Matio 2 - Kazambale lé Sebe Sauunu 1979

Wedɔɔmunu da

¹ Wo Jézu yaa aan wo Bɛtléɛm, Judé tɛrɛ la, minwiinzan Érɔd bléyi va, yirinwanazia wedɔɔmunu da Jérusalɛm,

² yé wo léé: Né lé wa yaa Juifinu nwiinzan blɛn nya, é a kyɛɛn? Ko alé monéné ye yirinwanazia, amalé ko da a bɔ lɛ.

³ Minwiinzan Érɔd we ’ko ’ma aan wo, é gibɔrɔ pa yee valé Jérusalɛm munu faa ma.

⁴ Yé é Balebanmunu segelenu faa valé Juifinu lé sɛbɛgifemunu zén ékeva yé é we laa wo lee léé: Wo dan Krist yaa lɛ kyɛɛn?

⁵ Wo lé a lɛ léma: Bɛtléɛm, Judé tɛrɛ la, naa, we lé balelayezan a gyɛ, yee lé ke ’ko:

⁶ Yé bii Bɛtléɛm, Juda tɛrɛ la, I tɔ ’ka kiéné Juda fla blɛnnu méléna lo. Naa, bii ta lé wo dan minwiinzan yaa lɛ, Yee ɛ dan fɛblele nɔ lɛ anlé munu Izraɛl lɛ.

⁷ ’Bɛ zuo, Érɔd wedɔɔmunu laa kyeen gi, yé é we laa wo lee a gi ’male pɛnpɛn we ma léé, ka monéné bile ye bléyi kyɛn vaa?

⁸ ’Bɛ zuo yé é zi nɔ wo lɛ léé, wo go Bɛtléɛm, yé é léé: ’Ka go, ’ka né kiéné lé we gi laa tegele. Dé ka a ye, ’ka a fe an lɛ, yé maaboen é go an é bɔ.

^9-10 Wo minwiinzan dére ’ma faa yé wo go, yé monéné lé wa ye yirinwanazia, é kun tawole ma wo ’lɛ. Wo monéné ye aan wo, wo gi nana é baba. É tawo wo ’lɛ fɔɔ yé é bɔ fɛana lé né kiéné ke, a nwiin, yé é dɔ.

¹¹ Wo wɔra kɔn gi, yé wo né kiéné valé é bu Mari ye. Wo dia ’wo bli la a ’lɛ yé wa bɔ. ’Bɛ zuo yé wo ’wolé fɛwezan kɔné fuo yé kyan koo, lasikɔrɔpo koo, lia lé wa laama miré koo, wo wo nɔ a lɛ a blan nya.

¹² ’Bɛ zuo, Bale a fe wo lɛ nyɛ fla léé, té wo gié Érɔd vazia é ziin lo. Yé wo gié zi bɛ ’léé, yé wo go ’wolé fla.

Jozɛfunu fwi yé wo go Éjipiti tɛrɛ la

¹³ Wo go aan wo, bé ye, Mizambale lé lanje do bɔra Jozɛfu va nyɛ fla, yé é léé: ’I nwa. ’I né kiéné valé é bu si, yé ’i go vlan nya Éjipiti tɛrɛ la. ’I vo ana mi fɔɔ yé maa i laa. Érɔd é dan né kiéné gini lɛ, a gyɛle we gi.

¹⁴ Jozɛfu nwa, yé é né kiéné valé é bu si é béli yé é go Éjipiti tɛrɛ la.

¹⁵ É vo ana mi fɔɔ yé Érɔd ga, we lé Mizambale a fe balelayezan lɔlu nya, a lɛsɔɔle we gi. É léé: Maa an be laa, ’é si Éjipiti tɛrɛ la.

Érɔd nénu gyɛ

¹⁶ Érɔd a ye aan wo léé, wedɔɔzannu dabli kɛlɛ é lɛ, a bli fli é baba. É munu pa zia Bɛtléɛm valé é zi tɛrɛ faa la léé, négɔnénu lé wo lɛɛ bɔ fié, é valé wo lé wo lɛɛ ’ka tan bɔ lɛ fié lo, ’wo wo gyɛ, moné yi lé é a laa wedɔɔzannu lee, a yɛrama.

¹⁷ ’Ko zo lé, we lé balelayezan Jérémi a fe, a lɛ sɔɔ. É léé:

¹⁸ Wo dére ’ma Rama, Wuvɔlenu valé siaale plɛplɛnu nya; Rasɛl a ’élé nénu wuvɔna. Wo ’ka ana é dɛrɛ lo, Amalé é ’ka a va léé, wo ’é tɔrɔ paa lo.

Jozɛfunu fwi Éjipiti tɛrɛ la

¹⁹ Érɔd ga aan wo, Mizambale lé lanje do bɔra Jozɛfu va nyɛ fla Éjipiti tɛrɛ la,

²⁰ yé é léé: ’I nwa, ’i né kiéné valé é bu si yé ’i go i pa gi Izraɛl tɛrɛ la. Naa, munu lé é sɔ wo lɛ léé, ’wo né kiéné gya, wo ga.

²¹ Jozɛfu nwa, yé é né kiéné valé é bu si, yé é go Izraɛl tɛrɛ la.

²² Naa, é a ’ma aan wo léé, Akélaus a é plale Judé munu nwiin é ti Érɔd pa gi, yé é kana gole ma ’bɛna, naa, Bale a bɔn‐in kini nyɛ fla yé é go Galilé tɛrɛ la,

²³ yé é nyana fla do lé wa laama Nazarɛt, a ta, we lé balelayemunu a fe, a lɛsɔɔle we gi. Wo léé: Wo dan a laa lɛ Nazarɛtzan.