Matio 23 - Kazambale lé Sebe Sauunu 1979

Jézu sɛbɛgifemunu gi bɔra

¹ Jézu we fe mi gu valé é zuomunu lɛ yé é léma:

² Sɛbɛgifemunu valé Farizimunu a Moizi paizannu nya.

³ Amalé, we faa lé wa fé ka lɛ, ’ka a ’ma ma, yé ’ka a kɛlɛ ma, naa, té ka tawo wolé tawobɛ zo lo. Woo we fé yé wo ’ka a kɛla lo.

⁴ Kɔné blɛn lé a sile ke tɔntɔn, wa dɔa mi bɛnu nwiin yé wo ’ka a va léé, ’wo bɛ boen mane a ma monomono lo.

⁵ Woo ’wolé we faa kɛla munu lé wo yele we gi. Woo sɛbɛwɔlɛ blɛn paan ’wo yarapɛla valé ’wo bɛ ma yé wolé sɔ lɛi nini a é torole;

⁶ é sɔ wo lɛ léé, ’wo blin zégéléénu si fɛti kɛlɛna yé é sɔ wo lɛ léé, ’wo nyana zi ’lɛ blinnu ta bazorokɔnnu gi;

⁷ munu wele wo va gɔrɔ la valé munu lé wo laale ’wozan, ’wozan, é sɔ wo lɛ.

⁸ Naa, ’kaa, té mi é ka laa ’ézan lo. Mi do kpen a kazan nya yé ka faa a ka ke bwenu nya.

⁹ Té ka mi do kpen laa, an ti, tɛrɛ la lo; ka Ti a do kpen, é a la gi.

¹⁰ Té mi é ka laa ’ézangɔné lo; kazangɔné a do kpen, Krist nya.

¹¹ Ka va mi blɛɛn ’é kɛlɛ ka wuozan nya ma.

¹² Mi lé ébo nwaan blɛn, wo dan a tua lɛ, yé mi lé é ébo tuaan, wo dan a nwa lɛ blɛn.

¹³ Sɛbɛgifemunu valé Farizimunu, bodrɔzannu, ka gale nyɔ. Ka Kazambale lé fla zi lɛ tan munu lee; kabozen, ka ’ka wɔrana lo, yé munu lé é sɔ ’bɛnu lɛ léé, ’wo wɔra, ka ’ka ’bɛnu wɔrale ana nyi sié lo.

¹⁴ Sɛbɛgifemunu valé Farizimunu, bodrɔzannu, ka gale nyɔ. Ka gyɛzaralomu lé kɔnnu sié, ’té ka dabli ba grɔgrɔ zoroan, bɛwemalé we lé é mini gwɛn ta, ka dan a ye lɛ.

¹⁵ Sɛbɛgifemunu valé Farizimunu, bodrɔzannu, ka gale nyɔ. Ka giéan wɛyi valé tɛrɛ faa la mi do kɛlɛle kazé bazorozan nya we gi; yé dé é kɛlɛ a nya, ka a kɛla jéɛna kyɛ vazan nya gɔnɔ fié é mini kazé ta.

¹⁶ ’Kaa zilɛzannu lé ka yuɛ ke é ’wiile, ka gale nyɔ. Ka léé: Dé mi Balebangikɔn ’nyɔɔn, ’bɛ ’ka we do nya lo; naa, dé mi Balebangikɔn gi kyan ’nyɔɔn, ’té ’bɛ ɛ ke bale ’nyɔɔnle boen nya.

¹⁷ ’Tugyɛzannu, yuɛwiizannu. Kyan koo, Balebangikɔn lé éé kyan ’lɛ dɔa koo, a kyɛnzan lé we ɛ ke blɛɛn?

¹⁸ Ka lé é ziin léé: Dé mi balebanna ’nyɔɔn, ’bɛ ’ka we do nya lo; naa, balebanfɛ lé é ke balebanna ta, dé mi ’bɛ ’nyɔɔn, ’té ’bɛ ɛ ke bale ’nyɔɔnle boen nya.

¹⁹ Yuɛwiizannu. Balebanfɛ koo, balebanna lé éé balebanfɛ ’lɛ dɔa koo, a kyɛnzan lé we ɛ ke blɛɛn?

²⁰ Mi lé é balebanna ’nyɔɔn, é balebanna valé é tafɛnu ’nyɔɔn,

²¹ yé mi lé é Balebangikɔn ’nyɔɔn, é Balebangikɔn valé ézan ’nyɔɔn;

²² yé mi lé é la ’nyɔɔn é Kazambale lé webleblin valé é tazan ’nyɔɔn.

²³ Sɛbɛgifemunu valé Farizimunu, bodrɔzannu, ka gale nyɔ. Zian va blaanu mant koo, anɛt koo, kumɛn koo, ka wo vuzan no, yé we lé é ke blɛn é mini wo ta bélidɔwe gi, ka ’bɛ voo ka bɛ zuo; we tegele kɛlɛle koo, nyanai zénle koo, yarapale we ta koo, woo lé ka wo voo ka bɛ zuo. É a lé ka ’bɛnu é kɛlɛ, yé té ka a vininzannu vo ka bɛ zuo lo.

²⁴ ’Kaa zilɛzannu lé ka yuɛ ke é ’wiile, ka kɔnnéné sié minifɛ va, ’té ka nyɔgɔmé minié.

²⁵ Sɛbɛgifemunu valé Farizimunu, bodrɔzannu, ka gale nyɔ. Ka ’yiminikana valé fɛblekana lala folié, ’té wo gi a é fanle glawe valé mibo lé sɔlɛwe kɛlɛle nya.

²⁶ Farizimi yuɛwiizan. ’I ’yiminikana valé fɛblekana gi foli é vinin, yé a lala é dan kɛlɛ lɛ é zima.

²⁷ Sɛbɛgifemunu valé Farizimunu, bodrɔzannu, ka gale nyɔ. Ka a bélé mi vunnu lé wo tɔrɛ fu gié wo ma, a zo. Wo ma a é nɔnɔmi yé wo gi a é fanle migale wɔlɛnu valé fɛ naané gɔnɔ faa nya.

²⁸ Ka é ziin, ka a tegele mi yuɛ gi, naa, ka gi a é fanle bodrɔle valé weple nya.

²⁹ Sɛbɛgifemunu valé Farizimunu, bodrɔzannu, ka gale nyɔ. Ka fɛ dɔa balelayezannu vun ta yé ka mi tegelenu vun guru ma nyɔɔ gya,

³⁰ yé ka léé: Dé é vo léé, ko a tɛrɛ la ko tranu bléyi va, ’té ko ’ka paan wo va balelayemunu nyɛ zanana lo.

³¹ ’Bɛ zo lé ka kɛlɛ kabo lé wenayezannu nya léé, ka a balelayemunu gyɛzannu kululazannu nya.

³² ’Ka ka tranu kɛlɛwe pɔné lɛ sɔɔ ma.

³³ Ménénu, ménénwunnu bɛn, ka kɛla kaa yé ka ’ka dan kle ble lɛ jéɛna kyɛ va loo?

³⁴ Bɛwemalé, balelayezannu koo, wedɔɔzannu koo, sɛbɛgifemunu koo, maa wo paan ka lɛ zia. Ka dan wo va mi kenu gyɛ lɛ, ka dan wo va mi kenu gyɛ lɛ yili la, ka dan a kenu bla lɛ plén nya kalé bazorokɔnnu gi, yé ka dan nyané pa lɛ wo ta yé wo ’ka dan flinna ye lɛ ka lee fla do kpen ta lo,

³⁵ weanwiinlomunu nyɛ faa lé munu a zana tɛrɛ la, a we dɔle ka nwiin we gi; é sia mi tegele Abɛl ma fɔɔ yé é bɔ Barasi be Zakari lé ka a gyɛ Balebangikɔn valé balebanna worona bɛ, a ma, wo nyɛ lé é zana, a we a ka nwiin.

³⁶ Wo dan ’bɛ wenu faa dɔ lɛ bléyi ’ko vamunu nwiin. Maa fe ka lɛ.

Jézu wuvɔ Jérusalɛm ta

³⁷ Jérusalɛm munuoo, Jérusalɛm munu, ka lé ka balelayemunu gya, ’té munu lé maa wo paan ka lɛ zia, ka wo gya gɔlɛ nya, gɔnɔ kiɛre nya maa a a va léé, maa ka wɔra an va, bélé fɛan zo lé mane tina élé nénu wɔraan ’é bɛa wuo, a zo, yé ka ’ka a nyi si lɛ lo.

³⁸ Ka ye, kalé kɔn é dan vo lɛ ka lɛ é koro nya;

³⁹ naa, maa lé ka lɛ léé, ka ’ka dan an ye lɛ é dɛrɛ lo fɔɔ ’té ka fe é wo léé: Mi lé é dan Mizambale tɔ nya, a drɔɔ ’é vo ma.