Matio 11 - Kazambale lé Sebe Sauunu 1979

Mi batizéwozan Jan munu nwunvɔ Jézu va

¹ Jézu nyaa aan wo we ’konu faa fele nya é zuomunu vu ta fié lɛ, é si ’bɛna, yé é go we paale munu gi valé wefele wo lɛ we gi wolé flanu ta.

² Jan Krist kɛlɛwenu ’ma aan wo, ’té é a bokɔn gi, é zuomunu nwunvɔ we laana Jézu lee léé:

³ Mi lé é dan da lɛ, yee lé ke i nya laa, taa, é a lé ko mi bɛ lɛbɛɛn?

⁴ Jézu a zi pa wo lɛ léé: ’Ka go, yé wenu lé ka ’ma, é valé fɛnu lé ka ye, ’ka a zuo fe Jan lɛ, léé:

⁵ yuɛwiizannu a yɛrɛ yena, tunbozannu a tawona, pantɛn a sina pantɛngyɛmunu ma, tɔnéwiizannu a we ’mana, gazannu a nwana gale va, yé wa wenéné fena nyanégyɛzannu lɛ.

⁶ Mian, maa ’ka kɛla a saanzan nya lo, ’bɛzan zé a néné.

⁷ Jan zuomunu go aan wo, Jézu kun Jan ma we fele ma mi gu lɛ yé é léé: Mɛ fɛ lé ka go yi la a nagini lɛ bwi gii? Gyan lé fu ke a ma nyɔɔnna, yee léé?

⁸ Taa, ka go mɛ fɛ nagini lɛɛ? Mi lé sɔ zinzin ke a ta, yee léé? Ka ye, munu lé woo sɔ zinzinnu zén‐é ’wo ta, wa é nyanale minwiinmunu lé kɔnnu gi.

⁹ Taa, ka go mɛ kɛlɛ lɛɛ? Balelayezan lé ka go a nagini lɛɛ? Iin, maa lé ka lɛ léé, é mini balelayezan ta.

¹⁰ Naa, yee lé wo alé we gyɛ sɛbɛ gi; wo léé: Bé ye, maa anlé nwunvɔzan pa i ’lɛzia, Ilé zi ma’lɛrɛle we gi.

¹¹ Maa lé ka lɛ webozen nya léé, munu lé lomu wo yaa, wo va mi do kpen ’ka nwa lɛ yé ’bɛ blɛn mini mibatizéwozan Jan ta lo, dɔlé ’té munu lé Kazambale ke é plale wo nwiin, wo va mi kiiéné a blɛn é mini mi batizéwozan Jan ta.

¹² É sia mi batizéwozan Jan bléyi va fɔɔ kyɔ bléyi ’ko va, Kazambale plale mi nwiin a botunuwe nya, yé nyanazannu ɛ a yé gla nya.

¹³ Balelayemunu faa valé bélidɔwe, wo faa balelawe fe fɔɔ yé é bɔ Jan zé bléyi va;

¹⁴ yé dé é sɔ ka lɛ léé, ka an dére ’ma, Éli lé wa dale we fe, mi batizéwozan Jan a yee ɛ nya.

¹⁵ Mi lé we ’ma tɔné ke a ’wuo ma, ’bɛzan a ’ma ma.

¹⁶ Bléyi ’ko vamunu ’ko, maa dan wo dan lɛ denu maa? Wa bélé nénu lé wo ke é nyanale vuun la, wo zo, ’té woo we fé nunukénénénu bɛnu lɛ léé:

¹⁷ Ko séén fɛn ka lɛ, yé ka ’ka nɛnɛ bo lɛ lo, yé ko wu lɛrɛ vɔ ka lɛ yé ka ’ka wu bo lɛ lo.

¹⁸ Dé Jan da, é ’ka fɛ blé lo, ’té é ’ka fɛ minian lo, yé wo léé: Yo ɛ ke a gi.

¹⁹ Maa blami Be da, ’té an fɛ blé, ’té an fɛ minian, yé wo léé, bun‐anzan valé nwɛminizan lé maa nya; vagɔɔlisimunu valé wenyanékɛlɛmunu béé lé maa nya. Naa, wedɔɔle mawenu éé wedɔɔle nagɔɔn‐an we tegele nya.

Flanu lé wo ta munu ’ka ’wo bli nɔlaan lo

²⁰ Flanu lé é gyɛzorowe kiɛre kɛlɛ wo ta, a tamunu ’ka ’wo bli nɔla lɛ lo, amalé é kun é yara nwɛnnwɛnné gyɛle ma wo ta, yé é léé:

²¹ Korazɛn munu, ka gale nyɔ. Bɛtsaida munu, ka gale nyɔ. Gyɛzorowenu lé maa a kɛlɛ ka méléna, dé é vo léé, maa a kɛlɛ Tii valé Sidɔn, ’té ana munu ’wo bli nɔla namɔn é kwakwa, bɔlɔ valé kyɛyee zénle nya ’wo ta.

²² Bɛwemalé webleyi nya, kazé kleblele é dan mini lɛ Tii valé Sidɔn zé ta. Maa fe ka lɛ.

²³ Yé ’kaa Kapɛnaum munu, ka dan nwa lɛ fɔɔ la gii? Gba. Ka dan zun lɛ gamunu nyanana, naa, gyɛzorowenu lé maa a kɛlɛ ka méléna, dé é vo léé, maa a kɛlɛ Sɔdɔm, ’té é ana tan kyɔ.

²⁴ Bɛwemalé, webleyinya, kazé kleblele é dan mini lɛ Sɔdɔm zé ta; maa fe ka lɛ.

’Ka da Jézu va, ka dan flin lɛ

²⁵ ’Bɛ bléyi va, Jézu kun wefele ma yé é léé: An Ti, Lazan valé Tɛrɛzan, maa i tɔ zin fé léé, i we ’konu yɔɔ Wedɔɔzannu valé ’wuoatazannu ma, yé i wo nagɔɔn nénu lɛ.

²⁶ Iin, an Ti, maa i tɔ zin fé léé, bii a a va léé, ’é kɛlɛ ’bɛ zo.

²⁷ An Ti fɛnu faa nɔ an lɛ; yé mi do kpen ’ka maa Bale Be dɔɔa lo, ’té dé é ’ka an Ti nya lo, yé é ziin, mi do kpen ’ka an Ti dɔɔa lo, ’té dé é ’ka maa Bale Be nya lo, maa valé mian é sɔ an lɛ léé, maa a nagɔɔn ’bɛzan lɛ, ’bɛ nya lo.

²⁸ Ka faa lé, ka wɔlɛ gi ke é nyaale ka ma, yé kɔné blɛn ke ka nwiin bɛ, ’ka da an va, yé maa flinle nɔ ka lɛ.

²⁹ Maa a bli drɔɔzan nya, yé maa a bo?-?kiénézan nya an bli gi, bɛwemalé ’ka kɛlɛ an va wedraanzannu nya, yé ’ka anlé we draan yé maa dan flinle nɔ lɛ ka boen lɛ.

³⁰ Naa, we draanle an va a é zima, yé an ’ka kɔné bɛnzan dɔa mi nwiin lo.