Matio 26 - Kazambale lé Sebe Sauunu 1979

Minwiinmunu Jézu ma we ble

¹ Jézu nyaa aan wo we ’konu faa fele nya, é lé é zuomunu lɛ léé:

² Ka a gi dɔɔ léé, Taboyi lé fɛti yi vo fié yé wo dan maa blami Be pa lɛ munu lee, an gyɛle yiliblan ta we gi.

³ Balebanmunu segelenu valé mi segelenu zén ékeva Balebanmunu ’lɛzan lé wa laama Kaifu, alé gɔrɔ gi.

⁴ Wa kwa kulina léé, ’wo Jézu kun dabli nya, yé wa gyɛ.

⁵ Naa, wo léé: Té wa kɛlɛ fɛtiyi nya lo, dé fla bɔ é da gyɛ.

Mari lasikɔrɔ zén Jézu nwiin Bétani

⁶ Bléyian va lé Jézu a Bétani, pantɛngyɛzan Simɔn lé kɔn gi,

⁷ lezan do bié a va. Gɔlɛ fu kuo a a lee, yé lasi?-?kɔrɔan a vlɛ ke blɛn, é a a gi. Jézu ke aan wo fɛblena, é lasikɔrɔ zén a nwiin.

⁸ A zuomunu ’bɛ ye aan wo, wo bli fli yé wo léé: Mɛmalé é lasikɔrɔ ’ko sɛrɛ é plaa?

⁹ Woo bɔa kɔɔn léé, ’wo lasikɔrɔ ’ko dan vlɛ blɛn nya yé wa ma gɔɔli nɔ nyanégyɛmunu lɛ.

¹⁰ Jézu a gi dɔɔ aan wo, yé é lé wo lɛ léé: Mɛmalé ka a lezan ’ko bli gi kyɛ dɔnaa? É wezin kɛlɛ an lɛ.

¹¹ Nyanégyɛmunu a ka va yifaama, naa, maa ’ka ka va yifaama lo.

¹² É lasikɔrɔ ’ko zén an kɔlɛ ma an pale lé we ma.

¹³ Maa lé ka lɛ webozen nya léé, fɛfaana lé munu é dan Wenéné ’ko fe lɛ tɛrɛ faa la, we lé lezan ’ko a kɛlɛ wo dan a zuo fe lɛ yé lezan ’ko sele é dan dɔ lɛ munu gi.

Judas a nyi si léé, é Jézu pa munu lee

¹⁴ Yé mi vu ta fié va mi do lé, wa laama Kariɔtzan Judas, é go Balebanmunu segelenu va yé é léé:

¹⁵ Mɛ fɛ lé ka dan a nɔ lɛ an lɛ yé maa Jézu pa ka lee? Yé wo gɔɔlifu yɔ do wɔlɛ vu nɔ a lɛ.

¹⁶ É sia ’bɛ bléyi va, bléyian é bɔalɛ é Jézu pa wo lee, é a sin ’bɛ naginina.

Jézu valé é zuomunu Taboyi lé fɛti kɛlɛ

¹⁷ Buru lé lévɛn ’ka a va lo, alé yi vininzan nya Jézu zuomunu da é va yé wo we laa a lee léé: É sɔ i lɛ léé, ko Taboyi lé fɛti ma’lɛrɛ i lɛ fɛ kyɛnnaa?

¹⁸ É lé wo lɛ léé: ’Ka go fla, mi do va, yé ’ka fe a lɛ léma: Mizan léma: Ézé bléyi bɔ é pu; é dan Taboyi lé fɛti kɛlɛ lɛ é zuomunu va ilé kɔn gi.

¹⁹ We lé Jézu a fe, a zuomunu a kɛlɛ yé wo Taboyi lé fɛti ma’lɛrɛ.

²⁰ Nyanadi pa aan wo yee valé mi vu ta fié nyana tablé zi.

²¹ Wa fɛblena aan wo, é léma: Maa lé ka lɛ webozen nya léé, ka va mi do é dan an pa lɛ munu lee.

²² Wo bli kyɛ dɔ é baba yé wo kun wefele ma a lɛ do do léé: Mizan, maa léé?

²³ É a zi pa léé: Mian éé bɛ wɔraan an va kana gi, yee ɛ dan an pa lɛ munu lee.

²⁴ Maa blami Be a gona fɛan zo lé wo anlé we gyɛ sɛbɛ gi, a zo. Mi lé é maa blami Be pa munu lee, a gale nyɔ. A fila vɔ kɔɔn léé, té wa yaa boenwo lo.

²⁵ A pamunuleezan Judas léma: Anzan, maa léé? Jézu a zi pa a lɛ léé: Yee lé bé fe bɛ.

Jézu we dɛrɛ paa é zuomunu gi

²⁶ Wa yee fɛ blena aan wo, Jézu buru si, yé dé é Bale bɔ vɔ faa, é a bɔi, yé é a nɔ é zuomunu lɛ a fele nya léé: Buru ’ko, an kɔlɛ lé; ’ka a si, ’ka a ble.

²⁷ ’Bɛ zuo é ’yiminikana do si yé dé é Bale bɔ vɔ faa é a nɔ wo lɛ a fele nya léé: ’Yiminikana ’ko, ’ka faa a gi fɛ mini;

²⁸ naa, é a an nyɛ nya; gipawe dɔ plɛplɛ nyɛ lé é zana mi kiɛre lé we ma, wo ma we vole wolé wenyanénu ma we gi, yee lé.

²⁹ Maa lé ka lɛ léé, é sia yi ’ko ma, maa ’ka dan dɔrɔyi ’ko mini lɛ é ziin lo, fɔɔ ’té kaa kee é wo an Ti va, yé maa a bɛ mini ka va.

³⁰ Dé wo lɛrɛ vɔ faa yé wo go Ɔlivi gɔ nwiin.

Jézu Piɛri lé sɔnvɔle é ma fale vɔ

³¹ Yé Jézu lé wo lɛ léé: Anlé we é dan ka faa kele lɛ é béli ’ko; naa, é a é gyɛle Kazambale lé sɛbɛ gi léé: Maa dan ’blatabinzan gyɛ lɛ yé alé ’bla trubɛnu é dan fwila lɛ.

³² Naa, dé an nwa gale va faa maa dan go lɛ ka ’lɛ Galilé tɛrɛ la.

³³ Piɛri lé a lɛ léma: Dé ilé we mi faa kele, maa do ’ko, é ’ka dan maa kele lɛ monomono lo.

³⁴ Jézu lé a lɛ léé: Maa lé i lɛ webozen nya léé, kyɔ é béli ’ko, dé manegɔné ’ka tan we lɛ lo, i dan a fe lɛ gɔnɔ yaa léé, ’é ’ka an dɔɔa lo.

³⁵ Piɛri lé a lɛ léé: Dé é a gale i va nyaoo, maa ’ka dan a fe lɛ léé, an ’ka i dɔɔa lo lo. Yé Jézu zuomunu pɔnénu faa yee we duo ɛ fe.

Jézu bazoro Jɛtsémané

³⁶ A zuo, Jézu go fɛ lé wa laan Jɛtsémané, ana, yé é lé é zuomunu lɛ léé: ’Ka ’é nyana ’ko, yé an ’é go bazoro lɛ mun.

³⁷ É go Piɛri valé Zébédé be fiénu nya é va, yé a bli gi kyɛ kun dɔle ma, ’té éé nyané blé kaii.

³⁸ Yé é lé wo lɛ léé: An bɔn‐in kyɛ dɔle ’ko, é vo sɛ yé é an gyɛ; ’ka vo ’ko yé ’ka vo é yuɛma an va.

³⁹ Yé é go é ’lɛ sɛ, yé ébo dia é bli la yé é bazoro ’ko zo, léé: An Ti, dé é bɔalɛ ’é kɛlɛ, ’yiminikana ’ko ’é si an lee ma. Naa, té é kɛlɛ an sɔlɛwe nya lo, ’é kɛlɛ i sɔlɛwe nya ma.

⁴⁰ Yé é da é zuomunu va, yé é bɔ wo ma yigyɛna yé é lé Piɛri lɛ léé: Ka ’ka bɔa vole lɛ é yuɛma lɛrɛ do nya an va loo?

⁴¹ ’Ka vo é yuɛma yé ’ka bazoro, té wo ka gi dan lo we ma; mi bli a nyi sié, naa, mi a tɔɔtɔɔ.

⁴² É go é ziin a gɔnɔ fiézan nya yé é bazoro léé: An Ti, dé é ’ka bɔalɛ léé, ’yiminikana ’ko é si an lee lo, yé maa ’ka a gifɛ minian lo, ilé blibɔmawe ’é kɛlɛ ma.

⁴³ Yé é da é pa gi yé é bɔ wo ma, ’té yi vɔ wo yuɛ la, ’té wa yigyɛna.

⁴⁴ É si wo va yé é go yé é bazoro a gɔnɔ yaazan nya dére duo nya.

⁴⁵ A zuo é go é zuomunu va yé é lé wo lɛ léé: ’Ka yi gyɛ sin yé ’ka flin. Ka ye, a bléyi bɔ yé wo dan maa blami Be pa lɛ wenyanékɛlɛmunu lee.

⁴⁶ ’Ka nwa, kaa go, mian é an paan munu lee, yee lé é dan bɛ.

Wo Jézu kun

⁴⁷ É a tan we fena aan wo, Judas lé é ke mi vu ta fié va mi do nya, é da mi gu nya é va, ’té gwɔunnu valé yilinu a wo lee. Balebanmunu segelenu valé mi segelenu ɛ wo nwunvɔ.

⁴⁸ Jézu liwozan tɔmase ’ko gɔɔn wo lɛ léé: Dé maa mian tuu gyɛ, ’té yee lé, ’ka kun.

⁴⁹ Tɔɔn, é bié Jézu ma yé é léma: Anzan, i nyɔn‐o. Yé é a tuu gyɛ.

⁵⁰ Jézu lé a lɛ léé: An béé, we lé i da a kɛlɛ lɛ, ’bé kɛlɛ. Yé munu ’ko bié yé wo Jézu kun, yé é vo wo lee.

⁵¹ Jézu va mi do ’élé gwɔun so é kɔlɛ gi yé é Balebanmunu ’lɛzan wuozan tɔné bɔi a nya.

⁵² Jézu lé a lɛ léé: ’Ilé gwɔun wɔra é kɔlɛ gi. Munu faa lé woo gwɔun sian, wo dan ga lɛ gwɔun ’léé.

⁵³ É dɔ i gi kaa? Dé an siaa béli ’ko an Ti lɛ do kpen, é ’ka bɔalɛ yé é lanje lɛ blɛɛn vu ta fié pa an lɛ zia é nya do yé é mini ’bɛ ta loo?

⁵⁴ Naa, dé maa kɛlɛ ’bɛ zo, Kazambale lé sɛbɛnu lé wo we ’konu fe wo gi, wo lɛ é dan sɔɔ lɛ kaa?

⁵⁵ ’Bɛ bléyi va Jézu lé munu lɛ léé: Ka da an kun lɛ gwɔunnu valé yilinu nya ka lee, bélé fɛan zo lé ka da kyeenwozan kun lɛ, a zo. Maa a yifaama é nyanale ka va we paana munu gi Balebangikɔn gi yé ka ’ka an kun lɛ lo.

⁵⁶ Naa, we ’konu faa bɔ, we lé balelayemunu a gyɛ Kazambale lé sɛbɛ gi, a lɛsɔɔle we ma. ’Bɛ zuo Jézu zuomunu si ’é zi vlan nya.

Wo go Jézu nya webolikinimunu va

⁵⁷ Jézu kunmunu go ’é nya Balebanmunu ’lɛzan Kaifu lé kɔn gi, fɛana lé sɛbɛgifemunu valé mi segelenu ke é zénle ékeva, ana.

⁵⁸ Piɛri vo dana a zuo baa fɔɔ yé é bɔ Balebanmunu ’lɛzan lé gɔrɔ ’léé, yé é wɔra gɔrɔ gi yé é nyana miwuozannu va, dé we ’ko é dan nyaa lɛ kaa? yé ’é ana ye.

⁵⁹ Balebamunu segelenu valé webolikinimunu, wo faa vo viéwenu naginina, ga dɔle Jézu nwiin we ma.

⁶⁰ Naa, wenayezannu lé woo viéwoo, dé wo kiɛre daoo, wo ’ka we do kpen ye lɛ lo. A zuo, wenayemi fié, wo é dawo yé ’bɛnu léé:

⁶¹ Mi ’ko léé, é bɔa Balebangikɔn sɛrɛle lɛ yé é a dɔ é pa gi yi yaa.

⁶² Balebanmunu ’lɛzan nwa yé é léé: I ’ka we zi do kpen paan loo? Mɛ we lé munu ’ko ke a dɔna i nwiin bɛɛ?

⁶³ Naa, Jézu vo é tadɔle. Balebanmunu ’lɛzan lé a lɛ léé: Maa lé i lɛ Bale yuɛmalé tɔ gi léé, dé bii ɛ ke Kazambale Be Krist nya, ’bé fe ko lɛ.

⁶⁴ Jézu a zi pa a lɛ léé: Yee lé bé fe bɛ. ’Bɛ ta loru, maa lé ka lɛ léé, é sia bléyi ’ko va, ka dan maa blami Be ye lɛ é nyanale Plɛplɛzan Bale bɛyilazia, yé ka dan an ye lɛ dana latinu ta.

⁶⁵ Yé Balebanmunu ’lɛzan élé sɔ fia yé é léé: É Kazambale sɔnɔ! Ko mawe a é ziin wenayezan bɛ gii? Ka alé sɔnɔwodére ’ma sin. É dɔ ka gi kaa?

⁶⁶ Wo léé: A ga yara lé!

⁶⁷ ’Bɛ zuo, wo ’lélibɔlɛ vɔ a yara yé wo fɔlɛ duun a lɛ yé wa blin kyɛ si, a fele nya léé:

⁶⁸ Krist, ’i balelaye ma; de ɛ fɛ duun i lɛɛ? ’Bé fe ko lɛ.

Piɛre sɔn vɔ Jézu ma

⁶⁹ Naa, Piɛri a é nyanale béera gɔrɔ gi. Miwuole do bié a ma yé ’bɛ léma: Bii é ziin, bii a Galilézan Jézu va.

⁷⁰ Naa, é gba vɔ wo faa yuɛ va yé é léé: We lé bii ke a fena, maa ’ka ’bɛ maan lo.

⁷¹ É a gona aan wo gɔrɔ ’léé, miwuole bɛ a ye yé ’bɛ lé ana munu lɛ léé: Mi ’ko a é ziin Nazarɛtzan Jézu va.

⁷² Yé é gba vɔ é ziin bale ’nyɔɔnle nya yé é léé: Maa ’ka mi ’ko dɔɔa lo.

⁷³ ’Bɛ zuo sɛ, ana munu bié Piɛri va yé wo lé a lɛ léé: Webozen nya, bii é ziin, i a wo va mi do nya. Ko i dɔɔ i dére ma.

⁷⁴ Yé é kun balepale ma, é valé bale ’nyɔɔnle nya yé é léé: Dé maa mi ’ko dɔɔ pe! Bale ana ye. ’Bɛna tɔɔn yé manegɔné we.

⁷⁵ Yé dére lé Jézu a fe léé: Dé manegɔné ’ka tan we lɛ lo, i dan a fe lɛ gɔnɔ yaa léé, ’é ’ka an dɔɔa lo, a sele dɔ Piɛri gi. Yé é bɔra yé é vo wuvɔna kaii.