Matio 15 - Kazambale lé Sebe Sauunu 1979

Wo tranu lé gɔnɔlawe

¹ Farizimunu valé sɛbɛgifemunu si Jérusalɛm yé wo da Jézu va yé wo léé:

² Mɛmalé i zuomunu ’wo tranu lé gɔnɔlawe lɛgaan?-?maa? Naa, dé wa fɛ blena, wo ’ka ’wo bɛ ma folié lo.

³ É a zi pa wo lɛ léé: Yé ’kaa, mɛmalé ka Kazambale lé bélidɔwe lɛgaanma kalé gɔnɔlawe kɛlɛle nyaa?

⁴ Naa, Kazambale léé: ’I ti valé i bu lɛdɔma, yé dé mian é bale pa é ti valé é bu ma, ’wo ga dɔ a nwiin.

⁵ Naa, ka léé: Dé mi a fe é ti valé é bu lɛ léé: Gɔɔli lé an nɔ dan nɔ lɛ i lɛ, maa a nɔ Kazambale lɛ, ’té ’bɛzan ’ka é yerele bélidɔwe ’ko lé Kazambale a fe léé, i ti valé i bu lɛdɔma, a gi lo.

⁶ Amalé ka Kazambale dére kɛlɛ we pla nya gɔnɔlawe lé ka dɔ bɛ, alé we ma.

⁷ Bodrɔzannu. Ka ma we lé Ézai a fe balelawefele nya, é a webozen nya. É léé:

⁸ Munu ’ko, woo an tɔ bɔa ’wo lɔlu nya, Naa, wo bli a é sile an ma baa.

⁹ Woo an bɔa é pla, Yé woo gɔnɔlawenu paa munu gi bélé Bale lé bélidɔwenu ɛ ke ’bɛ nya.

Fɛnu lé woo mi tiri dɔa

¹⁰ ’Bɛ zuo é mi gu laa yé é lé wo lɛ léma: ’Ka tɔné dɔ yé ’ka we ’ma ma.

¹¹ Fɛ lé éé wɔraan mi ’léé, é ’ka mi tiri dɔa lo, naa, we lé éé bɔraan mi ’léé, yee ɛ mi tiri dɔa.

¹² Yé a zuomunu bié yé wo lé a lɛ léé: Bé gi dɔɔ léé, dérenu lé bé fe bɛ, é ’na Farizimunu maa?

¹³ Jézu a zi pa léé: Fɛ faa lé Lagi Ti ’ka a vɔ lɛ lo, wo dan wo soowɔla lɛ.

¹⁴ ’Ka wo vo. Wo ɛ ke yuɛwiizannu lé, wo ke yuɛwiizannu lé zigɔɔnzannu nya, wo nya. Dé yuɛwiizan zi gɔɔn yuɛwiizan lɛ, wo fiénu é dan vɔ lɛ guru gi.

¹⁵ Yé Piɛri lé a lɛ léé: ’I gɔné vɔle ’ko gi fe ko lɛ.

¹⁶ Yé Jézu léé: Ka é ziin, ka gi ’ka tan é kinile loo?

¹⁷ Ka ’ka a ’ma lɛ léé, fɛan éé wɔraan mi ’léé, éé goo a bɔn gi, a zuo éé goo fɛyɔɔna loo?

¹⁸ Naa, wenu lé éé bɔraan mi ’léé, éé sié mi bli gi yé yee ɛ mi tiri dɔa.

¹⁹ Gibɔrɔle naané koo, migyɛle koo, leginile valé gɔnéginile koo, pɛnpɛnnégyɛle koo, kyeenwole koo, viéwole mi ma koo, mi tɔ sɛrɛle koo, woo ɛ sié mi bli gi.

²⁰ Wenu lé woo mi tiri dɔa, wo lé ke bɛ. Naa, fɛblele ’é bɛ ma tiri nya, ’bɛ ’ka mi tiri dɔa lo.

Kanaan le lé blipale

²¹ Jézu si aan wo ’bɛna yé é go Tii valé Sidɔn tɛrɛ la.

²² Yé Kanaan le do lé é si tɛrɛ ’konu la, é siaa Jézu lɛ léé: Mizan, David Be, ’i nyanai zén an ta. An lu a nyané blena kaii yo lee.

²³ Jézu ’ka we do si lɛ a ta a zi lo, yé a zuomunu bié yé wa ma kyɛ dɔ léé: É a siaana kaa zuo, bé fe a lɛ léé, ’é go.

²⁴ Yé Jézu léé: Wo an pa zia Izraɛl lé nénu lé wo ke é sanle bélé ’blanu zo, wo saa ɛ va.

²⁵ Naa, lezan da yé é dia é bli la a ’lɛ yé é léé: Mizan, ’i bɔ an va.

²⁶ Naa, é lé a lɛ léé: Dé wo nénu lé fɛblele si yé wa vuli blénnénu lɛ ’naan, ’bɛ a é zimaa?

²⁷ Naa, é léé: Gba, Mizan, naa, fɛ lé éé zanaan wozannu lé tablé wuo, blénnénu a blé.

²⁸ Jézu lé a lɛ léé: Lezan, ilé blipale a blɛn. ’É kɛlɛ i lɛ bélé fɛan zo lé é sɔ i lɛ, a zo. A bléyi duo nya tɔɔn, a lu béli.

Jézu mi kiɛre béli

²⁹ Jézu si fɛkona, yé é da Galilé wɛyi sɔnɔ. É gɔ gié aan wo yé é nyana a nwiin.

³⁰ Mi gu blɛn bié a va; tunbozannu koo, bɛgazannu valé ganegazannu koo, yuɛwiizannu koo, bobogyɛzannu koo, gyɛgyɛzan bɛnu kiɛre koo, wo da wo nya. Wo wo pla a gane ma, yé é wo béli.

³¹ Munu bobogyɛzannu ye we fena, yé wo bɛgazannu valé ganegazannu ye é bélile, yé wo tunbozannu ye tawona, yé wo yuɛwiizannu ye yɛrɛ yena, yé wo gi vuru yé wo Izraɛl lé Bale tɔ bɔ.

Jézu fɛ nɔ mi baa fié lɛ

³² Jézu é zuomunu laa yé é léé: An nyanai a zénna mi gu ’ko ta. A yi yaa lo wa an va, yé wo ’ka tan fɛ do kpen ble lɛ lo. Maa ’ka a va léé, maa wo pa zia lɔrɔ nya lo, dé wo da zɔrɔ zia.

³³ A zuomunu lé a lɛ léé: Kaa kɛla kaa yé kaa buru ye kiɛre bwi gi ’ko, yé é mi gu blɛn ’ko zo kaan?

³⁴ Jézu a laa wo lee léé: Buru a ka lee nɔɔ? Wo léé: É a sɔrafié, é valé pɔ kiéné kenu nya.

³⁵ Yé é mi gu nyana tɛrɛ va.

³⁶ Yé é buru sɔrafié valé pɔnu si yé é Kazambale bɔ vɔ, yé é a bɔi yé é a nɔ é zuomunu lɛ, yé wa guli mi gu ma.

³⁷ Yé wo faa fɛ ble yé wo kan, yé wo kyɛɛné sɔrafié fan a kurunu lé wo vo, wo nya.

³⁸ Gɔnénu lé wo fɛ ble, wa mi baa fié, yé wo ’ka lomu valé nénu nɔnɔ lɛ wo va lo.

³⁹ A zuo, é mi gu pa zia, yé é vɔ ’yitagoro gi, yé é go Magadan tɛrɛ la.