Maak 8 - Kazambale lé Sebe Sauunu 1979

Jézu fɛ nɔ mi baa fié lɛ

¹ ’Bɛ bléyi ’ko va, mi gu blɛn zén ékeva é ziin, yé fɛblele ’ka wo lee lo. Jézu é zuomunu laa yé é lé wo lɛ léé:

² An nyanai éé zén‐é mi gu ’ko ta. A yi yaa lo ’té wa an va, ’té wo ’ka tan fɛ do kpen ble lɛ lo.

³ Wo va mi kenu sina a baa; dé an wo pa zia léé, ’wo go ’wo va lɔrɔ nya, wo dan zɔrɔ lɛ zia.

⁴ A zuomunu lé a lɛ léé: Kaa kɛlɛ kaa yé wo kan buru nya bwi gi ’koo?

⁵ Jézu a laa wo lee léé: Buru a ka lee nɔɔ? Wa zi pa léé: Sɔrafié.

⁶ Yé é mi gu nyana tɛrɛ va, yé é buru sɔrafié si, yé dé é Bale bɔ vɔ faa yé é a bɔi, yé é a nɔ é zuomunu lɛ, wolé a gulile munu ma we gi, yé wa guli mi gu ma.

⁷ Yé pɔné kenu a wo lee é ziin. Dé Jézu Bale bɔ vɔ faa, é a nɔ é zuomunu lɛ yé wa guli munu ma é ziin.

⁸ Yé wo fɛ ble yé wo kan, yé wo kyɛɛné sɔrafié fan a kurunu lé wo vo, wo nya.

⁹ Woo bɔa mi baa fié sɔnɔ. ’Bɛ zuo yé Jézu wo pa zia.

¹⁰ Tɔɔn, yé Jézu vɔ ’yitagoro gi, yee valé é zuomunu nya, yé é go Dalmanuta tɛrɛ la.

Munu tɔmase ma laa

¹¹ Farizimunu da yé wo kun zavɔle ma Jézu va a gi danle we gi. Wo léé, ’é tɔmase do si ’wo lɛ la gi.

¹² Jézu flin vɛɛɛn, yé é léma: Mɛmalé mi kulu ’ko éé tɔmase ma laan? Wo ’ka dan tɔmase gɔɔn lɛ mi kulu ’ko lɛ lo. Maa fe ka lɛ.

¹³ Yé é si wo va yé é vɔ é ziin ’yitagoro gi, gole ’yi gɔɔn bɛ ma we gi.

Farizimunu valé Érɔd lé lévɛn lé we

¹⁴ A zuomunu gi san yé wo ’ka go lɛ buru nya wo lee lo; é a wo lee goro gi do kpen.

¹⁵ Jézu we pla wo lɛ léé: ’Ka yuɛ pa kabozen va é zima Farizimunu valé Érɔd lé lévɛn lé we ma.

¹⁶ A zuomunu vo ’wo va we blena yé wo léé: Buru ’ka ko lee lo, ’bɛ lé we ma lé é a fe.

¹⁷ Jézu a ’ma aan wo, é léé: Mɛmalé ka a ka va we blena léé, buru ’ka ’wo lee lo, ’bɛ we maa? Ka bɔn‐in ’ka ka ma loo? Ka ’ka we gi maan loo? Ka tɔné gi a yuyuu?

¹⁸ Ka yuɛnu a, yé ka ’ka yɛrɛ yé loo? Ka tɔnénu a, yé ka ’ka we maan loo? We sele ’ka dɔa ka gi monomono loo?

¹⁹ An buru soru bɔi mi baa fié wuru soru zé nya, kyɛɛné nɔɔ lé ka fan a kurunu nyaa? Wa zi pa léé: Vu ta fié.

²⁰ Yé an buru sɔrafié bɔi mi baa fié zé nya, kyɛɛné nɔɔ lé ka fan a kurunu nyaa? Wo léé: Sɔrafié.

²¹ Yé é lé wo lɛ léé: Ka ’ka tan a gi ’ma lɛ loo?

Bɛtsaida yuɛwiizan béli

²² Yé wo go Bɛtsaida, yé munu da yuɛwiizan do nya Jézu va, yé wo zanté vɔ Jézu ma léé, ’é bɛ mane a ma.

²³ Yé é kun yuɛwiizan bɛ ma yé é goan fla gini ma, yé ’bɛ zuo é ’léli pa a yuɛ ta, yé é bɛ pla a ta, yé é we laa a lee léé: I fɛ do yee?

²⁴ Yé é fɛna gini, yé é léé: An munu yé, naa, maa wo yé bélé yilinu zo, ’té wa tawona.

²⁵ Jézu é bɛ pla é ziin a yuɛ ta. Yuɛwiizan fɛna gini aan wo téiin, é béli, yé é fɛna faa ye wéiin.

²⁶ Yé Jézu a pa zia léé, ’é go kɔn ’léé, yé é léé: Té i go fla dii lo.

Piɛri Jézu ta bɔra

²⁷ Jézu valé é zuomunu go flanu lé wo ke Sézaré Filip tɛrɛ la, wo ta. É we laa wo lee zia léé: Munu léé, maa a de nyaa?

²⁸ Wa zi pa léé: Wo léé, bii a mi batizéwozan Jan nya. Mi kenu léé, bii a Éli nya. A kenu léé, bii a balelayemunu va balelayezan do nya.

²⁹ Yé é lé wo lɛ léé: Yé ka nii? Ka léé, maa a de nyaa? Yé Piɛri a zi pa léé: Bii a Krist nya.

³⁰ Jézu a yi ga wo lee plɛplɛ léé: Fɛan zo lé ka an ta bɔra, té ka fe mi bɛnu lɛ lo.

Jézu é gale fale vɔ

³¹ Yé é kun we paale ma wo gi yé é léé: É a lé maa blami Be, an nyané ble é baba; é a lé mi segelenu koo, Balebanmunu segelenu koo, sɛbɛgifemunu koo, ’wo sɔn vɔ an ma; é a lé ’wo an gyɛ, yé yi fié a yaazan nya yé an nwa gamunu va.

³² É we ’ko fe kpaklaa. Yé Piɛri Jézu si wo va sɛ yé é we pla Jézu lɛ yara tɔntɔn nya.

³³ Naa, Jézu nɔla, yé é ’é zuomunu pɔné gini, yé é we fe Piɛri lɛ yara tɔntɔn nya yé é léé: Satan, ’i gyɛ i zuo. Wenu lé i gi bɔrɔan ’bɛ nya bɛ, Kazambale zé ’ka ’bɛ zo lo; munu zé bɛ.

³⁴ É mi gu valé é zuomunu laa aan wo, yé é lé wo lɛ léé: Dé é sɔ mian lɛ léé, ’é da an zuo, ’é bli si ébozen lɛ yé ’élé yiliblan sia yé ’é da an zuo.

³⁵ Naa, mian é sɔ a lɛ léé, é ’élé tɛrɛla kɛlɛ blɛn, é dan vuru lɛ a gi, yé mian é vuru we faa gi maa valé Wenéné ’ko lé we ma, ’bɛzan é dan ézé ye lɛ.

³⁶ Yé dé mi tɛrɛlafɛ faa ye, dé ébozen san, ’bɛ tɔnɔ lé ke mɛ fɛ nyaa?

³⁷ Yé mi éé mɛ fɛ no ébozen pa gii?

³⁸ Naa, mian éé yara gya maa valé an dérenu lé we ma, bléyi ’ko vamunu lé wo ke pɛnpɛnnégyɛzannu valé wenyanékɛlɛzannu nya, wo méléna, dé maa blami Be da an Ti lé fuasan nya, é valé lanje sauunnu nya an va, yara é dan an gyɛ lɛ ’bɛzan lé we ma é ziin.