Maak 9 - Kazambale lé Sebe Sauunu 1979

Jézu dɔbɛ nɔla gɔ nwiin

¹ Jézu lé wo lɛ é ziin léé: Munu lé wo ke ’ko, wo va mi kenu ’ka dan ga lɛ lo fɔɔ yé wa ye léé, Kazambale a é plale munu nwiin plɛplɛ. Maa fe ka lɛ.

² ’Bɛ zuo yi suiɛdo, Piɛri koo, Jak koo, Jan koo, Jézu wo si yé é go wo nya gɔ torole nwiin é yɛrama. A yara dɔbɛ nɔla wo yuɛ va;

³ alé sɔnu kɛlɛ nyananyana, yé wo kɛlɛ fu tata. Mian é sɔ zuruwo yé é kɛlɛ fu tata bélé sɔ ’ko zo, ’bɛzan ’ka tɛrɛ la ’ko lo.

⁴ Éli valé Moizi bɔra wo va, ’té woo glewoo Jézu va.

⁵ Yé Piɛri lé Jézu lɛ léé: Anzan, kaa vole ’ko a é zima; ’ko ban yaa dɔ ma; izé do, Moizi zé do, yé Éli zé do.

⁶ Gligli zén wo gi, bɛwemalé Piɛri ’ka wefedére dɔɔ lɛ lo.

⁷ Yé lafu tua wo nwiin, yé Bale we fe lafu gi yé é léé: Mi ’ko a an be lé é sɔ an lɛ é baba, a nya. ’Ka tɔné dɔ a lɛ.

⁸ ’Bɛna tɔɔn yé Jézu zuomunu ’wo zi gini, yé wo Jézu do kpen ɛ ye ’wo va.

⁹ Jézu valé é vamunu yaa ke aan wo gɔ zunna, Jézu lé wo lɛ léé, wean wa ye bɛ, té wa fe mi do kpen lɛ lo, fɔɔ ’té ’yee blami Be nwa ɛ wo gamunu va.

¹⁰ Wo we ’ko yɔɔ ’wo méléna, yé wo we laa ’wo ke lee léé: Mɛ fɛ ɛ ke mi nwale gamunu va nyaa?

¹¹ Jézu zuomunu we laa é lee léé: Mɛmalé sɛbɛgifemunu léé, é a lé Éli é da é viniin?

¹² Jézu a zi pa wo lɛ léé: Éli é dan da lɛ é vinin, weboen nya. É dan wenu faa dɔ lɛ wo dɔbɛ gi é ziin. Yé mɛmalé wo maa blami Be lé we gyɛ sɛbɛ gi léé, é a lé an nyané ble é baba yé wan ye boami nyaa?

¹³ Naa, maa lé ka lɛ léé, Éli da, yé fɛan zo lé é sɔ munu lɛ, wa kɛlɛ a lɛ a zo, alé wean wa gyɛ sɛbɛ gi, a yɛrama.

Né lé yo ke a gi, Jézu a béli

¹⁴ Wo bɔ aan wo Jézu zuomunu pɔnénu va, wo mi gu blɛn ye wo zi, ’té sɛbɛgifemunu a zavɔna wo va.

¹⁵ Mi gu Jézu ye tɔɔn, wo kɛlɛ wɛ, yé wo vlan si a vazia, wele a va we ma.

¹⁶ Yé Jézu we laa wo lee léé: Mɛ we ta lé ka a zavɔna wo vaa?

¹⁷ Yé mi gu va mi do a zi pa léé: Anzan, an da an be nya i va. Bobogyɛ yo a a gi.

¹⁸ Dé yo a kun fɛofɛana, éé a diaan tɛrɛ va, ’té né ’léé buiɛ éé bɔa; ’té éé suiɛ la blé; yé a wi faa tere éé plaan a ma. Maa zanté vɔ i zuomunu lɛ léé, wo yo si a gi, naa, wo ’ka bɔ lɛ a lɛ lo.

¹⁹ Jézu lé wo lɛ léé: Blipaanlo bɛn, ka léé, an lɛɛ nɔɔ ɛ kɛlɛ ka va faa ’lɛ yé ka bli é vo an lɛɛ? Ka léé, maa kɛlɛ kaa? ’Ka da a nya an va. Yé wo da a nya a va.

²⁰ Yo Jézu ye tɔɔn, é né manyɔɔn plɛplɛ. Né dia tɛrɛ va, yé é burula ’é ’léli buiɛ bɔle nya.

²¹ Jézu a laa a ti lee léé: A péli sia aan wo a lɛɛ nɔɔ loo? É léé: A péli sia a kiéné la.

²² Yé gɔnɔ kiɛre nya yo a diaan kyɛ valé ’yi va, alé zamaga wole we ma. Dé i bɔa we do kɛlɛle lɛ, ’i nyanai zén ko ta; ’i bɔ ko va.

²³ Jézu lé a lɛ léé: Mɛmalé i léé, dé an bɔalɛɛ? Mian éé bli paan, éé bɔa we faa kɛlɛle lɛ.

²⁴ ’Bɛna tɔɔn, gɔnéné ti siaa léé: An bli a i lɛ, naa, ’i bɔ an va anlé bli paan lo we ma.

²⁵ Jézu a ye aan wo léé, mi faa a dana ’é va, é siaa yo tiridɔle ta, yé é léé: Bii bobogyɛ yo lé i mi gya bobo nya ’té i mi tɔné ’wiié, ’i si né ’ko gi, té i wɔra a gi é dɛrɛ lo.

²⁶ Yé é si a gi siaalenu nya, yé é né manyɔɔn plɛplɛ. Né kɛlɛ bélé mi gale zo; bɛwemalé mi kiɛre léé, é ga.

²⁷ Naa, Jézu a kun é bɛ ma, yé é a nwa yé é dɔ loru.

²⁸ Jézu wɔra aan wo kɔn gi, ’té wa wo saa, a zuomunu a laa a lee léé: Mɛmalé ko ’ka bɔalɛ yé ko yo ’ko si né gi loo?

²⁹ É lé wo lɛ léé: Bazorole saa nya lé yo gɔnɔ ’ko zo éé sié mi gi.

Jézu é gale fale vɔ é ziin

³⁰ Yé wo si ’bɛna, yé wo Galilé tɛrɛ kini. É ’ka sɔ lɛ Jézu lɛ léé, munu a gi dɔɔ lo.

³¹ Yé é we paa é zuomunu gi, yé é lé wo lɛ léé: Wo dan maa blami Be pa lɛ munu lee, yé wo dan an gyɛ lɛ, yé dé wo an gyɛ faa, yi fié a yi yaazan nya an dan nwa lɛ é ziin.

³² Naa, a zuomunu ’ka we ’ko gi ’ma lɛ lo, yé wo kana a gi laale ma a lee.

Mi kyɛn a mi blɛn nyaa?

³³ Yé wo bɔ Kapɛnaum. Bléyian va lé wa kɔn gi, Jézu we laa wo lee léé: Mɛ lé za lé ka a vɔa lao ziaa?

³⁴ Naa, wo ta vo é dɔle. Wo za vɔ zia léé, dé wo va mi kyɛn ɛ ke mi blɛn nyaa? azama.

³⁵ Yé Jézu nyana, yé é mi vu ta fié laa, yé é lé wo lɛ léé: Dé é sɔ mian lɛ léé, ’é kɛlɛ mi vininzan nya, é a lé ’bɛzan ’é kɛlɛ mi voélazan nya; é valé mi faa wuozan nya.

³⁶ Yé é né kiéné do si yé é da a nya wo méléna, yé é a sia yé é a nyana é boro la, yé é lé wo lɛ léma:

³⁷ Dé miomian né kiéné ’ko zo sié anlé we ma, ’té éé maabozen sié é ziin, yé mian éé maa sié, maa‐an é an si lo, naa, mi lé é an pa zia, ’té ’bɛzan lé é a si.

Mi lé é ’ka ko ma lo, é a ko va

³⁸ Jan lé a lɛ léé: Mizan, ko mi do ye yonu sina munu gi i tɔ nya, yé ko a yi ga a lee. É ’ka ko va lo, ’bɛzama.

³⁹ Yé Jézu léé: Té ka a yi ga a lee lo. Mian éé gyɛzorowe kɛla an tɔ nya yé ’bɛ zuo tɔɔn yé é wenaané fe an ma, ’bɛzan ’ka lo.

⁴⁰ Mi lé é ’ka ko mazan nya lo, é a ko va.

⁴¹ Yé dé miomian é ’yi kanané do nɔ ka lɛ, ka kɛlɛle Krist zé nya we ma, maa lé ka lɛ webozen nya léé, ’bɛzan é dan a ma gooli ye lɛ kpɔ. É ’ka dan vuru lɛ a ma lo.

Mi gi danle

⁴² Naa, né kiénénu lé woo bli paan an lɛ, dé mi do wo va né do ’wuo sɛrɛ, azé fila vɔ kɔɔn léé, wo fɛzɔngɔlɛ yere a bɔrɔ ma yé wa vuli wɛyi va.

⁴³ Dé i bɛ i vɔ wenyané gi, bé kini; a fila vɔ léé, i vo é yuɛma la gi bɛ kinizan nya é mini i gole i bɛ fié nya jéɛna kyɛ lé é ’ka dirian monomono lo, a va ta,

⁴⁴ fɛana lé wo ziri ’ka gaan monomono lo, yé kyɛ ’ka dirian monomono lo, ana.

⁴⁵ Yé dé i gane i vɔ wenyané gi, bé kini; a fila vɔ léé, i vo é yuɛma la gi tunbozan nya é mini i gole i gane fié nya jéɛna kyɛ lé é ’ka dirian lo, a va ta,

⁴⁶ fɛana lé wo ziri ’ka gaan monomono lo, yé kyɛ ’ka dirian monomono lo, ana.

⁴⁷ Yé dé i yuɛ i vɔ wenyané gi, bé bɔra a gi; a fila vɔ léé, i wɔra Kazambale lé fla i yuɛ do kpen nya é mini wolé i vulile i yuɛ fié nya jéɛna kyɛ va ta,

⁴⁸ fɛana lé wo ziri ’ka gaan monomono lo, yé kyɛ ’ka dirian monomono lo, ana.

⁴⁹ Kyɛ é dan kɛlɛ lɛ mi faa ma wɛ nya.

⁵⁰ Wɛ a fɛ zin nya, naa, dé wɛ néné si é ma, mɛ fɛ nya lé wa kɛla nénéé? Wɛ ’é kɛlɛ ka ma ma, yé ’ka vo ka ke va drɔɔ ma.