Matio 19 - Kazambale lé Sebe Sauunu 1979

We lé Jézu a fe le bɔrale lé we ma

¹ Jézu nyaa aan wo we ’ko fele nya, é si Galilé tɛrɛ la yé é go Judé tɛrɛ la Juudɛn yuu zi.

² Mi gu go a zuo, yé é gyɛgyɛmunu béli ’bɛna.

³ Farizimunu bié a gi danle we ma, yé wo léé: A se a gɔné lɛ léé, dé weowean kɛlɛ, é na bɔra ’bɛ we maa?

⁴ Jézu a zi pa wo lɛ léé: A pélisia bléyi va Fɛkɛlɛzan gɔné valé le kɛlɛ

⁵ yé é léé: Bɛwemalé gɔné é dan si lɛ é ti valé é bu va, yé é dan é péli vɔ lɛ é na va yé wo fiénu é dan kɛlɛ lɛ mi do kpen nya. Ka ’ka tan a ta fe lɛ sɛbɛ gi loo?

⁶ ’Bɛ zo lé, wo ’ka mi fié nya é dɛrɛ lo, wa sin mi do kpen ɛ nya. Fɛ lé Kazambale a pa ékema, té mi a si ékema lo ma.

⁷ Yé wo lé a lɛ léé: Naa, mɛmalé Moizi munu béli dɔ léé, ’wo lebɔrasɛbɛ gyɛ yé ’wo daan a maa?

⁸ Jézu a zi pa léé: Ka tɔné gi yuyu lé we ma lé Moizi zi nɔ ka lɛ léé, ka daan ka nanu ma, naa, a pélisia bléyi va é ’ka ’bɛ zo lo.

⁹ Maa lé ka lɛ léé, mian é é na bɔra, ’té dé é ’ka gɔné bɛ gini lɛ lo, yé é le bɛ si, ’té é le bɛ gini é na va.

¹⁰ Jézu zuomunu lé é lɛ léé: Dé gɔné valé é na lé we a ’bɛ zo, a fila vɔ léé, té wo le si lo.

¹¹ Jézu léé: Mi faa ’ka dére ’ko gi maan lo; wo lé Bale a gi ’male nɔ wo lɛ, wonu saa ɛ gi maan.

¹² Naa, miblale ke ana, wo bu wo yaa a zo; munu mi kenu kɛlɛ miblale nya, yé mi kenu wobo kɛlɛ miblale nya Kazambale lé plale mi nwiin lé we ma. Mian éé bɔa we ’ko gi ’male lɛ, ’é a gi ’ma ma.

Jézu nénu drɔɔ vo

¹³ Munu da nunukénénénu nya Jézu va, a bɛ plale wo ta yé ’é bazoro wo ma we gi. Naa, a zuomunu we ble munu lé ’bɛnu da nénu nya, ’bɛnu va.

¹⁴ Yé Jézu léé: ’Ka daan nunukénénénu ma ’wo da an va. Té ka wo dale an va yi ga lo; naa, munu lé wo ke bélé nénu zo, Kazambale a é plale wo ɛ nwiin.

¹⁵ Yé é bɛ pla nénu ta, yé é si ’bɛna.

Pɛniɛ lé ke fuablezan nya, alé we

¹⁶ Yé mi do bié yé é lé Jézu lɛ léé: Anzan, maa mɛ we zima ɛ kɛla yé an vo é yuɛma lɛɛfaama yé a glɛ ’ka dɔa loo?

¹⁷ Jézu lé a lɛ léé: Mɛmalé i we zima lé we ma laa an lee? Bale do kpen ɛ ke é zima. Dé é sɔ i lɛ léé, i vo é yuɛma, ’i bélidɔwenu kɛlɛ.

¹⁸ É lé a lɛ léé: A kyɛnzannu? Jézu léé: Té i mi gyɛ lo, té i le bɛ gini lo, té i kyeenwo lo, té i viéwo mi ma lo,

¹⁹ ’i ti valé i bu lɛdɔma, ’i bɔluzan lɔrɔ pa bélé biibozen zo, woo lé.

²⁰ Pɛniɛzan lé a lɛ léé: Maa we ’konu faa kɛlɛ. É a lé maa mɛ we ɛ kɛlɛ é ziin?

²¹ Jézu lé a lɛ léé: Dé é sɔ i lɛ léé, té gun do kpen é vo i ma lo, ’i go ilé fɛnu dan, bé ma fɛ nɔ nyanégyɛmunu lɛ, yé i dan fɛwezan ye lɛ la gi. Dé i nyaa a nya faa, ’i da an zuo.

²² Pɛniɛzan ’ko lé fɛnu a di, amalé é dére ’konu ’ma aan wo, é go é bli gi kyɛ dɔle nya.

²³ Jézu lé é zuomunu lɛ léé: Maa lé ka lɛ webozen nya léé, fuablezan plale Kazambale wuo a tɔntɔn.

²⁴ Maa lé ka lɛ é ziin léé, fuablezan plale Kazambale wuo a tɔntɔn é mini nyɔgɔmé wɔrale sɔ béé sééné yɛrɛ gi lɛ.

²⁵ A zuomunu ’bɛ ’ma aan wo, wo gi taa vuru wo ma yé wo léé: Naa, de ɛ bɔalɛ léé, é si we gii?

²⁶ Jézu wo nagini yé é lé wo lɛ léé: Munu ’ka bɔa a kɛlɛle lɛ lo, naa, Kazambale ɛ bɔa we faa kɛlɛle lɛ.

²⁷ Piɛri lé a lɛ léé: Yé ko nii? Ko daan fɛnu faa ma yé ko da i zuo. Mɛ fɛ lé ko dan a ye lɛɛ?

²⁸ Jézu lé wo lɛ léé: Maa lé ka lɛ webozen nya léé, a bléyi é dan bɔ lɛ yé ’wo fɛnu faa kɛlɛ é dɛrɛ; dé ’bɛ bléyi bɔ, dé maa, blami Be nyana anlé webleblin tɔbɔle ta, ka lé ka da an zuo, ka dan nyana lɛ webleblin vu ta fié ta, yé ka dan Izraɛl bɛn vu ta fié lé we ble lɛ.

²⁹ Dé miomian é daan élé fɛnu ma an tɔ lé we ma, dé alé kɔnnu léé, dé a bwenu léé, dé a burunu léé, dé a ti léé, dé a bu léé, dé a na léé, dé alé nénu léé, dé alé tɛrɛnu léé, dé miomian é daan fɛ ’konu ma an tɔ lé we ma, é dan wo lɛgi ye lɛ gɔnɔ yɔ soru, yé é dan vo lɛ é yuɛma lɛɛfaama a glɛ ’ka lo. Tɔnɔ lé é dan a ble lɛ, yee lé ke bɛ.

³⁰ Mi vininzannu kiɛre é dan kɛlɛ lɛ mi voélazannu nya, yé mi voélazannu kiɛre é dan kɛlɛ lɛ mi vininzannu nya.