Matio 12 - Kazambale lé Sebe Sauunu 1979

Jézu zuomunu buruwɔlɛ nɛnɛnu poroma flinyi nya

¹ ’Bɛ bléyi va, flinyi do nya, Jézu a giéna aan wo buru féi méléna. Lɔrɔ a a zuomunu gyɛna yé wo kun a nɛnɛnu porole ma é ma, ’té wa blé.

² Farizimunu a ye aan wo, yé wo lé Jézu lɛ léé: I yua, we lé wa fe léé, té wa kɛlɛ flinyi nya lo, i zuomunu a a kɛlɛna.

³ Naa, Jézu lé wo lɛ léé: We lé David valé ’é vamunu a kɛlɛ, ’té lɔrɔ a wo gyɛna, ka ’ka tan a ta fe lɛ loo?

⁴ Fɛan zo lé é wɔra Balebangikɔn gi, yé Kazambale ’lɛburu lé, a blele se ’ka yee valé ’é vamunu lɛ lo, a blele se a Balebanmunu saa ɛ lɛ, yé wa ble, ka ’ka tan a ta fe lɛ Kazambale lé sɛbɛ gi loo?

⁵ Taa, fɛan zo lé Balebanmunu éé flinyi sɛra Balebangikɔn gi flinyinu nya, ’té we ’ka wo nwiin lo, ka ’ka tan a ta fe lɛ bélidɔwesɛbɛ gi loo?

⁶ Naa, maa lé ka lɛ léé, fɛ do a ’ko, a blɛn mini Balebangikɔn ta.

⁷ Dé é vo léé, ka we ’ko gi ’ma léé, nyanai zénle ɛ sɔa an lɛ yé saraka bole ’ka sɔa an lɛ lo, ’té ka ’ka kɔɔn we dɔa nwiinplazannu nwiin lo.

⁸ Naa, maa blami Be, maa a flinyizan nya.

Bɛgazan lé we

⁹ Jézu si aan wo ’bɛna, é wɔra wolé bazorokɔn gi.

¹⁰ ’Té bɛgazan do ana mi. Wo we laa Jézu lee léé: A se a mi lɛ léé, é mi béli flinyinu nyaa? We dɔle a nwiin we ma lé wa laa.

¹¹ Yé é a zi pa wo lɛ léé: Ka va mi kyɛn lé, dé alé ’bla a do kpen yé é vɔ guru gi flinyi nya, é ’ka kunwo a ma yé ’é a bɔra loo?

¹² Mi we blɛn ’ka mini lɛ ’bla lɛ loo? Amalé a se a mi lɛ léé, ’é wezin kɛlɛ flinyinu nya.

¹³ Yé é lé gɔnézan lɛ léé: ’I bɛ soi. Yé ’bɛ a soi, yé é kɛlɛ yɔrɔyɔrɔ bélé a bɛ koɛ zo.

¹⁴ Farizimunu bɔra yé wo ’wo va we ble léé, ’wo kwa kuli ’wo Jézu gyɛ.

¹⁵ Naa, Jézu a gi dɔɔ aan wo, é si fɛkona. Mi gu blɛn go a zuo. Yé é gyɛgyɛmunu faa béli,

Bale wuozan lé é a si a va

¹⁶ yé é a yi ga wo lee plɛplɛ léé, té wa fe léé, ’yee lé, lo,

¹⁷ we lé balelayezan Ézai a fe, a lɛsɔɔle we gi. É léé:

¹⁸ An wuozan lé maa a si a va, yee le ke ’ko. Yee ɛ sɔ an lɛ kaii, yé alé we an gi nanaan. An Léli é dan vɔ lɛ a ta, Yé é dan we tegele fe lɛ bɛn bɛnu lɛ.

¹⁹ É ’ka dan za vɔ lɛ lo, É ’ka dan siaa lɛ lo. Yé mi do kpen ’ka dan a dére ’ma lɛ flaworo dii lo.

²⁰ É ’ka dan gyan yélile ’wii lɛ lo, Kyɛbɔ bale lé a goi ke dɔna, é ’ka dan a diri lɛ lo, Fɔɔ yé é we ’wuo vo we tegele lɛ,

²¹ Yé bɛn bɛnu bli é vo a tɔ lɛ.

Jézu valé Béɛlzébul

²² Mi lé yo ke a gi, ’té a yuɛ ke é ’wiile yé bobo a gyɛ, wo da a nya Jézu va. Jézu a béli, yé bobogyɛzan we fe, yé é fɛna ye.

²³ Munu faa ’léé ma wo ma yé wo léé: David Be‐an é ke bɛ loo?

²⁴ Farizimunu ’bɛ ’ma aan wo yé wo léé: Yonufaatagɔné Béɛlzébul lé plɛplɛ nya lé éé yonu sié munu gi.

²⁵ Jézu wo gi bɔrɔle dɔɔ yé é lé wo lɛ léma: Tɛrɛ faa lé, alé munu ke é kinile ékema, éé voo é ’bin nya, yé dé é a fla nyaoo, dé é a kɔn nyaoo, dé a gimunu kini ékema, wo ’ka dan vo lɛ ana lo.

²⁶ Dé Satan ébo bin, ’té é a é kinile ékema, ’té alé fɛna é dan vo lɛ ana kaa?

²⁷ Yé dé maa yonu si munu gi Béɛlzébul lé plɛplɛ nya, ka benu ’wozé sié munu gi de ɛ lé plɛplɛ nyaa? Amalé ka benu bozen é dan kɛlɛ lɛ kalé weblezannu nya.

²⁸ Naa, dé maa yonu sié munu gi Kazambale Léli lé plɛplɛ nya, ’té Kazambale lé plale mi nwiin da ka va.

²⁹ Dé wo ’ka mi plɛplɛ yere lɛ é vinin lo, wa kɛla kaa yé wo wɔra alé kɔn gi yé wo alé fɛnu sia gla nyaa? Naa, dé wa yere faa, yé wo alé kɔngifɛnu sia gla nya.

³⁰ Mi lé é ’ka an va lo, é a an mazan nya, yé mian é ’ka fɛ tééan an va lo, éé fɛ nwɛɛn‐an.

³¹ Bɛwemalé maa lé ka lɛ léé, wenyanénu faa lé blaminu a kɛla, é valé Bale sɔnɔdére faa lé wa fé, Bale é dan wo ma we vo lɛ ’bɛ ma, naa, mian é Léli Sauun sɔnɔ, Bale ’ka dan a ma we vo lɛ lo.

³² Dé mian é wenyané fe maa blami Be ma, Bale é dan a ma we vo lɛ, naa, dé mian é wenyané fe Léli Sauun ma, Bale ’ka dan a ma we vo lɛ ’bɛ ma lo, dé é a tɛrɛ la ’ko nyaoo, dé é a tɛrɛ dɛrɛ lé é dan da lɛ bɛ, a ta nyaoo, Bale ’ka dan a ma we vo lɛ lo.

Yili valé é poro

³³ É a lé, dé yili do a é zima, ’té a poro a é zima, dé ’bɛ kaan lo, é a é naané ’té a poro a é naané. Woo yili dɔɔan é poro ma.

³⁴ Ménénwunnu bɛn, ka a mi plenu nya bɛan zo, ka kɛla kaa yé ka we zima fee? We lé éé mi bli faan, éé bɔraan a ’léé wefele nya.

³⁵ Mi zin éé fɛ zimanu sié élé fɛwezan zimanu va, yé mi naané éé fɛ naanénu sié élé fɛwezan naanénu va.

³⁶ Maa lé ka lɛ léé, boawe faa lé munu a fé, wo dan a zuo fe lɛ webleyi nya.

³⁷ I dére ma lé izé é dan kɛlɛ lɛ néné, yé i dére ma lé we é dan dɔ lɛ i nwiin.

Mi lɛrɛlɛrɛnu ɛ tɔmase ma laan

³⁸ Sɛbɛgifemi kenu valé Farizimi kenu alé we bɔi a ta yé wo léé: Kozan, ko a a va léé, ’i tɔmase do kɛlɛ ko yuɛ va.

³⁹ É a zi pa wo lɛ léé: ’Kaa pɛnpɛnnégyɛmunu lɛrɛlɛrɛ ’ko, ka tɔmase ma laan; naa, maa ’ka dan tɔmase bɛ nagɔɔn lɛ ka lɛ lo, fɔɔ balelayezan Jonas zé do kpen lé.

⁴⁰ Naa, fɛan zo lé Jonas yiéyi yaa valé béli yaa kɛlɛ pɔ blɛn bɔn gi, a zo duo lé, maa blami Be é dan yiéyi yaa valé béli yaa kɛlɛ lɛ tɛrɛ bɔn gi.

⁴¹ Webleyi nya, Ninive munu é dan nwa lɛ bléyi ’ko vamunu ma, yé wo we dɔ wo nwiin; naa, ’bɛnu ’wo bli nɔla Jonas dére ma, yé ka ye, mi lé ’bɛ mini Jonas ta, ’bɛzan ana ’ko.

⁴² Webleyi nya, yirinwana bɛyilazia munu nwiinzan lé é ke le nya, é dan nwa lɛ bléyi ’ko vamunu ma, yé é we dɔ wo nwiin; naa, é si tɛrɛ glɛ sina Salomɔn lé wedɔɔle ’male we gi, yé ka ye, mi lé ’bɛ mini Salomɔn ta, ’bɛzan ana ’ko.

Yo tiridɔle éé nɔlaan é pa gi

⁴³ Dé yo tiridɔle si mi gi, éé goo flinna gini lɛ fɛna galenu na, yé é ’ka a yé lo.

⁴⁴ Yé é léé: Anlé kɔn lé, maa si a gi bɛ, maa dan nɔla lɛ ana an pa gi. Yé dé é bɔ ana, é a ye léé, a gi a é koro nya yé ana a é siale, ’té a guru ma nyɔɔ a é gyɛle.

⁴⁵ Yé éé goo, yé yo bɛ sɔrafié lé ’bɛnu naané mini yee ta, éé wo paan ’é va yé woo wɔraan kɔn gi, yé woo nyanaan kli, yé gɔnézan ’ko dɔbɛ voéla éé kɛla lɛrɛlɛrɛ yé é mini a vinin zé la. A zo duo lé é dan kɛlɛ lɛ bléyi ’ko vamunu naané ’ko lɛ.

Jézu bu valé a zuanénu

⁴⁶ Jézu a wefena aan wo mi gu lɛ, a bu valé a zuanénu da yé wo dɔ kɔn ’léé; wa a va léé, ’wo we fe a lɛ.

⁴⁷ Yé mi do lé a lɛ léé: Bé ye, i bu valé i zuanénu a béera yé wa a va léé, ’wo we fe i lɛ.

⁴⁸ Naa, Jézu lé a lɛ léé: De ɛ ke an bu nyaa? Yé de ɛ ke an zuanénu nyaa?

⁴⁹ ’Bɛ zuo é bɛ gɔɔn é zuomunu ma yé é léé: I yua. An bu valé an zuanénu lé ke ’ko.

⁵⁰ Naa, an Ti lé é ke la gi, dé miomian éé alé blibɔmawe kɛla, ’té yee ɛ ke an zuané koo, an buru koo, an bu koo, wo nya.