Malasi 1 - Kazambale lé Sebe Sauunu 1979

Izraɛl sɔ Bale lɛ

¹ Dére lé Gakelebale a fe Izraɛl lɛ Malasi lɔlu nya, yee lo.

² Gakelebale léé: Ka sɔ an lɛ. Yé ka léé: Ko sɔ i lɛ kaa? Gakelebale léé: Ézau ’ka Jakɔb bwe nya loo? Duowo, Jakɔb sɔ an lɛ,

³ yé Ézau za a an gi. Maa kɛlɛ léé, té mi é nyana alé gɔnu ma lo, maa alé zaratɛrɛ nɔ gwenu lɛ.

⁴ Dé Édom a fe léé, ’wo sɛrɛ, ’wo dan fla pa lɛ a ’bin la, lai sunyanu lé Gakelebale léma: ’Wa pa ma, maa dan a zana lɛ, yé wo dan a laa lɛ wenaané kɛlɛtɛrɛ; munu lé Gakelebale bli éé flian wo ma yifaama, woo lé.

⁵ Ka dan a ye lɛ ka yuɛ nya, yé ka dan a fe lɛ léé: Gakelebale a blɛn Izraɛl lé tɛrɛ glɛ faa la.

Bale Balebanmunu mawe fe

⁶ Gakelebale we fe ’kaa Balebanzannu lɛ léé: Né é é ti lɛdɔama, yé mi leezan é ézan lɛdɔama. Dé maa a ka ti nya, kalé an lɛdɔmale a kyɛɛn? Dé maa a kazan nya, kalé kanale an lee a kyɛɛn? ’Kaa Balebanzannu, ka nyé yéli an tɔ ma yé ka léé: Ko nyé yéli i tɔ ma kaa?

⁷ Ka an ban fɛ naané nya, yé ka léé, ’wo i sɔnné sɛrɛ kaa? Ka fé léé: Gakelebale lé tablé a serelebomafɛ nya, yee lé.

⁸ Dé ka an ban trubɛ yuɛ ’wiile nya, ’bɛ ’ka é naané loo? Dé ka an ban tunbowi valé wi lé é zanai, a nya, ’bɛ ’ka é naané loo? ’Ka nɔ ka nwiinzan lɛ do, é dan we lɛ a maa? É dan a nyi si lɛɛ? A zo lé lai sunyanu lé Gakelebale a fe.

⁹ Sin, ’ka bazoro Gakelebale lɛ léé, a nyanai ’é zén ko ta. É dan ka si lɛ é zimaa? É si ka ɛ va. A zo lé lai sunyanu lé Gakelebale a fe.

¹⁰ Ka va mi kyɛn ɛ dan anlé kɔn lɛ tan lɛ léé, té ka kyɛ bi an banna ta é pla loo? Lai sunyanu lé Gakelebale léé: Kalé we ’ka an gi do boen nanaan lo; fɛ lé ka an ban a nya, maa ’ka dan an ban‐ɛn ble lɛ lo.

¹¹ É sia yiri nwale ma fɔɔ yé é bɔ yiri vɔle ma, an tɔ a blɛn bɛnnu faa méléna. Woo lasikɔrɔpo kyɛ blé an tɔ bɔle we ma fɛfaana, yé woo an baan fɛ zin nya, naa, an tɔ a blɛn bɛnnu faa méléna. A zo lé lai sunyanu lé Gakelebale a fe.

¹² Naa, ’kaa, ka an tɔ sɛra a fele nya léé: Gakelebale lé tablé a é naané, yé atafɛ a serelebomafɛ nya.

¹³ Yé ka léé: Mɛ wɔlɛinyaamawe lé ke bɛɛ? ’Té ka lɔlu kplililii bo a ma. A zo lé lai sunyanu lé Gakelebale a fe. Tunbowi lé ka a kyeenwo, ’té é zanai, yee lé ka dan a nya yé ka a kɛla an banfɛ nya. Maa dan ’bɛ ban‐ɛn ble lɛ kaa? A zo lé Gakelebale a fe.

¹⁴ Dablikɛlɛzan lé alé trubɛ gɔné a, yé é bale kun yé é Mizan ban wi kwééle nya, ’wo bale pa ’bɛzan ma ma. Lai sunyanu lé Gakelebale léma: Naa, maa a minwiinzan blɛn nya, yé an tɔ a kanamafɛ nya bɛnnu faa va.