Maak 6 - Kazambale lé Sebe Sauunu 1979

Wo sɔn vɔ Jézu ma Nazarɛt

¹ Yé Jézu si ’bɛna yé é go ’élé tɛrɛ la. Yé a zuomunu go a zuo.

² Flinyi bɔ aan wo, yé é kun we paale ma munu gi bazorokɔn gi. Mi kiɛre lé wo we ’ko ’ma, wo gi vuru, yé wo léma: É we ’konu ye kyɛɛn? Mɛ wedɔɔle lé é ke a lee ’koo? É kɛlɛ kaa yé éé ’bɛ zo gyɛzorowenu kɛlaa?

³ É ’ka yilinyaazan nya loo? Yé é ’ka Mari be nya loo? Jak koo, Jozé koo, Juda koo, Simɔn koo, wo ’ka a zuanénu nya loo? Yé a zuané lomu ’ka ko méléna ’ko loo? Yé bli vole Jézu lɛ kɛlɛ wo ma tɔntɔn.

⁴ Naa, Jézu lé wo lɛ léma: Balelayezan lé tɛrɛ la koo, a lelenu méléna koo, alé kɔn gi koo, wona saa lé woo balelayezan yé boazan nya.

⁵ É ’ka bɔ lɛ gyɛzorowe bɛ do kpen kɛlɛle lɛ ’bɛna lo, ’té dé é ’ka a bɛ plale gyɛgyɛmi kenu ta nya, yé ’é wo béli, lo.

⁶ Wo ’ka ’wo bli vo lɛ a lɛ lo, amalé a gi vuru. Yé Jézu go élé fla zi fla bɛnu ta yé é we paa munu gi.

Jézu mi vu ta fié nwunvɔ

⁷ Yé é va mi vu ta fié laa, yé é kun wo nwunvɔle ma mi fié mi fié. Yé é a se kɛlɛ wo lɛ léé, ’wo yo tiridɔlenu kele.

⁸ Yé é lé wo lɛ léé, té wo fɛ do kpen sia tawofɛ nya lo, ’té dé é ’ka tawomayili nya lo, té wo fɛ do kpen sia lo; buru koo, bala koo, gɔɔli koo, té ’wo goan lo.

⁹ Yé é léé, ’wo sawala wo ’wo gane ma, té ’wo varɔ fié zén ’wo ta lo.

¹⁰ ’Bɛ zuo yé é lé wo lɛ léma: Dé ka go kɔn‐an ’léé, dé wo ka si bɛn nya, ’ka vo ana fɔɔ yé ka goyi é bɔ.

¹¹ Dé fɛdona munu ’ka ka si lɛ bɛn nya lo, yé wo ’ka ’wo tɔné dɔ lɛ ka lɛ lo, ’ka si ’bɛna, yé ’ka wo ma we fe wolé fla vungoi puole nya ka gane ma.

¹² Wo go, yé wo we fe munu lɛ léé, ’wo bli nɔla.

¹³ Yé wo yonu kiɛre si munu gi, yé wo nyɔnɔ too gyɛgyɛmunu kiɛre yara, yé ’bɛnu béli.

Mi batizéwozan Jan ga

¹⁴ Jézu tɔ kɛlɛ blɛn. Gyamalati Érɔd Jézu lé we ’ma aan wo, yé é léé: Mi batizéwozan Jan ɛ nwa gamunu va, amalé éé gyɛzorowenu kɛla.

¹⁵ Mi kenu léé: Éli lé. Yé mi kenu léé: Balelayezan lé. É a bélé balelayezan do zo.

¹⁶ Naa, Érɔd a ’ma aan wo, yé é léma: Jan lé maa a ’wuo kini, yee ɛ nwa bɛ.

^17-20 Wean ma lé é dɔ a gi a zo, yee lé ke ’ko: Érɔd zuané do ana wa laama Filip; ’bɛ na ana, wa laama Érodias; yé Érɔd é zuané Filip na Érodias si é na nya. Yé Jan lé a lɛ léé: A se ’ka i lɛ léé, i zuané na si i na nya lo. Amalé Érodias bli fli Jan ma, yé é sɔ a lɛ léé, ’é a gyɛ, naa, é ’ka zi ye lɛ lo. Érɔd kana Jan lee. É Jan ye mi tegele valé mi sauun nya, yé é a ta béli dɔ. É Jan lé wefele ’ma aan wo, a gi vuru, ’té éé tɔné dɔa a lɛ gi nanale nya. Naa, Érodias lé we ma é munu nwunvɔ Jan kunna, yé wa vɔ bokɔn gi yé wo gɔgɔbale vɔ a ma.

²¹ Yi lé Érodias zi ye a nya, é a Érɔd yaayi nya. ’Bɛ yi la Érɔd fɛti kɛlɛ élé mi blɛnblɛnnu koo, sunyanu nwiinzannu koo, Galilé mi segelenu koo, woo lɛ.

²² Yé Érodias lu bɔra a gi nɛnɛ bole nya wo méléna, yé ’bɛ sɔ Érɔd valé munu lé wo ke é nyanale a va bɛ, wo lɛ. Yé Érɔd lé blɛnzan lɛ léma: Dé fɛofɛan sɔ i lɛ, bé laa an lee, yé maa a nɔ i lɛ.

²³ Yé é yo ble a lɛ léé: Dé i fɛan laa an lee, yee lé maa dan a nɔ lɛ i lɛ. Dé bé fe léé, maa anlé tɛrɛ fee bɛ do nɔ i lɛoo, maa nyi sié.

²⁴ Blɛnzan bɔra aan wo, é lé é bu lɛ léé: Mɛ fɛ lé maa laan a lee? Yé a bu a zi pa léé: ’I mi batizéwozan Jan ’wuo laa a lee.

²⁵ Yé é wɔra minwiinzan va é ziin é kelekele, yé é lé a lɛ léma: É sɔ an lɛ léé, i mi batizéwozan Jan ’wuo nɔ an lɛ siɛti ta é nya do.

²⁶ Yé gyamalati bli kyɛ dɔ, naa, alé yoblele valé fɛtikɛlɛmunu lé we ma, é ’ka a gba vɔ lɛ lo.

²⁷ Yé a bléyi duo nya é sunya pa zia léé, ’bɛ ’é da mi batizéwozan Jan ’wuo nya.

²⁸ Yé sunya go mi batizéwozan Jan ’wuo kini lɛ bokɔn gi, yé é da a ’wuo nya siɛti ta. É a nɔ blɛnzan lɛ, yé blɛnzan a nɔ é bu lɛ.

²⁹ Jan zuomunu a ’ma aan wo, wo da a gale kuru sia lɛ, yé wa pa. We ’ko ma lé, Érɔd Jézu lé gyɛzorowe kɛlɛlenu we ’ma aan wo, é léé: Jan lé maa a ’wuo kini, yee ɛ nwa bɛ.

Jézu fɛ nɔ mi baa fié wuru soru lɛ

³⁰ Nwunvɔzannu zén ékeva Jézu va yé we faa lé wa kɛlɛ koo, we faa lé wa paa munu gi koo, wa zuo faa fe a lɛ.

³¹ Yé Jézu lé wo lɛ léma: Kaa nwa fɛkona, kaa go bwi gi, kaa flin sɛ. Naa, mi ke éé goo, ’té mi ke éé dan, amalé wo ’ka bléyi do ye lɛ yé wo fɛ ble lo.

³² Yé wo vɔ ’yitagoro gi, sile ana yé wo go bwi gi we ma.

³³ Mi kiɛre wo gona ye yé wo wo dɔɔ. Yé fla faa la munu vlan buru ’wo gane la, yé fɛana lé wa gona wo bɔ ana wo ’lɛ.

³⁴ Jézu zun aan wo ’yitagoro gi, é mi gu blɛn ye. Wa bélé ’blanu lé wo tabinzan ’ka lo, wo zo; amalé Jézu nyanai zén wo ta, yé é kun we kiɛre paale ma wo gi.

³⁵ Yiri bɔ aan wo baa, Jézu zuomunu bié ’é va, yé wo léé: Fɛkona a bwi gi nya, yé yiri bɔ baa tɛkɛ;

³⁶ ’i wo nwunvɔ fɛblele lɔle we gi, féinu lé ke kaa zi, é valé flanu nya bɛ, ana.

³⁷ Jézu a zi pa wo lɛ léé: Kabozen ’ka fɛblele nɔ wo lɛ. Naa, wo lé a lɛ léé: É a lé ko moné sɔraa nyanama ma gɔɔli si yé ko go wolé fɛ lɔ a nyaa?

³⁸ Yé é lé wo lɛ léma: Buru a ka lee nɔɔ? ’Ka go a nagini. Wo go a nagini lɛ, yé wo léé: É a soru, yé pɔ a fié.

³⁹ Yé é lé wo lɛ léé: ’Ka munu faa nyana ’wo palu ma palu ma, lu drɔɔdrɔɔ ta.

⁴⁰ Yé wo nyana é bale nya. A bale kenu a mi yɔ soru, a bale kenu a mi yɔ fié wɔlɛ vu.

⁴¹ Jézu buru soru valé pɔ fié si, yé é yara nwa lagi zia yé é Bale bɔ vɔ. Yé é buru bɔi yé é a nɔ é zuomunu lɛ, wolé a nɔle mi gu lɛ we gi. Yé é pɔ fié guli wo faa ma.

⁴² Yé wo faa fɛ ble yé wo kan.

⁴³ Yé wo kyɛɛné vu ta fié fan buru kurunu valé pɔ kurunu lé é vo, a nya.

⁴⁴ Munu lé wo fɛ ble, wo va gɔnénu a mi baa fié wuru soru.

Jézu tawo wɛyi ta

⁴⁵ ’Bɛ zuo tɔɔn, Jézu é zuomunu tunu léé, ’wo vɔ ’yitagoro gi, yé ’wo gié yé ’wo go Bɛtsaida, yé yeebozen munu pa zia.

⁴⁶ Jézu wo yai vɔ aan wo, yé é go bazoro lɛ gɔ nwiin.

⁴⁷ Nyanadi fɔfɔ, ’té ’yitagoro bɔ wɛyi worona. ’Té Jézu vo é do tɛrɛ va.

⁴⁸ É a ye léé, fu a giéna wo yara zia plɛplɛ, amalé ’yitagoro vɔle a tɔntɔn. É béli, manegɔné vinin wele nya, é go wo vazia tawole nya wɛyi ta, yé é a a va léé, ’é giéan wo ta.

⁴⁹ Wa ye aan wo tawona wɛyi ta, é dɔ wo gi léé, mi léli lé, yé wo vo siaana.

⁵⁰ Wo faa a ye, yé di kini wo gi. Kele tɔɔn Jézu we fe wo lɛ, yé é léé: ’Ka bli ta dɔ plɛplɛ. Maa lé. Té ka kana lo.

⁵¹ Yé é vɔ wo va ’yitagoro gi, yé fu daan giéle ma. Yé wo gi faa vuru ’wo ma.

⁵² Wo tɔné gi a yuyu, amalé gyɛzorowe lé Jézu a kɛlɛ buru nya bɛ, wo ’ka a gi ’ma lɛ lo.

Jézu munu béli Jénésarɛt

⁵³ Dé wo wɛyi kini faa yé wo bɔ Jénésarɛt tɛrɛ la, wo goro polu dɔ.

⁵⁴ Wo zun aan wo ’yitagoro gi tɔɔn, munu Jézu dɔɔ.

⁵⁵ Yé wo gié fɛfaana yé wo kun dale ma gyɛgyɛmunu nya yialafɛnu ta Jézu va. Dé wa ’ma léé, é a fɛofɛana, wo go wo nya ana.

⁵⁶ Dé é bɔ fɛofɛana, dé é a féi nyaoo, dé é a fla kiéné nyaoo, dé é a fla kuru ’léé nyaoo, woo gyɛgyɛmunu plaan fla vuun la, yé woo zanté vɔa a ma léé, ’wo bɛ mane ilé sɔ lɔlu ma é pla. Yé wo faa lé wo bɛ mane a ma, wo béli.