Matio 14 - Kazambale lé Sebe Sauunu 1979

Mi batizéwozan Jan gawe

¹ ’Bɛ bléyi ’ko va, gyamalati Érɔd Jézu lé we ’ma aan wo yé é lé é wuomunu lɛ léé:

² Mi batizéwozan Jan lé. É nwa gamunu va, bɛwemalé éé gyɛzorowe ’konu kɛla.

^3-4 Wean ma lé é dɔ a gi a zo, yee lé é ke ’ko: Érɔd zuané do ana wa laama Filip; wo ’bɛ na laama Érodias, yé Érɔd é zuané Filip na Érodias si é na nya, naa, Jan lé a lɛ léé: A se ’ka i lɛ léé, bé si i na nya lo. Amalé Érɔd Jan kun, yé é a yere yé é a vɔ bokɔn gi.

⁵ É sɔ a lɛ léé, ’é a gyɛ, naa, munu Jan ye balelayezan nya, amalé é kana wo lee.

⁶ Wa Érɔd yaayi lé fɛti kɛlɛna aan wo, yé Érodias lu nɛnɛ bo munu lé Érɔd wo laa, wo méléna. É sɔ Érɔd lɛ bɛan zo bɛ,

⁷ é yo ble léé, dé é fɛofɛan laa é lee, é dan a nɔ lɛ a lɛ.

⁸ A bu dére pa a ’léé yé é léé: ’I mi batizéwozan Jan ’wuo nɔ an lɛ siɛti ta ’ko.

⁹ Gyamalati bli kyɛ dɔ, naa, alé yoblelenu valé fɛtikɛlɛmunu lé we ma, é léé, ’wa nɔ a lɛ,

¹⁰ yé é munu nwunvɔ Jan ’wuo kinile we ma bokɔn gi.

¹¹ Wo da a ’wuo nya siɛti ta, yé wa nɔ blɛnzan lɛ, yé é goan é bu lɛ.

¹² Jan zuomunu da yé wo Jan kuru sia yé wa pa. Yé wo go a zuo fe lɛ Jézu lɛ. We ’ko ma lé, Érɔd Jézu lé gyɛzorowe kɛlɛlenu we ’ma aan wo, é léé: Mi batizéwozan Jan ɛ nwa gamunu va.

Jézu fɛ nɔ mi baa fié wuru soru lɛ

¹³ Jézu mi batizéwozan Jan gawe ’ma aan wo, é si ’bɛna yé é vɔ ’yitagoro gi gole bwi gi we ma. Mi gu a ’ma aan wo, wo si flanu ta yé wo go a zuo ’wo gane ta.

¹⁴ Jézu si ’yitagoro gi yé é mi gu ye, yé a nyanai zén wo ta, yé é wo va gyɛgyɛmunu béli.

¹⁵ Nyanadi pa aan wo, Jézu zuomunu bié é va yé wo léé: Fɛkona a bwi gi nya, yé yiri bɔ baa tɛkɛ; ’i mi gu pa zia, yé ’wo go fla ’wolé fɛblele lɔ.

¹⁶ Jézu a zi pa wo lɛ léé: É ’ka lé wo go lo. Kabozen, ’ka fɛblele nɔ wo lɛ.

¹⁷ Naa, wo lé a lɛ léé: Buru soru valé pɔ fié saa ɛ ke ko lee ’ko.

¹⁸ Yé é léé: ’Ka da wo nya an lɛ.

¹⁹ Yé é lé mi gu lɛ léé: ’Ka nyana lu ta. Yé é buru soru valé pɔ fié si, yé é yara nwa lagi zia yé é Kazambale bɔ vɔ. Yé é buru bɔi yé é a nɔ é zuomunu lɛ, yé wa guli mi gu ma.

²⁰ Yé wo faa fɛ ble yé wo kan, yé wo kyɛɛné vu ta fié fan buru kurunu lé wo vo, wo nya.

²¹ Munu lé wo fɛ ble, wo va gɔnénu a mi baa fié wuru soru, yé lomu valé nénu a wo va é ziin.

Jézu tawo wɛyi ta

²² ’Bɛ zuo tɔɔn, Jézu é zuomunu tunu léé, ’wo vɔ ’yitagoro gi yé ’wo ’yi kini ’é ’lɛ, yé é mi gu pa zia.

²³ É wo dɔ zia aan wo yé é go bazoro lɛ é do gɔ nwiin. Nyanadi fɔfɔ ’té é ana mi é do.

²⁴ ’Té ’yitagoro bɔ wɛyi méléna tɛkɛ, yé fu a giéna wo yara zia plɛplɛ yé wɛyi a nwana, ’té éé duun‐an ’yitagoro ma.

²⁵ É béli, manegɔné vinin wele nya, Jézu da wo vazia tawole nya wɛyi la.

²⁶ A zuomunu a ye aan wo tawona wɛyi ta, di kini wo gi yé wo siaa léé: Mi léli lé! Wolé kanale zi wo siaa dére plɛplɛ nya.

²⁷ Kele tɔɔn Jézu we fe wo lɛ yé é léé: ’Ka bli ta dɔ plɛplɛ. Maa lé. Té ka kana lo.

²⁸ Piɛri lé a lɛ léé: Mizan, dé bii lé, ’i an laa léé, ’an go i va tawole nya ’yi ta.

²⁹ Jézu léé: ’I da. Piɛri si ’yitagoro gi, yé é tawo ’yi ta, gole Jézu va we gi.

³⁰ Naa, é a ye léé, fu a giéna plɛplɛ yé kana zén a gi. É ke aan wo gona ’yi wuo, é siaa plɛplɛ léé: Mizan, ’i an si we gi!

³¹ Tɔɔn, Jézu ’é bɛ soi, é a kun, yé é lé a lɛ léé: Bli pa tegele lozan, mɛmalé kana zén i gii?

³² Wo vɔ ’yitagoro gi yé fu daan giéle ma.

³³ ’Yitagoro gi munu dia ’wo bli la Jézu ’lɛ, yé wo léé: Bii a Kazambale Be nya webozen nya.

Jézu gyɛgyɛmunu béli Jénésarɛt tɛrɛ la

³⁴ Dé wo wɛyi kini faa wo bɔ Jénésarɛt tɛrɛ la.

³⁵ Dé fɛkona munu a ma kunna ye léé, Jézu lé, wo munu pa zia a zuo fena ’wo zi tɛrɛ faa la, yé wo da gyɛgyɛmunu faa nya Jézu va.

³⁶ Wo zanté vɔ a lɛ léé, ’wo bɛ mane alé sɔ lɔlu ma é pla. Yé wo faa lé wo bɛ mane a ma, wo béli.