Matio 16 - Kazambale lé Sebe Sauunu 1979

Munu tɔmase ma laa

¹ Farizimunu valé Sadusémunu bié Jézu va a gi danle we gi yé wo léé: ’I tɔmase do si ko lɛ la gi.

² Jézu a zi pa wo lɛ léé: É nyanadi, ka léé, la a sɔɔn amalé tɛlɛ é dan kɛlɛ lɛ é nɔnɔmi, yé bladi ka léé,

³ la a sɔɔn yé é a é tiéle, amalé lɛɛ é dan kyɔ. Ka la lé tɔmase dɔɔ yé ka ’ka bléyi bɔle lé tɔmasenu dɔɔa loo?

⁴ ’Kaa pɛnpɛnnégyɛmunu lɛrɛlɛrɛ ’ko, kaa ɛ tɔmase ma laan. Naa, maa ’ka dan tɔmase bɛ nagɔɔn lɛ ka lɛ lo fɔɔ, Jonas zé do kpen lé. A zuo é si wo va yé é go.

Farizimunu valé Sadusémunu lé lévɛn

⁵ A zuomunu a gona ’yi gɔɔn koɛ ma yé wo gi san yé wo ’ka go lɛ buru nya wo lee lo.

⁶ Yé Jézu lé wo lɛ léé: ’Ka yuɛ pa kabozen va é zima Farizimunu valé Sadusémunu lé lévɛn lé we ma.

⁷ A zuomunu vo we blena ’wo ke va yé wo léé: Ko ’ka buru si lɛ lo, amalé é a fe.

⁸ Jézu a ’ma aan wo, é léé: Bli pa tegele lo munu, mɛmalé ka a buru sile lé we blenaa?

⁹ Ka bɔn‐in ’ka tan ka ma loo? Mi baa fié wuru soru lé wo buru soru ble, yé ka a kurunu sia kyɛɛné vu ta fié, ’bɛ sele saan ka gii?

¹⁰ Mi baa fié lé wo buru sɔrafié ble, yé ka a kurunu sia kyɛɛ sɔrafié, ’bɛ sele saan ka gii?

¹¹ É kɛlɛ kaa, yé ka ’ka a gi ’ma lɛ loo? Maa ’ka buru lé we fena ka lɛ lo. Maa lé ka lɛ léé, ’ka yuɛ pa kabozen va Farizimunu valé Sadusémunu lé lévɛn lé we ma.

¹² Yé wa ’ma sin léé, é ’ka a fena léé, ’wo yuɛ pa wobozen va buru lé lévɛn lé we ma lo, naa, Farizimunu valé Sadusémunu lé we paale lé é ke a fena.

Piɛri Jézu ta bɔra

¹³ Jézu bɔ aan wo Sézaré Filip tɛrɛ la, yé é we laa é zuomunu lee léé: Maa blami Be, munu léé, maa a de nyaa?

¹⁴ Wa zi pa léé: Mi kenu léé, bii a mi batizéwozan Jan nya; yé a kenu léé, bii a Éli nya; yé a koɛnu léé, bii a Jérémi nya, dé ’bɛ kaan lo, ’té bii a balelayemunu va balelayezan do nya.

¹⁵ Yé é lé wo lɛ léé: Yé ka nii? Ka léé, maa a de nyaa?

¹⁶ Simɔn Piɛri a zi pa léé: Bii a Krist lé é ke Bale yuɛmale Be nya, a nya.

¹⁷ Jézu lé a lɛ léé: Jonas be Simɔn, izé a néné. Mi pla ’ka ’bɛ gɔɔn lɛ i lɛ lo, naa, an Ti lé é ke la gi, yee ɛ a nagɔɔn i lɛ.

¹⁸ Yé maa lé i lɛ léé, bii a Piɛri nya, yé gɔlɛ ’ko ta lé maa dan anlé léglizi dɔ lɛ yé gamunu nyanana lé plɛplɛ ’ka dan gié lɛ a ta lo.

¹⁹ Maa dan Kazambale lé fla lakléwɔlɛnu nɔ lɛ i lɛ: fɛ lé i dan a yere lɛ tɛrɛ la, wo dan a yere lɛ la gi, yé fɛ lé i dan a fuo lɛ tɛrɛ la, wo dan a fuo lɛ la gi.

²⁰ Jézu a yi ga é zuomunu lee plɛplɛ léé: Té ka a fe mi do kpen lɛ léé, maa a Krist nya lo.

Jézu é gale fale vɔ

²¹ É sia ’bɛ bléyi va, Jézu kun we gɔɔnle ma wo lɛ, yé é léé: É a lé an go Jérusalɛm, é a lé an nyané ble mi segelenu valé Balebanmunu segelenu valé sɛbɛgifemunu lee; é a lé wo an gyɛ yé yi fié a yaazan nya yé an nwa gamunu va.

²² Piɛri Jézu si wo va sɛ yé é we pla Jézu lɛ yara tɔntɔn nya yé é léé: Mizambale ’é ’bɛ yi ga ma, ’bɛ ’ka dan kɛlɛ lɛ i lɛ lo.

²³ Naa, Jézu nɔla yé é lé Piɛri lɛ léé: Satan, ’i gyɛ i zuo. I a a va léé, i an saan? Wenu lé i gi bɔrɔan ’bɛ nya bɛ, Kazambale zé ’ka ’bɛ zo lo, munu zé lé.

²⁴ Yé Jézu lé é zuomunu lɛ léé: Dé é sɔ mian lɛ léé, é da an zuo, ’é bli si ébozen lɛ yé ébo lé yiliblan sia yé ’é da an zuo.

²⁵ Naa, mian é sɔ a lɛ léé, é ’élé tɛrɛla kɛlɛ blɛn, é dan vuru lɛ a gi, yé mian é vuru we faa gi anlé we ma, ’bɛzan é dan ézé ye lɛ.

²⁶ Yé dé mi tɛrɛlafɛ faa ye, dé ébozen san, ’bɛ tɔnɔ lé ke mɛ fɛ nyaa? yé mi éé mɛ fɛ no ébozen pa gii?

²⁷ Maa blami Be, an dan da lɛ an Ti lé fua tɔbɔle nya, é valé alé lanjenu nya, yé maa dan mi faa gooli pa lɛ do do wo kɛlɛwenu yɛrama.

²⁸ Maa a fe ka lɛ webozen nya léé: Munu lé wo ke ’ko, wo va mi kenu ’ka dan ga lɛ lo fɔɔ yé wo maa blami Be ye dana plale munu nwiin we ma.