Matio 24 - Kazambale lé Sebe Sauunu 1979

Jézu Balebangikɔn guru zanale a gi fale vɔ

¹ Jézu bɔra Balebangikɔn gi yé é a gona aan wo, a zuomunu bié, Balebangikɔn dɔle lé we fele a lɛ we ma.

² É lé wo lɛ léé: Ka ’bɛ faa yee? Wo va gɔlɛ lé é dan vo lɛ é ke ta ’té wo ’ka dan ’bɛ zana lɛ lo, ’bɛ gɔlɛ ’ka lo. Maa fe ka lɛ.

Nyanéblele pélisiana

³ É nyana Ɔlivi gɔ nwiin yé a zuomunu da we ’ko laa lɛ a lee, ’té wa wo saa, yé wo léé: Bé gi fe ko lɛ, ’bɛ é dan bɔ lɛ mɛ yi laa, yé i dale valé tɛrɛla nyaale tɔmase é dan kɛlɛ lɛ kaa?

⁴ Jézu a zi pa wo lɛ léé: ’Ka yuɛ pa kabozen va, té mi do kpen é ka saan lo ma.

⁵ Naa, mi kiɛre é dan da lɛ an tɔ gi, ’té wa fé léé, ’wo ɛ ke Krist nya. Wo dan mi kiɛre saan lɛ.

⁶ Ka dan gulidan we ’ma lɛ, yé ka dan a ’ma lɛ léé, wa guli danna fɛ kiɛrena. ’Ka yuɛ pa kabozen va, té ka ’bɛ gi bɔrɔ pa lo. É a bélé we ’konu é bɔ, naa, ’bɛ ’ka a nyaabléyi nya lo.

⁷ Bɛn do é dan nwa lɛ bɛn do ma, yé bɛntɛrɛ do é dan nwa lɛ bɛntɛrɛ do ma, yé lɔrɔ é dan dɔ lɛ yé tɛrɛ ma é dan nyɔɔn lɛ fɛ kena.

⁸ ’Bɛ faa a nyanéblelenu pélisiana nya é pla.

⁹ Yé wo dan ka pa lɛ munu lee, yé wo dan kle pa lɛ ka ta, yé wo dan ka gyɛ lɛ, yé an tɔ lé we ma lé bɛnnu faa é dan ka za pa lɛ.

¹⁰ É ziin, mi kiɛre é dan diéra lɛ, yé wo dan ’wo ke liwo lɛ yé wo dan ’wo ke za pa lɛ.

¹¹ Viébalelayezannu kiɛre é dan nwa lɛ, yé wo dan munu kiɛre saan lɛ.

¹² Weple kɛlɛle gi é dan gyɛ lɛ, amalé mi kiɛrenu sɔle wo ke lɛ ’wuo é dan dɔ lɛ.

¹³ Naa, mian éé yara paan anlé we kɛlɛle ta fɔɔ yé é bɔ a ’wuo plana, ’bɛzan é dan si lɛ we gi.

¹⁴ Wo dan Kazambale plale mi nwiin lé wenéné ’ko fe lɛ tɛrɛ faa la, wenayedére nya, bɛnnu faa lɛ. A zuo, a ’wuo pla bléyi é dan bɔ lɛ.

Nyanéblele blɛɛn

¹⁵ Amalé mi lé é ke sɛbɛ ’ko ta fena, ’bɛzan ’é yuɛ pa ébozen va ma. Fɛ sɛrɛle tata fɛ naané lé wo ’ka wo yuɛ vɔa a ta lo, ’té balelayezan Daniɛl alé we fe bɛ, dé ka a ye é dɔle fɛna sauun na,

¹⁶ ’bɛ bléyi va, munu lé wo ke Judé tɛrɛ la, ’wo fwi yé ’wo go gɔnu nwiin ma;

¹⁷ mi lé é ke kɔn gwa ta, té é zun yé élé kɔngifɛnu si lo;

¹⁸ mi lé é ke féi, té é go fla élé sɔ sile we ma lo.

¹⁹ Bɔnlomu valé lomu lé wolé né ke nyɔ ma ’bɛ yinu nya, wo gale nyɔ.

²⁰ Yé ’ka bazoro léé, té ka fwibléyi é kɛlɛ, dé dunubléyi léé, dé flinyi léé, a nya lo.

²¹ Naa, nyanéblele é dan kɛlɛ lɛ tɔntɔn fɔɔ é sia tɛrɛ pélisia bléyi va fɔɔ yé é bɔ bléyi ’ko va, nyanéblele ’ko zoɛ ’ka tan bɔ lɛ lo, yé wo ’ka dan a zoɛ ye lɛ monomono lo.

²² Dé Bale ’ka yi kenu si lɛ a ta lo, mi do kpen ’ka dan si lɛ we gi lo, naa, munu lé Kazambale wo si a va ézé nya, wolé we ma lé é dan yi kenu si lɛ a ta.

²³ Dé mi do a fe ka lɛ léé, Krist a ’ko‐oo, é a mun‐oo, té ka bli é vo ’bɛ lɛ lo.

²⁴ Dabli Kristnu valé viébalelayemunu é dan nwa lɛ yé wo dan we blɛnblɛnnu valé gyɛzorowenu kɛlɛ lɛ fɔɔ yé munu lé Kazambale wo si a va ézé nya, yé wo wo saan, ’té dé wo bɔa kɔɔn saanle lɛ.

²⁵ Ka ye, maa a fe ka lɛ a bɔle ’lɛ.

²⁶ Bɛwemalé dé wa fe ka lɛ léé: Bé ye, é a bwi gi, té ka go ’bɛna lo; dé wa fe léé: Bé ye, é a kɔnmi zi, té ka bli é vo ’bɛ lɛ lo.

²⁷ Naa, fɛan zo lé lɛɛ yuɛwuovɔle éé sian yirinwanazia yé wa yé fɔɔ yirivɔnazia, a zo duo lé maa blami Be dale ke.

²⁸ Fɛana lé fɛ gale ke, ana lé golanu é dan zén lɛ ékeva.

Blami Be dale

²⁹ Naa, ’bɛ nyanébleyi ’konu zuo tɔɔn, gunu é dan dɔra lɛ yiri yara, yé moné ’ka dan bi lɛ é dɛrɛ lo, yé monénénu é dan si lɛ la gi yé wo dia, yé lanu gi fɛ plɛplɛnu ma é dan nyɔɔn lɛ.

³⁰ ’Bɛ zuo maa blami Be zé tɔmase é dan bɔra lɛ la gi, yé tɛrɛ la bɛnnu faa é dan wuvɔ lɛ yé wo dan maa blami Be ye lɛ dana latinu ta plɛplɛ valé fua blɛn tagɔɔnle nya.

³¹ Yé maa dan anlé lanjenu nwunvɔ lɛ béli fɛnle nya, yé munu lé maa wo si a va anzé nya, lanjenu é dan wo si lɛ tɛrɛ sun ziɛn ta, é sia la glɛ sina fɔɔ yé é bɔ la glɛ koɛ ma.

³² ’Ka we ’ko dan bɔrɔyili ma yé ’ka a gi ’ma ma. Dé a ’yi dɔ ’é gi yé é a nɛɛna, ka gi dɔɔ léé, lɛɛdabléyi bɔ é pu.

³³ A zo duo léé, dé ka we ’konu faa ye bɔna, ka gi dɔɔ léé, maa blami Be, an bié ka sɔnɔ boenwo.

³⁴ Maa lé ka lɛ webozen nya léé, ’bɛ bléyi vamunu ’ka dan ga lɛ we ’konu faa bɔle ’lɛ lo.

³⁵ La valé tɛrɛ é dan gié lɛ, naa, an dérenu ’ka dan gié lɛ monomono lo.

Mi do kpen ’ka a dayi valé a dabléyi dɔɔa lo

³⁶ Mi do kpen ’ka ’bɛ yi valé ’bɛ bléyi dɔɔa lo. Lagi lanjenu valé maa Bale Be ’ka a dɔɔa lo; an Ti do kpen ɛ a dɔɔ.

³⁷ We lé é bɔ Noé bléyi va, yee duo ɛ dan bɔ lɛ maa blami Be dabléyi va.

³⁸ Bléyian va lé lɛɛ blɛn ’ka tan da lɛ lo, ’bɛ yinu ta munu éé fɛ blé, ’té woo fɛ minian, ’té woo le sié, ’té woo wo lunu no bo lɛ fɔɔ yé é bɔ Noé wɔrayi ma ’yitagoro gi.

³⁹ Yé we do ’ka dɔ lɛ wo ’wuo gi lo fɔɔ lɛɛ blɛn da yé é wo faa sia; é dan kɛlɛ lɛ yee duo ɛ zo, maa blami Be dabléyi va.

⁴⁰ Dé mi fié a ékeva féi, wo dan a do si lɛ yé wa do vo;

⁴¹ dé le fié a fɛ zɔnna ’woli do gi, wo dan a do si lɛ yé wa do vo.

⁴² Yian nya lé kazan é dan da lɛ, ka ’ka a dɔɔa lo, amalé ’ka vo é yuɛma.

⁴³ ’Ka we ’ko dɔɔ ma, dé é kɛlɛ léé, kɔnzan é kyeenwozan dabléyi dɔɔ é béli, ’té é dan vo lɛ é vuole yé é ’ka a nyi sié léé, ’wo wɔra élé kɔn gi yé ’wo fɛ sia kyeen nya lo.

⁴⁴ Bléyian va lé ka ’ka ka gi bɔrɔna maa blami Be dale ma lo, maa dan da lɛ ’bɛ bléyi va, amalé ’kaa é ziin, ka ma ’é vo é ’lɛrɛle.

Mi leezan zima valé mi leezan naané

⁴⁵ Mi leezan yarapawelazan gikinizan lé azan a pla élé kɔngimunu nwiin léé, ’é wolé fɛblele nɔ wo lɛ a nɔbléyi nya, de léé?

⁴⁶ Mi leezan lé azan bɔ a ma we ’ko kɛlɛna, azé a é zima.

⁴⁷ Maa lé ka lɛ webozen nya léé, é dan élé fɛnu faa bɛ pa lɛ a lee.

⁴⁸ Naa, dé a leezan a mi naané nya yé é lé é bli gi léé: Anzan a mɔnna;

⁴⁹ yé é kun é bɔlunu blale ma, ’té éé fɛ blé ’té éé fɛ minian nwɛgyɛmunu va,

⁵⁰ yian nya lé é ’ka ézan lɛbɛnna lo, yé bléyian é ’ka a gi dɔɔa léé, ézan é dan da lɛ a nya lo, mi leezan ’ko, azan é dan da lɛ ’bɛ bléyi va,

⁵¹ yé é dan a wi kini lɛ ékema yé é dan azé fɛ nɔ lɛ a lɛ bodrɔzannu va; ’bɛna lé wo dan wuvɔ lɛ yé wo dan ’wo suiɛ la ble lɛ.