Matio 13 - Kazambale lé Sebe Sauunu 1979

’Savɔzan ma gɔné vɔle

¹ ’Bɛ yi duo nya, Jézu bɔra kɔn gi, yé é nyana wɛyi gɔ la.

² Mi gu blɛn zén aan wo a zi yé é vɔ ’yitagoro gi yé é nyana. Mi gu faa vo é dɔle wɛyi gɔ la.

³ É we kiɛre fe wo lɛ gɔnévɔlenu nya yé é léé: ’Savɔzan go ’sa vɔ lɛ.

⁴ É a nwɛɛnna aan wo, a wɔlɛ kenu dia zi sɔnɔ; yé mianénu da yé wa ble.

⁵ A wɔlɛ kenu dia paala, fɛana lé gɔlɛnu ke yé tɛrɛ ’ka kiɛre lo, ana; tɛrɛ boro ’ka lo, amalé a gɔn bɔ é kele;

⁶ naa, a suni ’ka go lɛ baa lo, amalé dé yiri bi, é a kyɛ ble yé é ga.

⁷ A wɔlɛ kenu dia lélinu va; lélinu toro yé wa tunu yé é ga.

⁸ A wɔlɛ kenu dia tɛrɛ zima ta; a wɔlɛ baa yé a nɛnɛ do wɔlɛ kɛlɛ yɔ soru, a nɛnɛ do wɔlɛ kɛlɛ yɔ yaa, a nɛnɛ do wɔlɛ kɛlɛ yɔ do wɔlɛ vu.

⁹ Mi lé we ’ma tɔné ke a ’wuo ma, ’bɛzan a ’ma ma.

Wean ma lé Jézu éé gɔné vɔa

¹⁰ A zuomunu bié aan wo a va yé wa laa a lee léé: Mɛmalé i we fé wo lɛ gɔnévɔlenu nyaa?

¹¹ Jézu lé wo lɛ léé: Wa se kɛlɛ ka lɛ léé, ka Kazambale plale mi nwiin lé weyɔɔlenu dɔɔ yé wo ’ka ’bɛ se kɛlɛ lɛ wo lɛ lo, ’bɛzama.

¹² Wo dan fɛ nɔ lɛ mian fɛ ke a lee, a lɛ, yé azé ’é kɛlɛ kiɛre, naa, mian azé ’ka lo, fɛ lé é ke a lee, wo dan a si lɛ a lee.

¹³ Amalé maa we fé wo lɛ gɔnévɔlenu nya; naa, wa naginian, yé wo ’ka a yé lo, yé wa maan, yé wo ’ka a gi maan lo, yé é ’ka goo wo ’wuo gi lo.

¹⁴ Ézai lé balelawe ’ko lɛ sɔɔ wozé nya. É léé: Ka dan we ’ma lɛ ka tɔné nya, yé é ’ka dan go lɛ ka ’wuo gi lo; Ka dan fɛ nagini lɛ ka yuɛ nya yé ka ’ka dan a ye lɛ lo;

¹⁵ Munu ’ko gi nyɛ ’ka kinié lo; Wo ’wo tɔné lɛ tan, dé ’wo da we ’ma ’wo tɔné nya; Wo ’wo yuɛ lɛ tan, dé ’wo da fɛ ye ’wo yuɛ nya; Wo we ’ko kɛlɛ, léé, dé ’wo da we ’ma ’wo bli gi, Dé ’wo da ’wo bli nɔla, yé maa ’wo béli.

¹⁶ Kazé a néné, naa, ka yuɛ a fɛnu yena; kazé a néné, naa, ka tɔné a we ’mana.

¹⁷ Maa lé ka lɛ webozen nya léé, fɛ lé ka ke a yena, balelayemunu kiɛre valé mi tegelenu a a va léé, wa ye, yé wo ’ka a ye lɛ lo; we lé ka ke a ’mana, wa a va léé, ’wa ’ma, yé wo ’ka a ’ma lɛ lo.

Jézu ’savɔzan ma gɔné gi fe

¹⁸ Amalé, ’ka tɔné dɔ ’savɔzan ma gɔné gi lɛ.

¹⁹ Dé mi do é tɔné dɔ Kazambale plale mi nwiin dére lɛ yé é ’ka a maan lo, Satan ɛ dan yé fɛ lé wa nwɛɛn a bli gi éé a sian; mi ’ko ɛ ke fɛana lé ’sawɔlɛ dia zi sɔnɔ bɛ, a nya.

²⁰ ’Sawɔlɛ lé é dia paala, ’bɛ a mi lé é Bale dére ’ma tɔɔn yé é a si gi nanale nya, a nya;

²¹ naa, a suni ’ka goo baa lo; é ’ka é yara paan we la lo, dé we tɔntɔn bɔle a ma léé, ɛɛ, dé nyané pale a ta Bale dére lé we ma léé, éé kɛla a diérawe nya.

²² A wɔlɛ lé é dia lélinu va, ’bɛ a mi lé éé Bale dére maan, a nya; naa, tɛrɛla gibɔrɔpalenu valé dabli lé, fuafɛnu a kɛla munu lɛ, woo dére ’ko tunuan yé a ma tɔnɔ ’ka kɛla lo.

²³ ’Sawɔlɛ lé é dia tɛrɛ zima la, ’bɛ a mi lé éé Bale dére maan yé éé wɔraan a ’wuo gi, a nya; a wɔlɛ éé baan webozen nya, a nɛnɛ do wɔlɛ éé kɛla yɔ soru, yé a nɛnɛ do wɔlɛ éé kɛla yɔ yaa, yé a nɛnɛ do wɔlɛ éé kɛla yɔ do wɔlɛ vu.

Kyankyan lé ke ’saféi

²⁴ É gɔné bɛ vɔ wo lɛ yé é léé: Kazambale plale mi nwiin a bélé mi lé é ’sawɔlɛ zima nwɛɛn élé féi, a zo.

²⁵ Naa, munu a yi gyɛna aan wo, féizan nyanézan da, yé é kyankyan wɔlɛ nwɛɛn ’sa méléna, yé é go.

²⁶ Dé ’sa toro, yé é sola, kyankyan toro é ziin.

²⁷ Kɔnzan wuomunu da yé wo lé a lɛ léé: Kozan, i ’ka ’sawɔlɛ zima nwɛɛn lɛ ilé féi loo? Yé kyankyan si kyɛɛn?

²⁸ É a zi pa wo lɛ léé: An nyanézan do ɛ kɛlɛ bɛ. Yé a wuomunu lé a lɛ léé: É sɔ i lɛ léé, ko go wo soowɔlaa?

²⁹ É léé: Gba, dé ka da ’sa valé kyankyan soowɔla ékeva.

³⁰ ’Ka wo vo ékeva mi, yé ’wo tin fɔɔ yé ’sagyɛbléyi é bɔ. ’Sagyɛbléyi va, maa dan a fe lɛ ’sa?-?gyɛmunu lɛ léé: ’Ka kyankyan soowɔla é vinin yé ka a yere a kyɛblele we gi, yé ’ka ’sa sia, ’ka pa anlé boo la.

Sénévéwɔlɛ ma gɔné vɔle

³¹ É gɔné bɛ vɔ wo lɛ é ziin yé é léé: Kazambale plale mi nwiin a bélé sénévéwɔlɛ do lé, mi a si yé é a vɔ élé féi, a zo.

³² A wɔlɛ kiéné mini fɛwɔlɛ faa ta, naa, dé é toro é a blɛn é mini zianyilinu ta, yé éé kinin‐é yili nya yé mianénu éé dan ’wo kɔn dɔ lɛ a bɛnu ta.

Lévɛn ma gɔné vɔle

³³ É gɔné bɛ vɔ wo lɛ é ziin yé é léé: Kazambale plale mi nwiin a bélé lévɛn lé lezan a si yé é a pa suo nya yaa burupun va, a zo, yé lévɛn a yɔɔ faa nwa.

Wean ma lé Jézu éé gɔné vɔa

³⁴ Jézu wenu ’ko faa fe mi gu lɛ gɔnévɔlenu nya, yé é ’ka we pla do kpen fé lo, ’té dé é ’ka gɔnévɔle nya lo,

³⁵ we lé balelayezan a fe, a lɛsɔɔle we gi. É léé: An dan an ’léé fuo lɛ gɔnévɔlenu nya; Yé wenu lé wo ke é yɔɔle tɛrɛ kɛlɛbléyi va fɔɔ kyɔ, Maa dan wo bɔra lɛ.

Jézu kyankyan ma gɔné gi fe

³⁶ Jézu mi gu pa zia yé é wɔra kɔn gi. A zuomunu bié a ma yé wo léma: ’I féi kyankyan ma gɔné gi fe ko lɛ.

³⁷ É a zi pa léé: Mi lé éé fɛwɔlɛ zima vɔa, maa blami Be lé;

³⁸ féi a tɛrɛla nya; fɛwɔlɛ zima a munu lé Kazambale ke é plale wo nwiin, wo nya; kyankyan a Satan lé munu nya;

³⁹ nyanézan lé é a vɔ, é a yonufaatagɔné nya; a gyɛbléyi a tɛrɛla nyaabléyi nya; a gyɛmunu lé ke lanjenu nya.

⁴⁰ Fɛan zo lé woo kyankyan soowɔlaan yé wa vulian kyɛ va, a zo duo lé é dan kɛlɛ lɛ tɛrɛla nyaabléyi nya.

⁴¹ Maa blami Be, an dan anlé lanjenu pa lɛ zia yé wo dan misaanwenu valé weplekɛlɛmunu faa si lɛ anlé munu méléna;

⁴² yé ’furu lé é tana kyɛ nya, wo dan wo vuli lɛ a gi, fɛana lé wuvɔle valé suiɛ la blele ke, ana.

⁴³ Yé mi tegelenu é dan bi lɛ nyananyana bélé yiri zo ’wo Ti Bale lé tɛrɛ la. Mi lé we ’ma tɔné ke a ’wuo ma, ’bɛzan a ’ma ma.

Fɛwezan yɔɔle

⁴⁴ Yé é ziin, Kazambale plale mi nwiin a bélé fɛwezan lé é ke é yɔɔle féi do la, a zo. Mi lé é a ye, é ’ka a glewoo mi do kpen lɛ lo, yé a gi nanale we ma éé goo yé é élé fɛ faa daan, yé éé féi ’ko lɔa a mafɛ nya.

Wɛɛwɔlɛwezan

⁴⁵ Kazambale plale mi nwiin a é ziin bélé yaawozan lé é ke wɛɛwɔlɛwezan zimanu ginina, a zo.

⁴⁶ Dé é a do ye vlɛ blɛn nya, yé fɛ faa lé ke a lee, éé goo wo dan lɛ, yé é a lɔ wo mafɛ nya.

Pɔgyɛséli

⁴⁷ Yé é ziin, Kazambale plale mi nwiin a bélé séli lé wa nwɛɛn‐an wɛyi va, ’té éé pɔ gɔnɔ faa gya, a zo.

⁴⁸ Dé pɔ a fan, pɔgyɛmunu a ganaan, yé dé wo nyana wɛyi gɔ la, wa zimazannu paan bɔ gi, yé wa lɛrɛlɛrɛnu vulian.

⁴⁹ A zo duo lé é dan kɛlɛ lɛ tɛrɛla nyaabléyi va. Lanjenu é dan da lɛ weplekɛlɛmunu si lɛ mi tegelenu va,

⁵⁰ yé wo dan wo vuli lɛ ’furu lé é tana kyɛ nya, a gi, fɛana lé wuvɔle valé suiɛ la blele ke, ana.

Fɛwezan kwanu valé a dɛrɛnu

⁵¹ Ka we ’konu faa ’maa? Wo lé a lɛ léé: Iin.

⁵² É lé wo lɛ léma: Bɛwemalé, sɛbɛ?-?gifezannu faa lé wo Kazambale plale mi nwiin lé we dɔɔ, wa bélé kɔnzan lé éé fɛ dɛrɛnu valé fɛ kwanu sié élé fɛwezannu va, a zo.

Wo sɔn vɔ Jézu ma Nazarɛt

⁵³ Jézu nyaa aan wo gɔné ’konu vɔle nya, é si ’bɛna.

⁵⁴ É go aan wo élé tɛrɛ la, yé é a we paana munu gi wolé bazorokɔn gi bɛan zo, munu gi vuru yé wo léma: We dɔɔle ’ko valé gyɛzorowenu kɛlɛle ’ko, é a ye kyɛɛn?

⁵⁵ É ’ka yilinyaazan be nya loo? Mari‐an ke a bu nya loo? Jak koo, Jozɛfu koo, Simɔn koo, Jud koo, wo ’ka a zuanénu nya loo?

⁵⁶ Yé a zuané lomu faa ’ka ko méléna ’ko loo? É we ’konu faa ye kyɛɛn?

⁵⁷ Yé bli vole Jézu lɛ kɛlɛ wo ma tɔntɔn. Jézu lé wo lɛ léé: Balelayezan lé tɛrɛ la valé alé kɔn gi saa na lé wa yé boazan nya.

⁵⁸ Wo bli ’ka a lɛ lo, amalé é ’ka gyɛzorowe kiɛre kɛlɛ lɛ fɛkona lo.