Maak 4 - Kazambale lé Sebe Sauunu 1979

’Savɔzan ma gɔnévɔle

¹ Jézu kun we paale ma munu gi é ziin wɛyi gɔ la. Mi gu blɛɛn zén aan wo a zi, yé é vɔ ’yitagoro gi wɛyi ta, yé é nyana. ’Té mi gu faa a é nyanale wɛyi gɔ la.

² Yé é we kiɛre paa wo gi gɔnévɔlenu nya. Yé é we paa wo gi léma:

³ ’Ka tɔné dɔ. ’Savɔzan go ’sa vɔ lɛ.

⁴ É a nwɛɛnna aan wo, a wɔlɛ kenu dia zi sɔnɔ, yé mianénu da, yé wa ble.

⁵ A wɔlɛ kenu dia paala, fɛana lé gɔlɛnu ke yé tɛrɛ ’ka kiɛre lo, ana; ana tɛrɛ boro ’ka lo, amalé a gɔn bɔ é kele.

⁶ Naa, a suni ’ka go lɛ baa lo, amalé dé yiri bi, é a kyɛ ble yé é ga.

⁷ A wɔlɛ kenu dia lélinu va; yé lélinu toro, yé wa tunu yé é ga, yé é ’ka ’é wɔlɛ do kpen baa lɛ lo.

⁸ A wɔlɛ kenu dia tɛrɛ zima ta, yé a gɔn bɔ, yé é toro, yé a wɔlɛ baa, yé a nɛnɛ do wɔlɛ kɛlɛ yɔ do wɔlɛ vu, a nɛnɛ do wɔlɛ kɛlɛ yɔ yaa, a nɛnɛ do wɔlɛ kɛlɛ yɔ soru.

⁹ Yé é léma: Mi lé we ’ma tɔné ke a ’wuo ma, ’bɛzan a ’ma ma.

Wean ma lé Jézu gɔné vɔ

¹⁰ Mi faa fwila aan wo, mi pɔnénu valé a zuomunu vu ta fié lé wo vo a zi, wo gɔnévɔlenu gi laa a lee.

¹¹ Yé é lé wo lɛ léma: Wa se kɛlɛ ka lɛ léé, ka Kazambale plale mi nwiin lé weyɔɔlenu dɔɔ, naa, woo mi pɔnénu zé fé gɔnévɔlenu nya,

¹² léé, dé wa nagini, wo ’ka a yé lo; yé dé wo tɔné dɔ, wa maan, naa, wo ’ka a gi maan lo; dé wo da ’wo bli nɔla yé Bale é wo ma we vo.

¹³ Yé é a laa wo lee léma: Ka ’ka gɔnévɔle ’ko gi ’ma lɛ lo, ka kɛla kaa yé ka gɔné bɛ vɔlenu faa gi ’maa?

Jézu ’savɔzan ma gɔnévɔle gi fe

¹⁴ ’Savɔzan go ’sa vɔ lɛ, ’bɛ gi léé, mi do go Bale dére fe lɛ.

¹⁵ ’Sawɔlɛ lé é dia zi sɔnɔ, ’bɛ gi lé ke ’ko: dé mi kenu a dére ’ma, kele tɔɔn Satan éé dan yé Bale dére lé wa nwɛɛn wo bli gi bɛ, éé a sié.

¹⁶ A wɔlɛnu lé wo dia paala, ’bɛ gi lé ke ’ko: dé mi kenu Bale dére ’ma, é vinin wa nyi sié gi nanale nya,

¹⁷ naa, wo suni ’ka goo baa lo; wo ’ka yara paan we la lo, yé dé we tɔntɔn bɔle wo ma léé, ɛɛ, dé munu lé nyané pale wo ta Bale dére lé we ma léé, tɔɔn, éé kɛla wo diérawe nya.

¹⁸ A wɔlɛnu lé wo dia lélinu va, ’bɛ gi lé ke ’ko: dé mi kenu Bale dére ’ma,

¹⁹ tɛrɛla gi bɔrɔ palenu koo, dabli lé fua a kɛla munu lɛ koo, blibɔle fɛ bɛnu ma koo, woo Bale dére tunuan yé wo ma tɔnɔ ’ka kɛla lo.

²⁰ A wɔlɛnu lé wo dia tɛrɛ zima la, ’bɛ gi lé ke ’ko: dé mi kenu Bale dére ’ma, yé wa nyi sié, yé wo ma tɔnɔ éé kɛla, a do éé kɛla yɔ do wɔlɛ vu, a do éé kɛla yɔ yaa, yé a do éé kɛla yɔ soru.

Kyɛbɔ valé bɔ lé we

²¹ Yé Jézu lé wo lɛ léma: Mi kyɛn éé dan kyɛbɔ nya ’naan, yé é a wɔra bɔ wuoo? taa, yé é a wɔra yialafɛ wuoo? É ’ka a dɔraan kyɛbɔ dɔrana loo?

²² Fɛ lé ke é yɔɔle yé a ta ’ka dan bɔra lɛ lo, ’bɛ fɛ ’ka lo; yé kyeengiwe lé ’bɛ ’ka dan bɔra lɛ lo, ’bɛ ’ka lo.

²³ Mi lé we ’ma tɔné ke a ’wuo ma, ’bɛzan a ’ma ma.

²⁴ É lé é ziin wo lɛ léma: ’Ka yuɛ pa kabozen va we ’male lé we ma. I fɛ no mi lɛ fɛan zo, a zo lé wo dan izé nɔ lɛ, yé wo dan i zé taa pa lɛ.

²⁵ Mian fɛ ke a lee, wo dan fɛ nɔ lɛ a lɛ, naa, mian azé ’ka lo, fɛ lé é ke a lee, wo dan a si lɛ a lee.

Fɛwɔlɛ tinle lé we

²⁶ É lé é ziin léma: Kazambale plale mi nwiin a bélé fɛan zo lé mi éé ’sa vɔa, a zo,

²⁷ ’té éé yi gya béli, ’té éé vuoma bladi, yé fɛan zo lé ’sawɔlɛ gɔn éé bɔa, ’té éé tuuan, é ’ka a gi dɔɔa lo.

²⁸ Tɛrɛ éé fɛ dɔa é boan, é vinin a gɔn éé bɔa, ’bɛ zuo a nɛnɛ éé kɛla, yé a wɔlɛ éé kɛla a nɛnɛ gi.

²⁹ A tanale tɔɔn, a gyɛbléyi bɔ, yé wa gyɛ kɔblané nya.

Sénévéwɔlɛ ma gɔnévɔle

³⁰ É lé é ziin léma: Ko Kazambale plale mi nwiin daan mɛ fɛ maa? We kyɛn ɛ ke alé gɔnévɔle nyaa?

³¹ É a bélé sénévéwɔlɛ do zo. A kiéné mini tɛrɛ la fɛwɔlɛ faa ta.

³² Dé wa vɔ, éé toroan, yé é kɛlɛ blɛn, yé é mini zianyili faa ta, yé a blan éé sié, yé mianénu ’wo kɔn dɔa a kwɛɛ va.

³³ É we fe munu lɛ gɔné kiɛre ’ko zo vɔle nya; fɛan zo lé wo bɔa a ’male lɛ, é a fe wo lɛ a zo.

³⁴ É ’ka we pla do kpen fe lɛ lo, ’té dé é ’ka gɔnévɔle nya lo; naa, dé é vo é zuomunu saa va, ’té éé a gi fé wo lɛ.

Jézu fu plɛplɛ dɔ

³⁵ A yi duo nya, é nyanadi, Jézu lé é zuomunu lɛ léma: Kaa wɛyi kini ma.

³⁶ É mi gu pa zia aan wo, ’té é a wo va ’yitagoro gi, yé wo go wo nya a zo. Yé ’yitagoro bɛnu a wo va é ziin.

³⁷ Yé fu blɛn gié, yé wɛyi fɔrɔlenu zén ’yitagoro gi, fɔɔ ’yi bo bɔ goro gi.

³⁸ ’Té yeebozen a yi gyɛna ’yitagoro péli ma zia, ’té ’wuoplatafɛ a a ’wuo wuo. Wa vuo, yé wo lé a lɛ léé: Kozan, ko a zamaga wona, yé i ’ka ’bɛ gi bɔrɔ paan loo?

³⁹ É vuo aan wo, yé é siaa fu ta, yé é lé wɛyi lɛ léma: ’I dɔ. ’I vo flee. Yé fu dɔ, yé fɛ faa vo drɔɔ.

⁴⁰ Yé é lé wo lɛ léma: Mɛmalé kana zén ka gi ’bɛ zoo? Mɛmalé ka bli ’ka vo lɛ an lɛ loo?

⁴¹ Yé di blɛn kini wo gi, yé wo lé ’wo ke lɛ léma: Mi kaa lé ke ’ko, yé fu valé wɛyi boen yé wa lɛdɔamaa?