Matio 18 - Kazambale lé Sebe Sauunu 1979

Mi kyɛn ɛ ke blɛn é mini é bɔluzannu taa?

¹ ’Bɛ bléyi va, Jézu zuomunu bié é va yé wo léé: Munu lé Kazambale ke é plale wo nwiin, wo va mi kyɛn ɛ ke mi blɛn nyaa?

² Jézu né kiéné do laa yé é a dɔ wo méléna yé é léé:

³ Maa lé ka lɛ webozen nya léé, dé ka ’ka ka bli nɔlaan lo, dé ka ’ka kinin‐é bélé né kiénénu zo lo, ka ’ka dan go lɛ Kazambale lé fla lo.

⁴ Bɛwemalé, mian ébo kɛlɛ kiéné bélé né kiéné ’ko zo, munu lé Kazambale ke é plale wo nwiin, yee ɛ ke wo va mi blɛn nya yé é mini mi faa la.

⁵ Yé dé miomian é né kiéné ’ko zo sié anlé we ma, ’té éé maabozen sié é ziin.

⁶ Naa, né kiénénu lé wo bli ke an lɛ, dé mi do wo va né do ’wuo sɛrɛ, ’bɛzan zé fila vɔ léé, ’wo fɛzɔngɔlɛ yere a bɔrɔ ma, yé wa vuli wɛyi wɔlɛ ma.

I kɔlɛvafɛ do lé i vɔle wenyané gi

⁷ We tɔntɔn ’é kɛlɛ tɛrɛlamunu lɛ diérawenu lé we ma. É a lé diérawenu é bɔ, naa, mian é da mi diérawe nya, we tɔntɔn ’é kɛlɛ ’bɛzan lɛ ma.

⁸ Dé i bɛ valé i gane i vɔ wenyané gi, ’i wo kini yé ’i wo vuli i ma baa; dé i vo é yuɛma la gi tunbozan valé bɛkinizan nya, ’bɛ fila vɔ é mini wolé i vulile i bɛ fié valé i gane fié nya kyɛ lé é ’ka dirian monomono lo, a va ta.

⁹ Dé i yuɛ i vɔ wenyané gi, bé bɔra a gi yé bé vuli i ma baa; dé i vo é yuɛma la gi i yuɛ do kpen nya, ’bɛ fila vɔ é mini wolé i vulile i yuɛ fié nya jéɛna kyɛ va ta.

’Bla sanle ma gɔnévɔle

¹⁰ ’Ka yuɛ pa kabozen va léé, té ka nénu ’ko va né do kpen ye boané nya lo; maa lé ka lɛ léé, wolé lanjenu a la gi mi, ’té an Ti lé é ke la gi, ’té wa yé yifaama.

¹¹ Naa, maa blami Be da fɛ sanle bɔra lɛ a gi.

¹² É dɔ ka gi kaa? Dé ’bla yɔ soru a mi do lee, yé a do san, é ’ka a yɔ ziɛn wɔlɛ vu ta sɔraziɛn voo gɔ nwiin, yé é go yee lé é san, a ginile we gi loo?

¹³ Yé dé é ’bɛ ye, a gi é dan nana lɛ ’bɛ lé we ma é minié a yɔ ziɛn wɔlɛ vu ta sɔraziɛn lé ’bɛnu ’ka san lɛ lo, ’bɛnu ta. Maa a fe ka lɛ.

¹⁴ A zo duo léé, ka Ti lé é ke la gi, é ’ka alé blibɔmawe nya léé, nunukénénénu va né do kpen ’é san lo.

Dé i bwe wenyané kɛlɛ

¹⁵ Dé i bwe wenyané kɛlɛ, ’i go we pla a lɛ ka fié méléna. Dé é i dére ’ma, ’té é kɛlɛ i bwe nya é pa gi.

¹⁶ Naa, dé é ’ka i dére ’ma lɛ lo, dé mi do léé, dé mi fié léé, ’ka go wo nya a va, we faa yuɛ gi bole we gi, dé wenayezan fié léé, dé wenayezan yaa léé, wo dére la.

¹⁷ Dé é ’ka wo dére nyi si lɛ lo, bé fe léglizigimunu lɛ; dé é ’ka léglizigimunu dére nyi si lɛ lo, ’é kɛlɛ i yuɛ gi bélé yolémi valé vagɔɔlisizan zo ma.

Fɛ yerele valé fɛ fuole

¹⁸ Fɛ faa lé ka dan a yere lɛ tɛrɛ la ’ko, wo dan a yere lɛ la gi, yé fɛ faa lé ka dan a fuo lɛ tɛrɛ la ’ko, wo dan a fuo lɛ la gi. Maa fe ka lɛ.

¹⁹ Maa lé ka lɛ é ziin léé, dé ka va mi fié bli kɛlɛ do fɛofɛan laale ma, an Ti lé é ke la gi é dan a nɔ lɛ wo lɛ.

²⁰ Dé é a mi fié nyaoo, dé é a mi yaa nyaoo, fɛana lé woo zén‐é ékeva an tɔ gi, maa ana wo méléna.

Mi wuozan lé é ’ka mi ma we voo lo, a ma gɔné vɔle

²¹ Piɛri bié a va yé é léé: Mizan, dé an bwe éé wenyané kɛla an lɛ, maa a ma we vo fɔɔ gɔnɔ nɔɔ? Gɔnɔ sɔra?-?fiéé?

²² Jézu lé a lɛ léé: Maa ’ka a fé i lɛ léé, gɔnɔ sɔrafié lo, naa, bé kɛlɛ sɔrafié sɔrafié gɔnɔ yɔ yaa wɔlɛ vu.

²³ Amalé Kazambale plale mi nwiin a bélé minwiinzan lé é sɔ a lɛ léé, ’é wuomunu élé gɔɔlinu nɔ ’é lɛ, a zo.

²⁴ Bléyian va lé é kun gɔɔli nɔnɔle ma, mi lé alé talan baa soru vɛɛn ke ’bɛ ma, wo da ’bɛzan nya a lɛ. Talan do a gɔɔli lé mi a yé lɛɛ yɔ do wɔlɛ soru nyanama ma, a nya.

²⁵ Fɛ do kpen ’ka aan wo gɔnézan lee vɛɛn banwofɛ nya lo, azan léé, ’wa dan, yee koo, a na koo, alé nénu koo, alé fɛnu faa koo, ’wo wo dan, ’élé vɛɛn banwole we ma.

²⁶ A wuozan ébo dia tɛrɛ va, yé é ’wuo wɔra a gane wuo yé é léé: Anzan, ’i bli kɛlɛ an ma tiéé ma, yé maa dan ilé fɛ faa banwo lɛ i lɛ.

²⁷ Yé azan nyanai zén a ta, yé é vɛɛn vo a ma é pla, yé é daan a ma yé é go.

²⁸ Wuozan ’ko bɔrale tɔɔn, wo kee é bɔluzan do nya, ’té alé dénié yɔ soru vɛɛn a ’bɛ ma. Dénié do a gɔɔli lé mi a yé yi do nyanama ma, a nya. É a kun é bɔrɔ ma, yé é léé: Anlé vɛɛn lé ke i ma, ’bé banwo.

²⁹ A bɔluzan dia a gane wuo, yé ’bɛ zanté vɔ a lɛ, yé ’bɛ léé: ’I bli kɛlɛ an ma tiéé ma, yé maa dan ilé fɛ banwo lɛ i lɛ.

³⁰ ’Bɛ ’ka sɔ lɛ a lɛ lo, yé é go a vɔ lɛ bokɔn gi fɔɔ, yé ’bɛ alé vɛɛn banwo a lɛ.

³¹ We lé é ke a kɛlɛna, a bɔluzannu a ye aan wo, wo bli kyɛ dɔ é baba, yé wo go a zuo faa fe lɛ ’wozan lɛ.

³² Yé wozan é wuozan ’ko laa, yé é lé a lɛ léé: An wuozan naané, i zanté vɔ an lɛ, bɛwemalé maa anlé vɛɛn faa vo i ma é pla.

³³ É ’ka lé i nyanai é zén é ziin i bɔluzan ta, fɛan zo lé an nyanai zén i ta, a zo loo?

³⁴ Yé azan bli fli, yé é a pa bokɔn ’léé sunyanu lee, fɔɔ yé vɛɛn faa lé ke a ma, é a banwo.

³⁵ A zo lé an Ti lé é ke la gi é dan a kɛlɛ lɛ ka lɛ, ’té dé ka faa ’ka ka bwenu ma we voo ka bli faa nya lo.