Matio 17 - Kazambale lé Sebe Sauunu 1979

Jézu dɔbɛ nɔla gɔ nwiin

¹ ’Bɛ zuo yi suiɛdo, Piɛri koo, Jak koo, é zuané Jan koo, Jézu wo si yé é go wo nya gɔ torole nwiin é yɛrama.

² A yara dɔbɛ nɔla wo yuɛ va, yé a yara bi nyananyana bélé yiri zo, yé alé sɔnu kɛlɛ fu tata bélé san zo.

³ Yé bé ye, Moizi valé Éli bɔra wo va yé wo vo glewona Jézu va.

⁴ Yé Piɛri lé Jézu lɛ léé: Mizan, kaa vole ’ko a é zima. Dé é sɔ i lɛ, maa dan ban yaa dɔ lɛ ’ko, izé do, Moizi zé do, yé Éli zé do.

⁵ É ke aan wo we fena, yé la fu tata do tua wo nwiin. Tɔɔn, Bale we fe la fu gi, yé é léé: Mi ’ko a an be lé é sɔ an lɛ é baba, a nya; a va sɔlɛle a an gi blɛn. ’Ka tɔné dɔ a lɛ.

⁶ A zuomunu dére ’ko ’ma aan wo, wo dia ’wo bli la yé kana blɛn zén wo gi.

⁷ Naa, Jézu bié, yé é bɛ mane wo ma yé é léé: ’Ka nwa, té ka kana lo.

⁸ Wo yara nwa loru yé wo Jézu do kpen ɛ ye.

⁹ Jézu valé ’é vamunu yaa ke aan wo gɔ zunna, Jézu a yi ga wo lee léé: Té ka yuɛzi ’ko lé we fe mi do kpen lɛ lo, fɔɔ ’té maa blami Be nwa ɛ wo gamunu va.

¹⁰ Jézu zuomunu we laa é lee léé: Mɛwemalé sɛbɛgifemunu léé, é a lé Éli é da é viniin?

¹¹ É a zi pa léé: Éli é dan da lɛ wezen nya, yé é dan fɛnu faa dɔ lɛ ’wo dɔbɛ gi é ziin.

¹² Naa, maa lé ka lɛ léé, Éli da turu, yé wo ’ka a dɔɔ lɛ lo, yé fɛan zo lé é sɔ munu lɛ léé, ’wa kɛlɛ, wa kɛlɛ a lɛ a zo. A zo duo lé maa blami Be, an dan nyané ble lɛ wo lee.

¹³ Yé a zuomunu a gi ’ma sin léé, é a mi batizéwozan Jan lé we fena ’wo lɛ.

Jézu glelalegyɛzan béli

¹⁴ Wo bɔ aan wo mi gu sɔnɔ, mi do da yé é powuo zun Jézu ’lɛ, yé é léé:

¹⁵ Mizan, ’i nyanai zén an be ta. Glelale vɔ a ’wuo gi, yé é a nyané blena kaii. Yé gɔnɔ kiɛre nya ’bɛ a diaan kyɛ valé ’yi va.

¹⁶ Maa da a nya i zuomunu lɛ yé wo ’ka bɔ lɛ a bélile lɛ lo.

¹⁷ Jézu léé: Bli paan lo munu, ziri zo bɛn, ka léé, an lɛɛ nɔɔ ɛ kɛlɛ ka va faa ’lɛ, yé ka bli é vo an lɛɛ? Ka léé, maa kɛlɛ kaa? ’Ka da a nya an va ze.

¹⁸ Jézu siaa yo ta yé é si né gi, yé né béli a bléyi duo nya.

¹⁹ Jézu zuomunu bié é va, ’té wa wo saa, yé wo we laa a lee léé: Mɛmalé ko ’ka bɔa lɛ yé ko yo ’ko si né gi loo?

²⁰ Jézu lé wo lɛ léé: Ka bli ’ka é pale tegele lo, amalé. Dé kalé blipale a bélé sénévéwɔlɛ do zo, ka dan a fe lɛ gɔ ’ko lɛ léé: ’I si ’ko yé ’i go mun, yé é dan a kɛlɛ lɛ; yé we do kpen ’ka dan ka kele lɛ lo. Maa fe ka lɛ.

²¹ Bazorole valé lɔrɔsɔnle saa nya lé yo gɔnɔ ’ko zo éé sié mi gi.

Jézu é gale fale vɔ é ziin

²² Wa giéna aan wo Galilé tɛrɛ la, Jézu lé wo lɛ léé: É a lé wo maa blami Be pa munu lee.

²³ Yé wo dan an gyɛ lɛ, yé yi fié a yaazan nya an dan nwa lɛ. Yé wo bli kyɛ dɔ é baba.

²⁴ Jézu valé é zuomunu bɔ aan wo Kapɛnaum, Bale lé kɔn ma gɔɔli lé ke drakémé fié nya, a simunu lé Piɛri lɛ léma: Izan ’ka drakémé fié banwoo loo? Piɛri léé: Éé a banwoo.

²⁵ Piɛri wɔra aan wo kɔn gi Jézu we fe é vinin yé é léé: Simɔn, é dɔ i gi kaa? Tɛrɛ la minwiinmunu, wo fɛ ban valé vagɔɔli sié denu lee? Wobo lé tɛrɛlamunu lee laa, bɛnnu lee?

²⁶ Piɛri lé a lɛ léé: Wa sié bɛn bɛnu lee. Jézu lé a lɛ léé: ’Té wolé tɛrɛlamunu a é pla.

²⁷ Naa, té kolé we é ’na wo ma lo we gi, ’i go wɛyi va, ’i kɔ vɔ ’yi va, yé pɔan é dan é vinin, ’bé gyɛ; ’bé ’léé fuo yé gɔɔli lé é dan ko fié zé banwo lɛ, i dan a ye lɛ. ’Bé si, yé ’bé nɔ wo lɛ maa valé bii zé nya.