Maak 5 - Kazambale lé Sebe Sauunu 1979

Gadaré yoagizan béli

¹ Wo bɔ wɛyi gɔɔn bɛ ma, Gadaré munu lé tɛrɛ la.

² Jézu si aan wo ’yitagoro gi yé é zu, kele tɔɔn mi do lé yo tiridɔle ke a gi, é si mipana yé wo kee a nya.

³ Mi ’ko éé nyanaan mipana. Wo ’ka bɔa a yerele lɛ é ziin lo, dé é a gɔgɔbale nyaoo, wo ’ka bɔa a yerele lɛ duowo lo.

⁴ Gɔnɔ kiɛre nya woo foliɛwɔlɛ vɔa a gane ma, yé wa yere gɔgɔbalenu nya; naa, éé gɔgɔbalenu kinié yé éé foliɛwɔlɛnu yélié, yé plɛplɛ ’ka mi do kpen lee yé ’bɛ é mi ’ko kele lo.

⁵ Bléyi faa ma bladi nyanadi, é a gɔ nwiin, mipana, yé é vo siaana, yé ’té é ébo tuoan gɔlɛnu nya.

⁶ É Jézu ye aan wo baa é vlan si, yé é go a va, yé é dia é bli la a ’lɛ,

⁷ yé é siaa dére plɛplɛ nya léé: Loruzan Bale Be Jézu, mɛmalé i we kolé we maa? Maa lé i lɛ Bale tɔ nya léé, té i nyané pa an ta lo.

⁸ ’Té Jézu a fena a lɛ léé: Yo tiridɔle, ’i si mi ’ko gi.

⁹ Yé é a laa a lee léé: I tɔ lé nɔɔ? Yé é a zi pa a lɛ léé: Ko a kiɛre, amalé woo an tɔ laama Léjɔn.

¹⁰ Yé é zanté vɔ a lɛ léé, té é ’wo bin tɛrɛ ’ko la lo.

¹¹ Suru palu blɛn do a fɛ blena wo sɔnɔ gɔ bɔn la.

¹² Yé yonu zanté vɔ Jézu lɛ léé: ’I ko pa zia surunu ’ko va, yé ko wɔra wo gi.

¹³ Yé é zi nɔ wo lɛ léé, ’wo go. Yé yo tiridɔlenu si gɔnézan gi, yé wo wɔra suru palu gi, yé ’bɛnu go vlan nya yé ’bɛnu gɔ nyé zunle wééé zun za ma, yé ’bɛnu zén wɛyi va. Dé wo ’léé éé bɔa suru baa doo? yé wo ga wɛyi va.

¹⁴ Yé wo tabinmunu ’wii vlan nya, yé wo we ’ko nwɛɛn fla valé a zi tɛrɛ faa la. We lé é bɔ ana mi, munu go a nagini lɛ.

¹⁵ Wo da Jézu va, yé yoagizan lé Léjɔn ke a gi turu, yé wa ye é nyanale, sɔ nya é ta, ’té a ’wuo gi a é pla. Yé di kini wo gi.

¹⁶ We lé é bɔ yoagizan valé surunu ma bɛ, anayemunu a zuo fe.

¹⁷ Yé wo kun zanté vɔle ma Jézu lɛ léé, ’é si ’wolé tɛrɛ la.

¹⁸ Jézu a vɔna aan wo ’yitagoro gi, mi lé Jézu yo si a gi, é zanté vɔ Jézu lɛ léé: ’An vo i va.

¹⁹ Jézu ’ka a nyi si lɛ lo, naa, é lé a lɛ léé: ’I go ilé kɔn ’léé, ilé munu va, yé we faa lé Mizambale a kɛlɛ i lɛ, é valé fɛan zo lé é nyanai zén i ta, bé zuo faa fe wo lɛ.

²⁰ Yé é go, yé we faa lé Jézu a kɛlɛ a lɛ, é kun a zuo fele ma fla vu lé tɛrɛ la. Yé wo faa gi vuru.

Jairus lu valé lezan lé é bɛ mane Jézu lé sɔ ma

²¹ Jézu vɔ ’yitagoro gi yé é bɔ wɛyi zi, yé mi gu blɛɛn zén ékeva a zi. É a wɛyi gɔ la.

²² Yé bazorokɔnzan do lé, wa laama Jairus, é da. É Jézu ye aan wo, é ébo dia a gane wuo,

²³ yé é zanté vɔ a ma dunu vɔ ma dére nya léé: An luné a gana; ’i da, ’i bɛ pla a ta a bélile we gi, yé é vo é yuɛma.

²⁴ Yé Jézu go a zuo. Yé mi gu blɛn zén a zuo yé wa tunu.

²⁵ Naa, lezan do ana, é vɔ lomu va lɛɛ vu ta fié, ’té é ’ka sié a ma lo.

²⁶ É nyané ble gole dɔtrɔnu kiɛre va we ma, yé é élé gɔɔli faa sɛrɛ a we gi, yé alé gyɛ fila do kpen ’ka vɔ lɛ lo, naa, a taa nwa é ziin.

²⁷ É Jézu tawe ’ma aan wo, é gié mi gu worona Jézu zuo zia yé é bɛ mané ’bɛlé sɔ ma.

²⁸ Yé é léma: Dé an bɔ an bɛ manele lɛ alé sɔ ma é pla, ’té an dan béli lɛ.

²⁹ A bléyi duo nya tɔɔn, a nyɛ bɔle kini, yé é a gi dɔɔ ébo ma lé, ’é béli.

³⁰ Kele tɔɔn Jézu a gi dɔɔ é bli gi léé, élé plɛplɛ do nyanama pa, yé é nɔla munu méléna, yé é léé: De ɛ é bɛ mane anlé sɔ maa?

³¹ Yé a zuomunu lé a lɛ léma: Mi gu lé ke i tununa bɛ, bé yé ’naan, yé bii léé, de ɛ é bɛ mane ’é maa?

³² Yé é a é zi ginina, mi lé é we ’ko kɛlɛ, a yele we ma.

³³ Lezan kana é baba, yé gligli zén a gi. Wean é kɛlɛ a kɔlɛ gi, é a gi dɔɔ. Yé é da yé é dia a gane wuo, yé é webozen faa fe a lɛ.

³⁴ Yé Jézu lé a lɛ léma: An lu, ilé blipale ma lé i béli; ’i go drɔɔ ma, i béli.

³⁵ É a tan we fena aan wo, munu si bazorokɔnzan lé kɔn ’léé yé wo léma: I lu ga. Mɛmalé i Mizan wɔlɛ gi nyaan é ma é ziin?

³⁶ Naa, Jézu é tɔné sia dére ’konu la yé é lé bazorokɔnzan lɛ léé: Té i kana lo; i bli ’é vo an lɛ é pla.

³⁷ É ’ka a nyi si lɛ léé, mi do kpen é go é zuo lo, ’té dé é ’ka Piɛri koo, Jak koo, Jak zuané Jan koo, wo nya lo.

³⁸ Wo bɔ aan wo bazorokɔnzan lé kɔn ’léé, yé Jézu mi gu ye é dɔle ’wo gane ta, ’té munu éé wuvɔa, ’té woo siaan plɛplɛ.

³⁹ É wɔra kɔn gi yé é lé wo lɛ léma: Mɛmalé ka siaan? Mɛmalé ka wuvɔaa? Blɛnné ’ka é gale lo, naa, é a yigyɛna.

⁴⁰ Yé wa ma we nana. É munu faa bɔra aan wo, yé blɛnné ti koo, a bu koo, munu lé wo da a va koo, é go wo nya, yé wo go fɛana lé blɛnné ke, ana.

⁴¹ Yé é kun a bɛ ma, yé é lé a lɛ léma: Talita kumi, ’bɛ gi léé: Blɛnné, maa lé i lɛ léé, ’i nwa.

⁴² A bléyi duo nya blɛnné nwa, yé é kun tawole ma. A lɛɛ a vu ta fié. Yé wo ta dan wo ma.

⁴³ Yé Jézu lé wo lɛ yara tɔntɔn nya léé, té wo we ’ko fe mi do kpen lɛ lo. Yé é lé wo lɛ léé, ’wo fɛ nɔ blɛnné lɛ ’é a ble.