Maak 7 - Kazambale lé Sebe Sauunu 1979

Juifinu tranu lé gɔnɔlawe

¹ Farizimunu valé sɛbɛgifemi kenu si Jérusalɛm, yé wo zén ékeva Jézu zi.

² Yé wa ye léé, a zuomi kenu fɛ ble ’wo bɛ ma tiri nya, ’bɛ gi léé, wo ’ka ’wo bɛ ma foli lɛ lo.

³ Dé Juifinu ’ka ’wo bɛ ma foli lɛ tata lo, wo ’ka fɛ blé lo, wo tranu gɔnɔlawe yɛrama, yé wolé Farizi palu ɛ ke we ’ko gi plɛplɛ.

⁴ Dé wo si flɛ gi, dé wo ’ka zuru lɛ lo, wo ’ka fɛ blé lo. Wo gɔnɔlawe ana é ziin kiɛre. A kenu lé ke ’ko: ’yiminikananu zurule koo, ’yibɔnu zurule koo, zénébɔnu zurule koo, woo lé.

⁵ Farizimunu valé sɛbɛgifemunu we laa Jézu lee léé: Mɛmalé i zuomunu ’ka ’wo tranu gɔnɔlawe kɛla lo yé woo fɛ blé ’wo bɛ ma tiri nyaa?

⁶ Jézu a zi pa wo lɛ léé: Bodrɔzannu, ka mawe lé Ézai a fe balelawe fele nya, é a webozen nya. É a gyɛ sɛbɛ gi léé: Munu ’ko, woo an tɔ bɔa ’wo lɔlu nya, Naa, wo bli a é sile an ma baa.

⁷ Woo an bɔa é pla, ’Té woo gɔnɔlawenu paan munu gi bélé Bale lé bélidɔwe ɛ ke ’bɛ nya.

⁸ Ka daan Kazambale lé bélidɔwe ma, ’té ka ka tranu gɔnɔlawe kɛla.

⁹ Yé é lé wo lɛ é ziin léé: Ka Kazambale lé bélidɔwe kɛla we pla nya, kalé gɔnɔlawe kɛlɛle we gi. Ka bɔ ma.

¹⁰ Naa, Moizi a fe léé: ’I ti valé i bu lɛdɔma yé dé mian é bale pa é ti valé é bu ma, ’wo we lɛdɔ ’bɛzan gi a gyɛle nya ma.

¹¹ Naa, ka léé: Dé mi do a fe é ti valé é bu lɛ léé: Gɔɔli lé an nɔ dan a nɔ lɛ i lɛ, é a kɔban nya, ’bɛ gi léé, Bale blan lé,

¹² ’té ka ’ka a nyi sié léé, ’bɛzan é ti valé é bu mawe kɛlɛ é ziin lo.

¹³ Amalé ka Kazambale dére kɛla we pla nya gɔnɔlawe lé ka a dɔ bɛ, a nya. Yé ka ’bɛ zo we bɛnu kɛla é ziin di.

Fɛnu lé woo mi tiri dɔa

¹⁴ ’Bɛ zuo, é mi gu laa é ziin léé, ’wo go ’é va yé é lé wo lɛ léma: ’Ka faa tɔné dɔ an lɛ yé ’ka we ’ma ma.

¹⁵ Fɛ lé mi a blé, ’bɛ ’ka bɔa mi tiri dɔle lɛ lo, naa, we lé éé sié mi gi, yee ɛ mi tiri dɔa.

¹⁶ Mi lé we ’ma tɔné ke a ’wuo ma, ’bɛzan a ’ma ma.

¹⁷ É si aan wo munu va yé é wɔra kɔn gi, a zuomunu gɔnévɔle ’ko gi laa a lee.

¹⁸ Yé é lé wo lɛ léma: Ka é ziin, ka gi ’ka é kinile loo? Ka ’ka a ’ma lɛ léé, fɛ lé mi a blé, ’bɛ ’ka bɔa mi tiri dɔle lɛ lo loo?

¹⁹ ’Bɛ ’ka goo a bli gi lo; éé goo a bɔn gi yé éé goo fɛyɔɔna. We ’ko fele nya lé Jézu fɛ faa kɛlɛ blefɛ nya.

²⁰ É lé é ziin léé: We lé éé sié mi gi, yee ɛ mi tiri dɔa.

^21-23 Naa, gibɔrɔle naané koo, leginile valé gɔnéginile koo, pɛnpɛnnégyɛle koo, mi gyɛle koo, kyeenwole koo, bli bɔle gɔɔli ma koo, wenyané koo, dabliwe koo, we vɔnle koo, yuɛ bɔle mi bɛ lé fɛ ma koo, mi tɔ sɛrɛle koo, boblɛn koo, ’tugyɛwe koo, wenaané faanu ’ko, woo ɛ sié mi gi, yé woo ɛ mi tiri dɔa.

Siri‐Fénisi le lé blipale

²⁴ Jézu si aan wo ’bɛna, yé é go Tii valé Sidɔn tɛrɛ la. É wɔra kɔn do gi. É sɔ a lɛ léé, té mi do kpen a gi dɔɔ lo, naa, a yɔɔna ’ka lo.

²⁵ Naa, le do lé yo tiridɔle ke a lu gi, é Jézu lé we ’ma aan wo, yé é da yé é dia a gane wuo.

²⁶ Le ’ko a bɛn bɛ le nya, é si Siri‐Fénisi tɛrɛ la. É zanté vɔ Jézu lɛ léé, ’bɛ ’é yo si é lu gi.

²⁷ Jézu lé a lɛ léma: É a lé nénu ’é kan é vinin ma. Dé wo nénu lé buru si yé wa vuli blénnénu lɛ ’naan, ’bɛ a é zimaa?

²⁸ Yé lezan a zi pa a lɛ léé: Gba, Mizan, naa, blénnénu lé ke tablé wuo, nénu lé buru vuun lé éé zanaan, wa blé.

²⁹ Yé Jézu lé a lɛ léé: Eɛ, ’i go. I dére ’ko lé we ma, yo si i lu gi.

³⁰ Lezan wɔra aan wo élé kɔn gi é ziin, yé é bɔ é lu ma é yiale yialafɛ ta, ’té yo si a gi.

Jézu tɔnéwiizan dére minizan béli

³¹ Jézu si Tii tɛrɛ la, yé é Sidɔn kini yé é fla vu lé tɛrɛ kini yé é bɔ Galilé wɛyi va.

³² Tɔnéwiizan do lé a dére éé minian, wo goan Jézu va. Wa laa Jézu lee dunu vɔ ma dére nya léé, ’é bɛ pla a ta.

³³ Yé Jézu a si mi gu va é yɛrama yé é bɛnwɔlɛ wɔra a tɔné gi, yé é ’léli mane a nɛnɛ ma.

³⁴ Yé é yara nwa lagi zia, yé é flin, yé é léé: Éfata. ’Bɛ gi léé, i ’léé lɛ ’é fuo ma.

³⁵ Tɔɔn, a tɔné fuo, yé a bɔrɔ gi polu si, yé a dére drɔ.

³⁶ Yé Jézu lé wo lɛ léé, té wa fe mi do kpen lɛ lo. Naa, Jézu ke aan wo we ’ko plana wo lɛ, wolé we ’ko zuo fele gi gyɛ é ziin.

³⁷ Wo gi faa vuru ’wo ma yé wo léma: Éé we faa kɛla é zima; éé tɔnéwiizannu tɔné fuoan yé éé bobogyɛzannu bélié.