ Wo go yé wo gɔlɛkoro lɛ tan wo sɔbɛla faa nya, wa ’léé zéé yé wo sunyanu dɔ a zi.