Matio 22 - Kazambale lé Sebe Sauunu 1979

Lesina fɛti ma gɔnévɔle

¹ Jézu we fe wo lɛ é ziin gɔné vɔle nya, yé é léé:

² Kazambale plale mi nwiin a bélé minwiinzan lé, é ’é be lé lesile lé fɛti kɛlɛ, a zo.

³ Munu lé é wo laa fɛti kɛlɛle ma, é wuomunu nwunvɔ wo laana léé, ’wo da. Naa, wo ’ka a va léé, ’wo da lo.

⁴ É wuomunu bɛnu nwunvɔ é ziin yé é léé: ’Ka fe munu lé an wo laa, wo lɛ léé: Fɛnu ma’lɛrɛle nyaa; anlé dirigɔnénu valé wi nyɔnɔ?-?zannu, an wo gyɛ; fɛ faa ma’lɛrɛle nyaa, ’ka da lesile lé fɛti kɛlɛ.

⁵ ’Bɛ we ’ka wo yuɛ gi bɔ lɛ lo yé wo go; a do go élé féi, yé a do go élé yaawo lɛ,

⁶ yé mi pɔnénu minwiinzan wuomunu kun yé wo wo sɔnɔ yé wo wo gyɛ.

⁷ Minwiinzan bli fli yé é sunyanu nwunvɔ yé wo migyɛmunu ’konu gyɛ yé wo wolé fla kyɛ ble.

⁸ Yé é lé é wuomunu lɛ léé: Lesile lé fɛti ma’lɛrɛle nyaa, yé munu lé maa wo laa, a yara ’ka wo yara léé, wa ble é dɛrɛ lo.

⁹ ’Ka go zi blannu ta yé munu faa lé ka wo ye, ’ka wo faa laa lesile lé fɛti kɛlɛle ma.

¹⁰ A wuomunu ’konu go zinu ta yé munu faa lé wo wo ye, mi naanénu valé mi zinnu, yé wo da wo nya yé lesina fɛtikɛlɛkɔn fan fɛtikɛlɛmunu nya.

¹¹ Minwiinzan da fɛtikɛlɛmunu nagini lɛ, yé é mi do ye, ’té lesina fɛti kɛlɛ varɔ ’ka a ta lo.

¹² É lé a lɛ léé: An béé, é kɛlɛ kaa yé i wɔra ’ko, ’té lesina fɛti kɛlɛ varɔ ’ka i ta loo? Mi ’ko lɔlu lɛ vo é tanle.

¹³ Minwiinzan lé é wuomunu lɛ léé: ’Ka a bɛ valé a gane yere yé ’ka a vuli béera gununu va, fɛana lé woo wuvɔa ’té woo suiɛ la blé, ana.

¹⁴ Munu lé wo wo laa, wa kiɛre, naa, munu lé woo wo sié a va, wo ’ka kiɛre lo.

Gɔɔli banwole Sézaa lɛ

¹⁵ Yé Farizimunu go yé wa kwa kulina wo méléna léé, ’wo dia Jézu zi yé abo dére a kun we nya.

¹⁶ Farizimunu ’wozé munu valé Érɔd zuo munu nwunvɔ a va yé ’bɛnu lé a lɛ léé: Kozan, ko a gi dɔɔ léé, i wezen fé yé i Kazambale lé zi ta tawole paan munu gi webozen yɛrama; mi bɛnu lé we ’ka i yuɛ gi bɔa lo, yé i ’ka mi naginian é kɔlɛ ma lo.

¹⁷ Naa, é dɔ i gi kaa? A se a munu lɛ léé, ’wo gɔɔli banwo Sézaa lɛ laa, té wa banwo loo? ’Bé fe ko lɛ.

¹⁸ Jézu wo bli naané dɔɔ yé é léé: Bodrɔzannu, mɛmalé ka an gi daan?

¹⁹ Gɔɔli lé woo gɔɔli banwoo a nya, ’ka a gɔɔn an lɛ. Yé wo dénié do nɔ a lɛ.

²⁰ É a laa wo lee léé: Foto ’ko valé sɛbɛ gyɛle ’ko, de zé léé?

²¹ Wo léé: Sézaa zé lé. Yé é lé wo lɛ léé: Amalé ’ka Sézaa zé fɛ nɔ Sézaa lɛ yé ’ka Kazambale zé fɛ nɔ Kazambale lɛ.

²² We lé é a fe wo lɛ, é wo gi vuru yé wo si a va yé wo go.

Wo mi nwale gale va lé we laa Jézu lee

²³ Juifinu palu do ana, woo wo laama Sadusémunu, wo léé: Mi ’ka nwaan gale va lo. Yee yi duo nya, wo da Jézu va yé wo we laa a lee léé:

²⁴ Kozan, Moizi léé, dé mi do ga yé alé né ’ka lo, a zuané a zarale si ma, yé ’é ’é bwe kulu bɔra.

²⁵ Naa, ko va na, mi do be a gɔné sɔrafié. A vininzan le si yé é ga, yé a kulu ’ka vo lɛ a pa gi lo, amalé a na vo a zuané lee.

²⁶ Yee we duo kɛlɛ a fiézan lɛ, yé yee we duo kɛlɛ a yaazan lɛ, fɔɔ yé é bɔ a sɔrafiézan ma.

²⁷ Wo faa ga yé lezan ga é voéla.

²⁸ Gamunu nwabléyi va ’naan, lezan é dan kɛlɛ lɛ mi sɔrafié ’ko va mi kyɛn ɛ na nyaa? Wo faa na lé ke a nya é kyɛn.

²⁹ Jézu lé wo lɛ léé: Ka ’ka Kazambale lé sɛbɛnu dɔɔa lo, yé ka ’ka Kazambale lé plɛplɛ dɔɔa lo, amalé ka saan.

³⁰ Gamunu nwabléyi va gɔnénu ’ka dan le si lɛ lo, yé lomu ’ka dan bo si lɛ lo, naa, wo dan kɛlɛ lɛ bélé lanjenu lé ke la gi, wo zo.

³¹ Dé é a gamunu nwale lé we nya, we lé Kazambale a fe ka lɛ, ka ’ka tan ’bɛ ta fe lɛ sɛbɛ gi loo?

³² É léé: Abraam koo, Izak koo, Jakɔb koo, maa a wolé Bale nya. Dé Kazambale a fe léé, ’é a mi do lé Bale nya, ’té azan a é yuɛma. Dé é gaoo, é a é yuɛma duowo.

³³ Mi gu lé wa ’wo tɔné dɔna, wo gi vuru Jézu lé wepaale ma.

Bélidɔwe blɛnzan

³⁴ Farizimunu a ’ma aan wo léé, Jézu Sadusémunu lɔlu ga, wo zén ékeva,

³⁵ yé wo va mi do lé ke bélidɔwedɔɔzan baba nya, é we do laa Jézu lee, a gi danle we gi; é léé:

³⁶ Kozan, bélidɔwe faa va na, a kyɛnzan ɛ ke bélidɔwe blɛn nyaa?

³⁷ Jézu a zi pa a lɛ léé: ’I Mizan, izé Bale, lɔrɔ pa i bli faa koo, i boen faa koo, i gi bɔrɔle faa koo, wo nya.

³⁸ Yee ɛ ke bélidɔwe vininzan valé a blɛn nya.

³⁹ Yé a fiézan lé é ke bélé yee zo, yee lo: ’I bɔluzan lɔrɔ pa bélé biibozen zo.

⁴⁰ Bélidɔwe faa valé balelawefele éé sié bélidɔwe fié ’ko ɛ va.

Jézu laale David be

⁴¹ Farizimunu a é zénle aan wo ékeva,

⁴² Jézu we laa wo lee léé: Krist lé we dɔ ka gi kaa? É a de ɛ be nyaa? Wa zi pa léé: David be lé.

⁴³ Jézu lé wo lɛ léé: É kɛlɛ kaa yé Kazambale Léli David nyunu yé é a laa ézaan? Naa, David léé:

⁴⁴ Mizambale lé anzan lɛ léé: ’I nyana an bɛyila Fɔɔ yé maa i nyanézannu pla i wuo.

⁴⁵ Dé David Krist laa ézan, ’naan, é kɛlɛ kaa yé Krist kɛlɛ David be nyaa?

⁴⁶ A zi pa dére ’ka ye lɛ wo va mi do kpen lee lo. É sia yi ’ko ma é ’ka dɔ lɛ mi do kpen gi léé, ’é we laa a lee é dɛrɛ lo.