Matio 10 - Kazambale lé Sebe Sauunu 1979

Jézu mi vu ta fié si a va

¹ Yé Jézu é zuomunu vu ta fié laa yé é a se kɛlɛ wo lɛ léé, ’wo yo tiridɔlenu si munu gi yé wo mayaalenu valé migyɛgyɛnu faa si munu ma.

² Nwunvɔzannu vu ta fié tɔ lé ke ’ko: A vininzan, Simɔn lé wa laama Piɛri, é valé é zuané André koo, Zébédé be Jak valé é zuané Jan koo,

³ Filip valé Baatélémi koo, Tɔmas valé vagɔɔlisizan Matio koo, Alifé be Jak valé Tadé koo,

⁴ Zélɔt mi Simɔn valé Jézu pa munu leezan Kariɔtzan Judas koo, woo lé.

Jézu mi vu ta fié nwunvɔ

⁵ Mi vu ta fié lé Jézu wo nwunvɔ, wo lé ke bɛ. We lé é a pla wo lɛ yé é wo nwunvɔ, yee lé ke ’ko: Té ka go bɛn bɛnu va lo; té ka go Samarinu lé flanu la lo;

⁶ Izraɛl munu lé wo ke é sanle bélé ’bla zo, ’ka go wo ɛ va.

⁷ ’Ka go, ’ka fe munu lɛ léé: Kazambale plale mi nwiin bɔ é pu.

⁸ ’Ka gyɛgyɛmunu béli, ’ka gamunu nwa, ’ka pantɛn si munu ma, ’ka yonu si munu gi. Ka a ye é pla, ’ka a nɔ blɛ nya é pla ma.

⁹ Kyan koo, gɔɔlifu koo, gɔɔli koo, té ka go wo nya lo;

¹⁰ bala koo, sɔ fié koo, sawala koo, tawomayili koo, té ka go wo nya lo, naa, a yara lé nyanamapazan ’élé fɛblele ye.

¹¹ Dé é a fla blɛn nyaoo, dé é a fla kiéné nyaoo, dé ka go ana, mi lé é a nyi sié léé, ’é ka bɛn si, ’ka a nagini, yé ’ka vo a va fɔɔ yé ka goyi é bɔ.

¹² Dé ka bɔ kɔn do ’léé, ’ka we ana munu va, léé: Ka vo drɔɔ ma.

¹³ Dé kɔn ’ko gi munu ka si, kalé wo drɔɔ vole ’é vo wo ta ma. Dé wo ’ka ka si lɛ lo, ’ka kalé drɔɔ vole si wo ta ma.

¹⁴ Dé wo ’ka ka bɛn si lɛ lo, dé wo ’ka ’wo tɔné dɔ lɛ ka dérenu lɛ lo, dé é a kɔn‐an nyaoo, dé é a fla‐an nyaoo, ’ka si ana wolé fɛna vungoi puole nya ka gane ma.

¹⁵ Webleyi nya, fla ’ko zé kleblele é dan mini lɛ Sɔdɔm valé Gɔmɔɔ zé ta. Maa fe ka lɛ.

Kleble bléyi é dan bɔ lɛ

¹⁶ Ka ye, maa ka nwunvɔ bélé ’blanu zo glaunu méléna. Amalé ka gi ’é kini bélé méné zo ma, yé ’ka vo drɔɔ bélé plala zo ma.

¹⁷ ’Ka yuɛ pa kabozen va munu lé we ma, naa, wo dan ka pa lɛ weblezannu lee, yé wo dan ka bla lɛ plén nya ’wolé bazorokɔnnu gi;

¹⁸ anlé we ma lé wo dan go lɛ ka nya yé ka dɔ gbɔrɔnamanu valé minwiinmunu ’lɛ, ka kɛlɛle anlé wenayezannu nya woo valé bɛn bɛnu lɛ we gi.

¹⁹ Naa, dé wo ka kun, kalé wefebɛ valé dérenu lé ka dan wo fe lɛ, té ka wo gi bɔrɔ pa lo; wean é a lé ka a fe, é dan dɔ lɛ ka gi ’bɛ bléyi va;

²⁰ naa, wefezan ’ka ka nya lo; ka Ti Léli ɛ dan we fe lɛ ka lɔlu nya.

²¹ Mi é dan é zuané bɔra lɛ ga lɛ, yé mi é dan élé né bɔra lɛ ga lɛ; nénu é dan nwa lɛ ’wo yaamunu ma yé wo dan ’wo yaamunu gyɛ lɛ.

²² An tɔ lé we ma lé munu faa é dan ka za pa lɛ. Naa, mian éé yara paan anlé we kɛlɛle ta fɔɔ yé ’é bɔ a ’wuoplana ’bɛzan é dan si lɛ we gi.

²³ Dé wo nyané pa ka ta fla do ta, ’ka fwi ana yé ’ka go fla bɛ la. Maa lé ka lɛ webozen nya léé, ka giéle Izraɛl lé flanu la lɛ ’ka dan sɔɔ lɛ lo, ’té maa blami Be da.

²⁴ We draanzan ’ka minié wepaaé?-?gizan lɛ lo, yé mi wuozan ’ka minié ézan lɛ lo.

²⁵ We lé wa kɛlɛ wepaamigizan lɛ, é a é zima léé, ’é bɔ a va wedraanzan ma é ziin, yé we lé wa kɛlɛ mizan lɛ, é a é zima léé, ’é bɔ a wuozan ma é ziin. Dé wo kɔnzan tɔ pa Béɛlzébul, wo ’ka dan alé kɔngimunu tɔ pa lɛ a zo loo?

Mi kanamazan

²⁶ Amalé té ka kana wo lee monomono lo. Fɛ lé ke é yɔɔle yé a ta ’ka dan bɔra lɛ lo, ’bɛ fɛ ’ka lo; yé kyeengiwe lé, ’bɛ ’ka dan bɔra lɛ lo, ’bɛ ’ka lo.

²⁷ We lé maa a fé ka lɛ gunutinu va, ’ka a fe é yiéyi, yé we lé ka maan ka tɔné gi, ’ka dɔ kɔn nwiin yé ’ka siaa a nya.

²⁸ Wo lé woo mi kɔlɛ gya, yé wo ’ka bɔa miboen gyɛle lɛ lo, té ka kana wonu lee lo. Mi lé éé bɔa miboen valé mi kɔlɛ gyɛle lɛ jéɛna kyɛ plɛplɛ va, a fila vɔ léé, ka kana ’bɛzan lee.

²⁹ Wo ’ka gbé fié daan su do va loo? Naa, dé é ’ka ka Ti lé blibɔmawe nya lo, wo va gbé do kpen ’ka diaan tɛrɛ va lo.

³⁰ Yé é ziin, ka nwin gɔ faa a é nɔnɔle.

³¹ Bɛwemalé té ka kana lo. Ka wea é mini gbé kiɛre ta.

Krist tɔ bɔrale munu va

³² Bɛwemalé, mian éé an tɔ bɔraan munu va, maa dan ’bɛzan tɔ bɔra lɛ é ziin, an Ti lé é ke la gi, a va;

³³ naa, mian éé an tɔ yɔɔan munu va, maa dan ’bɛzan tɔ yɔɔ lɛ é ziin, an Ti lé é ke la gi, a va.

Jézu da gwɔun nya, é ’ka da lɛ mi vo lɛ drɔɔ lo

³⁴ Té é dɔ ka gi léé, an da munu vo lɛ ékeva drɔɔ tɛrɛ la lo. An ’ka da lɛ munu vo lɛ ékeva drɔɔ lo; naa, an da gwɔun nya an lee.

³⁵ An da mi valé é ti kini lɛ ékema; an da blɛn valé é bu kini lɛ ékema; an da mi be na valé é zana bu kini lɛ ékema;

³⁶ yé mi nyanézannu é dan kɛlɛ lɛ élé kɔngimunu nya.

³⁷ Mi lé é ti valé é bu we minié an ta, a yara ’ka lé, ’é kɛlɛ anzé nya lo; yé mi lé é be valé é lu we minié an ta, a yara ’ka lé, ’é kɛlɛ anzé nya lo;

³⁸ yé mian é ’ka ébo lé yiliblan sian yé é da an zuo lo, a yara ’ka lé ’é kɛlɛ anzé nya lo.

³⁹ Mian é ’élé tɛrɛla kɛlɛ blɛn, é dan vuru lɛ a gi, yé mian é vuru we faa gi anlé we ma, ’bɛzan é dan ’ézé ye lɛ é ziin.

Gooli pale

⁴⁰ Mian éé ka sié, éé mabozen sié é ziin, yé mian éé maa sié, mi lé é an pa zia, éé ’bɛzan sié é ziin.

⁴¹ Mian éé balelayezan sié a kɛlɛle balelayezan nya we ma, wo dan a gooli pa lɛ balelayezan gooli zo. Mian éé mi tegele sié a kɛlɛle mi tegele nya we ma, wo dan ’bɛzan gooli pa lɛ mi tegele gooli zo.

⁴² Yé dé miomian ’yi drɔɔ kanané do nɔ mi kiénénu ’ko va mi do lɛ é pla, a kɛlɛle an zuozan nya we ma, ’bɛzan é dan a ma gooli ye lɛ kpɔ. É ’ka dan vuru lɛ a ma lo. Maa fe ka lɛ.