Malasi 2 - Kazambale lé Sebe Sauunu 1979

¹ Sin, ’kaa Balebanzannu, ka lɛ lé maa we ’ko fe.

² Dé ka ’ka tɔné dɔ lɛ an lɛ lo, dé ka ’ka a pa lɛ ka bli gi léé, ka an tɔ bɔ lo, maa dan bale pa lɛ ka ma, yé fɛ lé ke ka drɔɔvofɛ nya é kyɛn, maa dan bale pa lɛ ’bɛ ma. Iin, maa dan bale pa lɛ wo ma; ka ’ka an dére pa lɛ ka bli gi lo, azama. A zo lé lai sunyanu lé Gakelebale a fe.

³ Ka ye, maa dan kalé vɔfɛnu sɛrɛ lɛ, yé maa dan kalé balebanwinu bo vuli lɛ ka yara yé wo dan go lɛ ka valé wonu nya ékeva.

⁴ ’Bɛna lé ka dan a gi dɔɔ lɛ léé, maa ɛ dére ’ko fe ka lɛ, léé, gipawe lé maa kɛlɛ Lévi va, yé é vo ana. A zo lé lai sunyanu lé Gakelebale a fe.

⁵ An gipawe lé maa kɛlɛ a va, é a gipawe lé éé mi bélié, ’té éé mi voo drɔɔ, a nya. Maa a kɛlɛ léé, ’é kana an lee; yé é kana an lee, weboen nya, yé a manyɔɔn an tɔ lé we ma.

⁶ Bélidɔwe bozen a a ’léé, yé mi ’ka weple do kpen yé a ’léé lo. É tawo maa va, we drɔɔ valé we tegele kɛlɛle nya, yé é mi kiɛre nɔla wenaané zuo.

⁷ Balebanzannu a lai sunyanu lé Gakelebale lé nwunvɔzannu nya. Bale wo nwunvɔ léé, munu ’é wedɔɔle ’ma wo ’léé, yé ’wo bélidɔwe gi laa wo lee.

⁸ Naa, ’kaa, kabozen zi saan; ka bélidɔwe kɛlɛ mi kiɛre saanfɛ nya, yé gipawe lé maa kɛlɛ Lévi va, yé ka sɛrɛ. A zo lé lai sunyanu lé Gakelebale a fe.

⁹ Ka ’ka tawo lɛ anlé zi ta lo; dé ka a bélidɔwe gi fena, ka mi vaboo, amalé maa dan ka kɛlɛ lɛ fɛ naané valé serelebomafɛ nya munu faa yuɛ gi.

Wo kɛlɛ Bale ma bélé gɔné gini le zo

¹⁰ Ko faa ti ’ka do loo? Bale do kpen‐an ko kɛlɛ loo? Mɛmalé ko yuɛi blan ko ke ma ko tinu lé gipawe sɛrɛle nyaa?

¹¹ Juda ébo gɔɔn yuɛiblanzan nya; wo bozowe kɛlɛ Jérusalɛm Izraɛl bɛn gi. Fɛ lé wa pa é yɛrama Gakelebale zé nya, ’té é sɔ Gakelebale lɛ bɛ, Juda a sɔnné sɛrɛ yé é yo lé lomu si.

¹² Mi lé é a kɛlɛ ’bɛ zo, dé é a miomian nya, Gakelebale é dan a kini lɛ Jakɔb lé munu ma. É dan a kini lɛ munu lé woo Gakelebale baan, wo ma.

¹³ We do lé ka kɛla é ziin, yee lé ke ’ko: ka yuɛyi éé zén‐é balebanna ta, ’té ka wuvɔa, ’té ka dunnuan; Gakelebale ’ka é ban‐ɛn blé lo, yé fɛ lé ka nɔ a lɛ é ’ka a si lɛ lo, amalé ka wuvɔa.

¹⁴ Yé ka léé: Mɛmaléé? I boronéla le lé bé si, ’té é kɛlɛ i bɔavazan nya bɛ, ’té ka gi pa do a nya bɛ, i yuɛi blan a ma, yé Gakelebale kɛlɛ ka fié lé wenayezan nya, azamalé é kɛlɛ.

¹⁵ Bale ’ka wo kɛlɛ lɛ mi do nya loo? Mɛmalé é wo kɛlɛ doo? É a a va léé, wo kulu ’é kɛlɛ Bale bɔzannu nya. Amalé ’ka yuɛ pa kaboen va, té ka va mi do kpen yuɛi é blan ’é boronéla le ma lo.

¹⁶ Gakelebale, Izraɛl lé Bale léma: Naa, le bɔrale za a an gi; mi lé alé glawe kɛlɛle sɔɔla, a za a an gi; amalé ’ka yuɛ pa kaboen va, té ka kɛlɛ yuɛiblanzannu nya lo. A zo lé Gakelebale a fe.

Webleyi bɔ é pu

¹⁷ Ka Gakelebale wɔlɛ gi nyaa é ma ka dére nya, yé ka léé, ’wo a wɔlɛ gi nyaa a ma mɛ nyaa? Ka fé léé: Miomian wenaané kɛlɛ, é a é zima Gakelebale yuɛ gi, yee ɛ Gakelebale gi nanaan. ’Bɛ dére ’ko ɛ Gakelebale wɔlɛi nyaa é ma; dé ’bɛ kaan lo, ka fé léé: We tegele kɛlɛ Bale a kyɛɛn?