Matio 25 - Kazambale lé Sebe Sauunu 1979

Blɛn vu ma gɔné vɔle

¹ Kazambale plale mi nwiin a bélé blɛn vu lé gɔné ’ka tan wo dɔɔ lɛ le nya lo, wolé we zo.

² Wo ’wolé fintrannu si yé wo go lesizan si lɛ zia. ’Tu wo va blɛn soru gyɛ, yé wo va blɛn soru we dɔɔ.

³ ’Tugyɛzannu ’wolé fintrannu si, naa, wo ’ka nyɔnɔ si lɛ lo;

⁴ yé wedɔɔzannu go nyɔnɔ nya kuo gi, é valé ’wolé fintrannu nya.

⁵ Lesizan a mɔnna, amalé yi vɔ wo yuɛ la yé wo yi gyɛ.

⁶ Tu la, munu siaa léé: Lesizan a dana! ’Ka go a si zia!

⁷ Blɛn ’konu faa vuo yé wo ’wolé fintrannu ma’lɛrɛ.

⁸ ’Tugyɛzannu lé wedɔɔzannu lɛ léé: Kolé fintrannu a dirina. ’Ka kalé nyɔnɔ ke nɔ ko lɛ.

⁹ Wedɔɔzannu léé: Gba, é ’ka kozé valé kazé bɔa lo, amalé a fila vɔ lé ka go nyɔnɔdanmunu va yé ka kazé lɔ.

¹⁰ Wa gona aan wo a lɔ lɛ yé lesizan da. Wo lé wo ma ke é ’lɛrɛle, wo wɔra a va lesina fɛtikɛlɛkɔn gi yé wo kɔn lɛ tan.

¹¹ ’Bɛ zuo blɛn koɛnu da yé wo léé: Mizan, Mizan, ’i kɔn lɛ so ko lɛ.

¹² Naa, é léé: Maa lé ka lɛ webozen nya léé, maa ’ka ka dɔɔa lo.

¹³ Ka ’ka lesizan dabléyi valé a dayi dɔɔa lo, bɛwemalé ’ka vo é yuɛma.

Talannu ma gɔnévɔle

¹⁴ Kazambale plale mi nwiin a bélé mi lé é a gona tawona yé é wuomunu laa yé élé fɛnu bɛ pa wo lee, a zo.

¹⁵ É talan soru nɔ a do lɛ, yé é talan fié nɔ a do lɛ, yé é a do nɔ a do lɛ, fɛan zo lé woo bɔa yaawole lɛ a nya do do, a zo, yé é go.

¹⁶ Tɔɔn, mi lé é talan soru nɔ ’bɛ lɛ, ’bɛ go yaawo lɛ a nya yé é pa a ma talan soru.

¹⁷ A zo duo lé, mi lé é talan fié nɔ ’bɛ lɛ, ’bɛzé pa a ma talan fié é ziin.

¹⁸ Mi lé é talan do kpen nɔ ’bɛ lɛ, ’bɛ go guru bo lɛ tɛrɛ gi, yé ’bɛ ézan lé gɔɔli yɔɔ a gi.

¹⁹ Ana mɔn faa yé miwuozannu ’ko, wozan da yé wo ’wolé gɔɔlinu bɔra a lɛ.

²⁰ Mi lé é talan soru nɔ ’bɛ lɛ, ’bɛzan bié talan soru valé é pamale nya é lee yé ’bɛ léma: Anzan, i talan soru nɔ an lɛ, yé bé ye, é pa a ma talan soru.

²¹ Azan lé a lɛ léé: An wuozan zima, yarapawelazan, ’bɛ a é zima. I kɛlɛ yarapawelazan nya we kiéné ’ko gi, amalé maa dan fɛ kiɛre bɛ pa lɛ i lee; ’i da, ’i nyana an va, yé ko gi ’é nana ékeva.

²² Mi lé é talan fié nɔ ’bɛ lɛ, ’bɛzan bié é ziin yé ’bɛ léma: Anzan, i talan fié nɔ an lɛ, bé ye, é pa a ma talan fié.

²³ Azan lé a lɛ léé: An wuozan zima, yarapawelazan, ’bɛ a é zima. I kɛlɛ yarapawelazan nya we kiéné ’ko gi, amalé maa dan fɛ kiɛre bɛ pa lɛ i lee; ’i da, ’i nyana an va, yé ko gi ’é nana ékeva.

²⁴ A zuo, mi lé é talan do kpen nɔ ’bɛ lɛ, ’bɛ bié yé ’bɛ léma: Anzan, maa a gi dɔɔ léé, bii a bli la plɛplɛzan nya, yé i fɛ gya fɛana lé i ’ka fɛ vɔ lɛ lo, ana, yé fɛana lé i ’ka ’sa sunwo lɛ lo, ana lé i ’sawɔlɛ sian.

²⁵ An kana yé an go ilé talan yɔɔ lɛ tɛrɛ gi; bé ye, ilé fɛ lo, bé si.

²⁶ Azan a zi pa a lɛ léé: An wuozan naané, kun‐anwozan, bé gi dɔɔ léé, maa fɛ gya fɛana lé an ’ka fɛ vɔ lɛ lo, ana, yé fɛana lé an ’ka ’sa sunwo lɛ lo, ana lé maa ’sawɔlɛ sian.

²⁷ Naa, é a kɔɔn lé, i go anlé gɔɔli pla banké la, yé dé an da an pa gi yé anlé gɔɔli si, ’té a tɔnɔ a a va.

²⁸ ’Ka talan si a lee yé ’ka a nɔ talan vuzan lɛ.

²⁹ Mian fɛ ke a lee, wo dan fɛ nɔ lɛ a lɛ, yé alé fɛ ’é bɔ di, yé mian alé fɛ ’ka lo, wo dan a leefɛ si lɛ a lee.

³⁰ Yé an wuozan boazan ’ko, ’ka vuli béera, fɛana lé woo wuvɔa, ’té woo suiɛ la blé, ana.

Bɛnnu lé we blele

³¹ Dé maa blami Be da anlé fua ta gɔɔnle nya anlé lanjenu faa nya an va, an dan nyana lɛ anlé webleblin tɔbɔle ta.

³² Bɛn faa é dan zén lɛ ékeva an ’lɛ. An dan wo si lɛ ékeva, bélé fɛan zo lé ’blatabinzan éé ’blanu valé bolinu sié ékeva, a zo;

³³ an dan ’blanu pa lɛ an bɛyilazia yé an dan bolinu pa lɛ an bɛbolazia.

³⁴ Yé maa minwiinzan ’é dan a fe lɛ an bɛyilazannu lɛ léé: Ka lé an Ti ka drɔɔ vo, ’ka da; tɔnɔtɛrɛ lé é a kɛlɛ kazé nya tɛrɛ pélisia bléyi va, ’ka nyana ana.

³⁵ Lɔrɔ an gyɛ yé ka fɛblele nɔ an lɛ; ’yiminilɔrɔ an gyɛ yé ka ’yiminile nɔ an lɛ; maa a bɛn nya, yé ka an bɛn si;

³⁶ maa a é porole yé ka sɔ nɔ an lɛ; gyɛ an gyɛ yé ka da we lɛ an va; maa a bokɔn gi yé ka da an va.

³⁷ Mi tegelenu é dan a fe lɛ an lɛ léé: Mizan, mɛ yi la lé ko i ye lɔrɔgyɛzan nya yé ko fɛblele nɔ i lɛɛ? Yé mɛ yi la lé ’yiminilɔrɔ i gyɛ yé ko ’yiminile nɔ i lɛɛ?

³⁸ Mɛ yi la lé ko i ye bɛn nya yé ko i bɛn sii? Yé mɛ yi la lé ko i ye é porole yé ko sɔ nɔ i lɛɛ?

³⁹ Yé mɛ yi la lé ko i ye gyɛ kɛlɛnaa, ɛɛ, dé bokɔn gi léé, yé ko go i vaa?

⁴⁰ Maa minwiinzan é dan a zi pa lɛ wo lɛ léé: Maa lé ka lɛ webozen nya léé, yi faa‐an nya lé ka we ’konu kɛlɛ an zuané kiiénénu va mi do lɛ, ka a kɛlɛ maa ɛ lɛ.

⁴¹ A zuo an dan a fe lɛ an bɛbolazannu lɛ léé: Balepamazannu, ’ka si an va; ’ka go kyɛ lé é ’ka dirian monomono lo, ’té wa kɛlɛ yonufaatagɔné valé élé yonu zé nya bɛ, a va.

⁴² Lɔrɔ an gyɛ yé ka ’ka fɛblele nɔ lɛ an lɛ lo; ’yiminilɔrɔ an gyɛ yé ka ’ka ’yiminile nɔ lɛ an lɛ lo;

⁴³ maa a bɛn nya yé ka ’ka an bɛn si lɛ lo; maa a é porole yé ka ’ka sɔ nɔ lɛ an lɛ lo; gyɛ an gyɛ yé maa a bokɔn gi yé ka ’ka da lɛ we lɛ an va lo.

⁴⁴ Wo dan a zi pa lɛ an lɛ é ziin léé: Mizan, mɛ yi la lé ko i ye, dé lɔrɔgyɛzan léé, dé ’yiminilɔrɔgyɛzan léé, dé bɛn léé, dé mi porole léé, dé gyɛgyɛzan léé, dé bokɔngizan léé, a nya, yé ko ’ka bɔ lɛ i va loo?

⁴⁵ An dan a zi pa lɛ wo lɛ léé: Maa lé ka lɛ webozen nya léé, a gɔnɔ faa‐an nya lé ka ’ka we ’konu kɛlɛ lɛ an zuané kiiénénu ’ko va mi do lɛ lo, ka ’ka a kɛlɛ lɛ maa ɛ lɛ lo.

⁴⁶ Yé munu ’ko, wo dan go lɛ kle lé é ’ka nyaan lo, a ble lɛ, naa, mi tegelenu é dan go lɛ vole é yuɛma lé é ’ka nyaan lo, a ye lɛ.