Matio 1 - Kazambale lé Sebe Sauunu 1979

Jézu Krist tranu tɔ nɔnɔle

¹ Jézu a David valé Abraam kululazan nya. Jézu Krist tranu tɔ nɔnɔle lé ke ’ko:

² Abraam Izak yaa; Izak Jakɔb yaa; Juda koo, é bwenu koo, é zuanénu koo, Jakɔb wo yaa;

³ Juda Farɛs valé Zara yaa Tamaa ma; Farɛs Esrom yaa; Esrom Aram yaa;

⁴ Aram Aminadab yaa; Aminadab Naasɔn yaa; Naasɔn Salmɔn yaa;

⁵ Salmɔn Boaz yaa Raab ma; Boaz Obɛd yaa Rut ma; Obɛd Izai yaa;

⁶ Izai David yaa. Minwiinzan David Salomɔn yaa Uri na ma;

⁷ Salomɔn Roboam yaa; Roboam Abia yaa; Abia Azafa yaa;

⁸ Azafa Jozafat yaa; Jozafat Joram yaa; Joram Ozias yaa;

⁹ Ozias Joatam yaa; Joatam Akaz yaa; Akaz Ézékia yaa;

¹⁰ Ézékia Manasé yaa; Manasé Amon yaa; Amon Jozias yaa;

¹¹ Jozias Jékonias valé é bwenu yaa, bléyian va lé wo go wo nya Babilɔn.

¹² Gole wo nya Babilɔn zuo, Jékonias Salatiɛl yaa; Salatiɛl Zorobabɛl yaa;

¹³ Zorobabɛl Abiud yaa; Abiud Éliakim yaa; Éliakim Azɔɔ yaa;

¹⁴ Azɔɔ Sadɔk yaa; Sadɔk Akim yaa; Akim Éliud yaa;

¹⁵ Éliud Éléazaa yaa; Éléazaa Matan yaa; Matan Jakɔb yaa;

¹⁶ Jakɔb Jozɛfu yaa, yee lé ke Mari zana nya. Jézu lé, wa laama Krist, Mari a yaa.

¹⁷ É si Abraam ma fɔɔ yé é bɔ David ma, wo kulunu a vu ta ziɛn. É si David ma fɔɔ yé é bɔ gole wo nya Babilɔn ma, wo kulunu a vu ta ziɛn; é si gole wo nya Babilɔn ma fɔɔ yé é bɔ Krist ma, wo kulunu a vu ta ziɛn.

Jézu Krist yaale

¹⁸ Jézu Krist yaale a ’ko zo: A bu Mari lé, Jozɛfu a pu dɔ, ’té é ’ka tan a si lɛ lo, yé é bɔn si Léli Sauun lé plɛplɛ nya.

¹⁹ A bwɛ Jozɛfu a mi tegele nya, naa, é ’ka a va léé, ’é yaragyɛwe bɔ Mari ma lo, yé é dɔ a gi léé, ’é sɔn vɔa a ma wo mi fiénu méléna.

²⁰ É a é gi bɔrɔna we ’ko ma aan wo, Mizambale lé lanje do bɔra a va nyɛ fla yé é léé: David gɔnɔlazan Jozɛfu, té i kana i bwɛ Mari sile ma lo, naa, né lé é a bɔn si bɛ, é si Léli Sauun va.

²¹ Mari é dan négɔné do yaa lɛ, yé bé tɔ pa Jézu; yee ɛ dan élé munu lé wenyanénu si lɛ wo lee.

²² ’Bɛ faa bɔ, dérenu lé Mizambale a fe balelayezan lɔlu nya, a lɛsɔɔle we gi. É léé:

²³ Bé ye, blɛn lé gɔné ’ka tan a dɔɔ lɛ le nya lo, é dan bɔn si lɛ yé é dan négɔné do yaa lɛ. Wo dan a tɔ pa lɛ Emanuɛl, ’bɛ gi léé, Bale a ko va.

²⁴ Jozɛfu vuo aan wo, we lé Mizambale lé lanje a fe a lɛ, é a kɛlɛ, yé é da é na nya é va.

²⁵ Naa, é ’ka a dɔɔ lɛ le nya lo, fɔɔ yé é né ’ko yaa gɔné nya, yé é a tɔ pa Jézu.