Matio 20 - Kazambale lé Sebe Sauunu 1979

Dɔrɔféi lé nyanamapamunu

¹ Kazambale plale mi nwiin a bélé kɔnzan lé é bɔra bladi nyanamapamunu sile we ma, yé wo nyanama pa alé dɔrɔféi, a zo.

² Wo dére kɛlɛ do léé, yi do dénié do, yé é wo pa zia élé dɔrɔféi.

³ É bɔra é ziin bladi yiri plɛplɛ nya yé é mi bɛnu ye é dɔle vuun la é pla.

⁴ É lé wo lɛ léé: ’Kaa é ziin, ’ka go anlé dɔrɔféi, yé maa dan ka gooli pa lɛ tegele.

⁵ Yé wo go ’bɛna. É bɔra é ziin é yiéyi valé yiri tɛnla bléyi va yé é yee we duo kɛlɛ.

⁶ É bɔra é nyanadi yiri zɔrɔ nya, yé é mi bɛnu ye é dɔle vuun la é ziin yé é lé wo lɛ léé: Mɛmalé ka dɔ ’ko bladi fɔɔ yé nyanadi pa a zo yé ka ’ka we do kɛlɛna loo?

⁷ Wa zi pa a lɛ léé: Mi do kpen ’ka ko si lɛ lo, amalé. É lé wo lɛ léé: ’Kaa é ziin, ’ka go anlé dɔrɔféi.

⁸ Nyandi pa aan wo, dɔrɔféizan lé élé nyanamapamunu nwiinzan lɛ léé: ’I nyanamapamunu laa yé ’i wo gooli pa. Bé pélisia a voélazannu ta yé bé ’wuo pla a vininzannu ta.

⁹ Munu lé wo go nyanadi yiri zɔrɔ nya, wo da, yé é wo gooli pa dénié do do nya.

¹⁰ A zuo, a vininzannu da yé é dɔ wo gi léé, wo dan ’wozé taa pa lɛ, yé woo é ziin é dénié do do nɔ wo lɛ.

¹¹ Wa ye aan wo, wo gun gyɛ kɔnzan ma, yé wo léé:

¹² Mi voélazannu ’ko, wo nyanama pa lɛrɛ do kpen nya yé ko, ko wɔlɛi nyaa ko ma nyanama pale nya yi do yiri la yé i ko faa lé gɔɔli kɛlɛ doo?

¹³ É a zi pa wo va mi do lɛ léé: An béé, maa ’ka wenyané kɛlɛ lɛ i lɛ lo. Ko ’ka ko dére pa lɛ ékema i nya yi do dénié do, loo?

¹⁴ ’Izé sia, ’i go. É sɔ an lɛ léé, maa a voélazan ’ko zé nɔ bélé izé zo.

¹⁵ Fɛ lé é ke anzé nya ’naan, dé é sɔ an lɛ léé, maa kɛlɛ a nya fɛan zo, maa kɛla loo? Maa wezin kɛlɛ wo lɛ amalé i a maawona wo maa?

¹⁶ ’Ko zo lé mi voélazannu é dan kɛlɛ lɛ mi vininzannu nya, yé mi vininzannu é dan kɛlɛ lɛ mi voélazannu nya.

Jézu é gale fale vɔ a gɔnɔ yaazan nya

¹⁷ Jézu a gona aan wo Jérusalɛm, é ’é zuomunu vu ta fié si é yɛrama yé é lé wo lɛ zia léé:

¹⁸ Kaa a gona Jérusalɛm yé wo dan maa blami Be pa lɛ Balebanmunu segelenu valé sɛbɛgifemunu lee. Wo dan ga dɔ lɛ an nwiin,

¹⁹ yé wo dan an nɔ lɛ bɛn bɛnu lɛ, wolé an ma we nanale koo, wolé an blale wɛsɛné nya koo, wolé an gyɛle yili ta koo, wo faa we gi, yé yi fié a yi yaazan nya an dan nwa lɛ gamunu va.

We lé Jak valé Jan a ma laa

²⁰ Zébédé benu bu valé ’é benu bié Jézu ma yé wo bu dia é bli la Jézu ’lɛ, we do laale a lee we gi.

²¹ Jézu lé a lɛ léé: Mɛ fɛ ɛ sɔ i lɛɛ? Yé lezan lé a lɛ léé: An be fiénu ’ko, dé i nyana minwiinzan nya ilé fuatɛrɛ la, ’i a do nyana i bɛyila yé bé do nyana i bɛbola.

²² Jézu léé: We lé ka a laa an lee, ka ’ka a gi dɔɔa lo. Kana lé an dan ’yi mini lɛ a gi ’naan, ka bɔalɛ léé, ka ’yi mini a gii? Wo lé a lɛ léé: Ko bɔalɛ.

²³ É lé wo lɛ léé: Webozen lé, ka dan ’yi mini lɛ anlé kana gi, naa, nyanale an bɛyila valé an bɛbola, ’bɛ nɔle ’ka sié an va lo. An Ti é dan a nɔ lɛ munu lé é a tadɔ wozé nya, wo ɛ lɛ.

²⁴ Mi vu ’bɛ ’ma aan wo, wo bli fli bwe fié ’ko ma.

²⁵ Naa, Jézu wo laa yé é léé: Ka gi dɔɔ léé, bɛnnu nwiinzannu a é plale wo nwiin plɛplɛ, ’té wo lé wo ke vanu nya wo va bɛ, woo mi planu kɛla ’wo wuozannu nya.

²⁶ É ’ka ’bɛ zo ka va lo. Naa, dé é sɔ miomian lɛ léé, ’é kɛlɛ ka nwiinzan nya, ’bɛzan ’é kɛlɛ ka wuozan nya ma;

²⁷ yé dé é sɔ miomian lɛ léé, ’é kɛlɛ ka zilɛzan nya, ’bɛzan ’é kɛlɛ kalé luu nya ma.

²⁸ ’Ko zo lé maa blami Be da. An ’ka da lɛ léé, munu an mawe kɛlɛ lo, an da munu mawe kɛlɛle we gi, ’bɛ valé an gale mi kiɛre tabofɛ nya we gi.

Yuɛwiizannu fié yuɛ fuo

²⁹ Wo si Jériko bléyian va, mi gu blɛn go Jézu zuo.

³⁰ Yé yuɛwiizannu fié a é nyanale zi péli ta. Wa ’ma aan wo léé, Jézu a giéna, yé wo siaa léé: Mizan, David Be, ’i nyanai zén ko ta.

³¹ Mi gu siaa wo ta léé, ’wo tadɔ, naa, wo siaa é ziin plɛplɛ léé: Mizan, David Be, ’i nyanai zén ko ta!

³² Jézu dɔ, yé é wo laa yé é léé: É sɔ ka lɛ léé, maa mɛ ɛ kɛlɛ ka lɛɛ?

³³ Yé wo lé a lɛ léé: Mizan, ’i ko yuɛ fuo ma.

³⁴ Jézu nyanai zén wo ta, yé é bɛ mane wo yuɛnu ma, yé ’bɛna tɔɔn wo yuɛ fuo yé wo go a zuo.