Malasi 3 - Kazambale lé Sebe Sauunu 1979

¹ Ka ye, maa dan anlé nwunvɔzan pa lɛ zia; é dan zi ma’lɛrɛ lɛ an ’lɛ. Yé Mizan lé ka ke a naginina, é dan bɔra lɛ ka ma fiaa élé kɔn gi; gipawe dɛrɛ gizan lé ka bli bɔ a ma, yee lé é dan bɛoo bɛ; lai sunyanu lé Gakelebale ɛ fe.

² A dayi nya ’naan, de ɛ dan dɔ lɛ a wuoo? Dé é da, de ɛ dan vo lɛ loru é dɔlee? Naa, é dan kɛlɛ lɛ bélé kyan selekyɛ zo, bélé sɔgibɔzan lé sabli kɛlɛ gwɛn zo.

³ É dan nyana lɛ, yé é dan gɔɔlifu sele lɛ yé é a bo si a va; yé é dan Lévi kulunu ma bɔ lɛ; é dan fɛ naané si lɛ wo ma bélé woo gɔɔlifu valé kyan bo sié é ma fɛan zo, a zo, yé wo dan we tegele blɛ kɛlɛ lɛ Gakelebale lɛ.

⁴ Yé Juda valé Jérusalɛm munu lé blɛnu é dan Gakelebale gi nana lɛ, bélé é li zé zo.

⁵ Maa dan bié lɛ ka sɔnɔ weblele we ma; zɔkɛlɛzan valé leginizannu koo, wo lé woo bale ’nyɔɔn‐an vié nya koo, munu lé wo ’ka nyanamapazan banwoo lo koo, wo lé woo yaan zanagalale valé bugalazan ta koo, wo lé woo weple kɛla bɛn lɛ, ’té wo ’ka kanaan an lee lo, maa dan wo ma we fe lɛ é kelekele. A zo lé lai sunyanu lé Gakelebale a fe.

Fɛvuzan nɔle

⁶ Naa, maa a Gakelebale nya, an ’ka nɔlaan lo, bɛwemalé, ’kaa Jakɔb lé nénu, maa ’ka ka kulu ga lɛ lo.

⁷ É sia ka tranu bléyi va, ka si an dére zuo, yé ka ’ka wo ta tawoo lɛ lo. ’Ka da an va ka pa gi, yé maa dan da lɛ ka va é ziin; a zo lé lai sunyanu lé Gakelebale a fe. Yé ka léé: Ko dan i va kaa? Ko ana ’ko.

⁸ Mi éé dabli kɛla Bale lɛɛ? Naa, ka dabli kɛlɛ an lɛ. Yé ka léé: Ko dabli kɛlɛ i lɛ kaa? Ka dabli kɛlɛ an lɛ kalé fɛvuzan valé blɛfɛ nɔle nya.

⁹ ’Kaa bɛn faa, ka dabli kɛla an lɛ, amalé bale a é pale ka ma.

¹⁰ ’Ka da kalé fɛvuzannu faa nya fɛwezan tadɔkɔn gi, léé, fɛblele ’é kɛlɛ anlé kɔn gi; lai sunyanu lé Gakelebale léé: ’Ka an gi dan a nɔle nya, yé ka dan a ye lɛ léé, maa la lɛ so ka lɛ yé maa ka drɔɔ vo fɔɔ, yé é gié é glɛ la.

¹¹ Maa dan féisɛrɛfɛnu si lɛ ka ma; wo ’ka dan kalé féifɛnu ble lɛ lo; kalé dɔrɔyilinu ’ka dan vo lɛ é pla lo. A zo lé lai sunyanu lé Gakelebale a fe.

¹² Naa, kalé tɛrɛ é dan kɛlɛ lɛ miginanama tɛrɛ nya, yé bɛn faa é dan a fe lɛ léé, kazé a néné. A zo lé lai sunyanu lé Gakelebale a fe.

Bale léé, ’é dan nyanai zén lɛ wo ta

¹³ Gakelebale léé: Ka a dére nyané fena an ma. Yé ka léé: Ko mɛ we ɛ fe i ma dére nyané nyaa?

¹⁴ Ka fé léé: Kazambale bɔle tɔnɔ ’ka lo; ko tawo bli kyɛ dɔle nya lai sunyanu lé Gakelebale lé we ma, yé ko tawo alé weplalenu yɛrama, yé mɛ fɛ lé ko ye ’bɛ maa?

¹⁵ Sin, é dɔ ko gi léé, boblɛnzan zé a néné; iin, we faa nyian éé woo mi nyanénu lɛ. Iin, woo Kazambale gi daan yé we do ’ka kɛla wo lɛ lo.

¹⁶ Yé munu lé woo kanaan Gakelebale lee, wo we fe ’wo ke lɛ, yé Gakelebale é tɔné dɔ yé é a ’ma; yé wo sɛbɛ do gyɛ Gakelebale yuɛ va, munu lé woo kanaan a lee, ’té wa tɔ bɔa, wo sele dɔle a gi we ma.

¹⁷ Lai sunyanu lé Gakelebale léma: Yian nya lé maa anlé fɛnu ma’lɛrɛ, wo dan kɛlɛ lɛ anlé fɛwezannu nya. Maa dan wezin kɛlɛ lɛ wo lɛ, bélé mi éé wezin kɛla ’é lɛdɔmabe lɛ fɛan zo, a zo.

¹⁸ Yé ka dan a ye lɛ é ziin léé, mi tegele zé a é yɛrama, yé mi nyané zé a é yɛrama; mi lé ’bɛ éé Bale bɔa, ’bɛ zé a é yɛrama, yé mi lé ’bɛ ’ka Bale bɔa lo, ’bɛ zé a é yɛrama.