Matio 21 - Kazambale lé Sebe Sauunu 1979

Jézu wɔra Jérusalɛm minwiinzan nya

¹ Wo bɔ Jérusalɛm sɔnɔ yé wo bɔ aan wo Bɛtfajé, Ɔlivi gɔ ma zia, Jézu é zuomunu fié nwunvɔ yé é lé wo lɛ léé:

² ’Ka go fla lé é ke ka ’lɛ bɛ, a ta. Dé ka bɔ tɔɔn, ka dan sokofale tina ye lɛ, é polu nya é dɔle, ’té alé né a a va; ’ka wo polu so yé ’ka da wo nya an lɛ.

³ Dé mi do we laa ka lee, ’ka fe léé: Mizan mawe a wo gi. Tɔɔn, é dan a fe lɛ léé: Eɛ, ’ka goan.

⁴ We ’ko bɔ, we lé balelayezan a fe, a lɛsɔɔle we gi. É léé:

⁵ ’Ka fe Siɔn munu lɛ léé: Ka ye, ka nwiinzan da ka va É gi drɔɔ nya, ’té é a é nyanale sokofale tina ta, Kɔnésiwi lé né ta.

⁶ A zuomunu go yé we lé Jézu a fe, wa kɛlɛ.

⁷ Wo da sokofale tina valé ’é né boroné nya, yé wo ’wolé sɔnu pla wo punu, yé Jézu nyana a ta.

⁸ Mi gu blɛn ’wolé sɔnu fwila zia; mi pɔnénu yilibɛnu yéli yé wa zana zia.

⁹ Mi gunu lé wo ke tawona Jézu ’lɛ, é valé munu lé wo ke tawona a zuo, wo siaa léé: David Be, ozana! Mi lé é da Mizambale tɔ gi, a drɔɔ ’é vo ma. Lai loru munu, ’ka siaa mi, ozana!

¹⁰ É bɔra Jérusalɛm yé fla bɔ gyɛ yé wo léé: De ɛ ke mi ’ko nyaa?

¹¹ Mi gunu léé: Balelayezan Jézu lé; é si Nazarɛt, Galilé tɛrɛ la.

Jézu Balebangikɔn ’lɛrɛ

¹² Jézu wɔra Balebangikɔn gi yé é fɛdanmunu valé fɛlɔmunu bɔra Balebangikɔn gi. É gɔɔli tavɔɔmunu lé tablénu zana a gi yé é plawuoné danmunu lé blinnu yara bua.

¹³ Yé é lé wo lɛ léé: É a é gyɛle Kazambale lé sɛbɛ gi léé: Wo dan anlé kɔn laa lɛ bazorokɔn. Yé ka a kɛlɛ kyeenwozannu yɔɔkɔn nya.

¹⁴ Yuɛwiizannu valé tunbozannu bié a va Balebangikɔn gi yé é wo béli.

¹⁵ Balebanmunu segelenu valé sɛbɛgifemunu, dé wo alé we blɛn kɛlɛle ye, ’é valé nunukénénénu lé woo siaan Balebangikɔn gi léé: David Be, ozana, wo bli fli.

¹⁶ Wo lé a lɛ léé: We lé wa fena, bé ’maa? É lé wo lɛ léé: Iin. É a é gyɛle Kazambale lé sɛbɛ gi léé, bii a fe léé, nunukénénénu valé nyɔmanénu ’é tɔ zin fe. Ka ’ka dére ’konu ta fe lɛ Kazambale lé sɛbɛ gi loo?

¹⁷ É wo vo bɛ, yé é si fla yé é go Bétani, yé é yii ’bɛna.

Jézu bale pa bɔrɔyili ma

¹⁸ É bladi Jézu a gona aan wo Jérusalɛm, ’té lɔrɔ a a gyɛna.

¹⁹ É bɔrɔyili ye zi ma yé é bié a ma, naa, a laa saa lé é a ye a nwiin, yé é lé a lɛ léé: Té i poro é baa é dɛrɛ monomono lo ma. Tɔɔn bɔrɔyili ga.

²⁰ A zuomunu ’bɛ ye aan wo, wo gi vuru yé wo léé: É kɛlɛ kaa yé bɔrɔyili ga bléyi do kpen nyaa?

²¹ Jézu lé wo lɛ léé: Maa lé ka lɛ webozen nya léé, dé ka bli ’ka kɛlɛ lɛ fié lo, dé ka bli pa a gi, we lé maa a kɛlɛ bɔrɔyili lɛ, yee duo lé ka dan a kɛlɛ lɛ, yé é ziin, dé ka fe gɔ ’ko lɛ léé: ’I si ’ko, yé ibo vuli wɛyi va, é dan a kɛlɛ lɛ a zo.

²² Yé fɛ faa lé ka laan bazorole nya, dé ka bli vo a yele lɛ, ka dan a ye lɛ.

Wa laa Jézu lee léé: De ɛ se kɛlɛ i lɛɛ?

²³ Jézu go Balebangikɔn gi yé é a we paana aan wo munu gi, Balebanmunu segelenu valé mi segelenu da yé wo lé a lɛ léé: Se kaa nya lé i we ’konu kɛlaa? Yé mi kyɛn ɛ se ’ko kɛlɛ i lɛɛ?

²⁴ Jézu lé wo lɛ léé: Maa dan we do laa lɛ ka lee, yé dé ka a zi pa an lɛ, sean nya lé an we ’konu kɛla, maa dan a fe lɛ ka lɛ.

²⁵ De ɛ Jan nwunvɔ munu batizéwonaa? Kazambale lé laa, munu léé? Yé wo ’wo va we ble yé wo léé: Dé ko fe léé, Kazambale ɛ a nwunvɔ, é dan a fe lɛ léé: Mɛmalé ka ’ka bli vo lɛ a lɛ loo?

²⁶ Yé dé ko fe léé: Munu ɛ a nwunvɔ, ko kana mi gu lee. Naa, wo faa éé Jan yé balelayezan nya.

²⁷ Yé wa zi pa Jézu lɛ léé: Ko ’ka a gi dɔɔa lo. Yé Jézu lé wo lɛ léé: Maa é ziin, sean nya lé maa we ’konu kɛla, maa ’ka dan a fe lɛ ka lɛ lo.

Mi do be fié lé we

²⁸ É dɔ ka gi kaa? Mi do be a fié. É lé a vininzan lɛ léé: Anlé né, ’i go nyanama pa kyɔ anlé dɔrɔféi.

²⁹ É léé: Maa ’ka gona lo. A zuo é bli nɔla yé é go.

³⁰ Wo ti go a fiézan va yé é dére duo fe ’bɛ lɛ; yé ’bɛ léé: An ti, maa ’ma, yé ’bɛ ’ka go lɛ lo.

³¹ Woo mi fié ’ko, a kyɛnzan ɛ é ti lé blibɔmawe kɛlɛɛ? Wa zi pa léé: A vininzan lé. Yé Jézu lé wo lɛ léé: Maa lé ka lɛ webozen nya léé, vagɔɔlisimunu valé gɔnéginilomu é dan wɔra lɛ Kazambale lé fla ka ’lɛ.

³² Jan da aan wo zi tegele gɔɔn lɛ ka lɛ, yé ka ’ka bli vo lɛ a lɛ lo. Naa, vagɔɔlisimunu valé gɔnéginilomu wo bli vo a lɛ. Yé ka ’bɛ ye, yé a zuo ka ’ka ka bli nɔla lɛ yé ka bli vo a lɛ lo.

Dɔrɔféi ma gɔnévɔle

³³ ’Ka tɔné dɔ gɔné do vɔle lɛ é ziin. Gɔnézan do ana, kɔnzan lé, yé é dɔrɔféi pa. É gɔrɔ bo a zi, yé é dɔrɔ borona kɛlɛ, yé é dɔtafɛ kɛlɛ féi naginile we ma. A zuo é a bɛ pa féinwiinzannu lee, yé é si tɛrɛ ’ko la.

³⁴ Dé dɔrɔporo sobléyi pa é ’é wuomunu nwunvɔ élé féinwiinzannu va élé féi dɔrɔporo sile we ma.

³⁵ Yé féinwiinzannu a wuomunu kun yé wa do bla yé wa do gyɛ, yé wa yaazan gyɛ gɔlɛ nya.

³⁶ Yé é ’é wuomunu pa é ziin zia kiɛre é mini a vininnu ta yé féinwiinzannu yee we duo kɛlɛ ’bɛnu lɛ é ziin.

³⁷ É voéla yé é ’é be nwunvɔ wo va yé é léé: Wo dan an be lɛdɔ lɛ a ma.

³⁸ Féinwiinzannu a be ye aan wo, wo lé ’wo ke lɛ léé: A zarablezan lé é ke ’ko. ’Ka da, kaa a gyɛ, yé a zara ’é vo kaa lɛ.

³⁹ Yé wa kun, wo goan féi gini ma yé wa gyɛ.

⁴⁰ Sin, dé dɔrɔféizan da, é dan mɛ ɛ kɛlɛ lɛ féinwiinzannu ’konu lɛɛ?

⁴¹ Wo lé a lɛ léé: É dan munu naané ’ko gyɛ lɛ zamaga naané nya yé é dan mi bɛnu kɛlɛ lɛ dɔrɔféinwiinzannu nya, wo lé wo dan féimafɛ nɔ lɛ a lɛ a poro sobléyi va, woo lé.

⁴² Jézu lé wo lɛ léé: Dére lé wa gyɛ Kazambale lé sɛbɛ gi, ka ’ka tan a ta fe lɛ monomono loo? Wo léé: Gɔlɛ lé kɔndɔmunu sɔn vɔ a ma, É kɛlɛ kɔnsungɔlɛ nya. We ’ko si Mizambale va, Yé é a givuruwe nya ko yuɛ gi.

⁴³ Amalé, maa lé ka lɛ léé: Kazambale é dan élé fuatɛrɛ si lɛ ka lee, yé é dan a nɔ lɛ bɛn bɛ lé, ’bɛ é dan a ma tɔnɔ nɔ lɛ a lɛ, ’bɛ lɛ.

⁴⁴ Mian é dia gɔlɛ ’ko ta, azan é dan faa lɛ, yé mian gɔlɛ ’ko dia a ta, azan é dan wii lɛ.

⁴⁵ Wo gɔné ’konu vɔle ’ma aan wo, Balebanmunu segelenu valé Farizimunu a ’ma léé, Jézu a ’wo ɛ ma we fena,

⁴⁶ yé wa kwa kulina léé, ’wa kunwo; naa, mi gu a yé balelayezan nya, amalé wa kanana ’bɛnu lee.