Maak 3 - Kazambale lé Sebe Sauunu 1979

Bɛgazan lé we

¹ Jézu wɔra bazorokɔn gi é ziin. Bɛgazan do ana mi.

² Ana munu vo Jézu naginina léé, dé é dan a béli lɛ flinyi nyaa? we dɔle a nwiin we ma.

³ Yé Jézu lé bɛgazan lɛ léé: ’I dɔ loru wo méléna.

⁴ A zuo yé Jézu we laa wo lee léé: A se a mi lɛ léé, é wezin kɛlɛ flinyi nya laa, taa, é wenyané ɛ kɛlɛɛ? É mi béli flinyi nya laa, taa, é mi gyɛɛ? Naa, wo vo é tadɔle.

⁵ Yé Jézu wo nagini bliflile nya. Wo tɔné gi ke aan wo é yuyu, é ’na Jézu ma, yé é lé gɔnézan lɛ léé: ’I bɛ soi. Yé ’bɛ é bɛ soi yé a bɛ béli.

⁶ Yé Farizimunu bɔra, yé kele tɔɔn wo valé Érɔd zuomunu wo Jézu ma we ble léé, ’wo kwa kuli ’wa gyɛ.

Mi gu lé wo ke wɛyi gɔɔn ma

⁷ Jézu valé é zuomunu si ’bɛna yé wo go wɛyi mazia. Mi kiɛre si Galilé tɛrɛ koo, Judé tɛrɛ koo,

⁸ Jérusalɛm koo, Idumé tɛrɛ koo, Juudɛn zi tɛrɛ koo, Tii zi tɛrɛ koo, Sidɔn zi tɛrɛ koo, wona, yé wo go a zuo. Wa mi gu blɛn bozen nya. We faa lé Jézu a kɛlɛ, wa ’ma aan wo wo da a va.

⁹ Yé é lé é zuomunu lɛ léé: ’Yitagoro kiéné do ’é vo yifaama ka lee, dé mi gu é da an tunu.

¹⁰ É mi kiɛre béli, amalé munu lé gyɛ ke wo gyɛna, wo ’wobo dia a wuo, wo bɛ manele a ma we gi.

¹¹ Yo tiridɔlenu a ye aan wo, wo dia a wuo, yé wo siaa léé: Bii a Kazambale Be nya.

¹² Yé é we gyɛ wo lɔlu la léé, té wo ’é gi fe lo.

Jézu mi vu ta fié si a va

¹³ ’Bɛ zuo yé é go gɔ ma, yé munu lé a bli bɔ wo ma é wo laa, yé wo go a va.

¹⁴ Yé é mi si wo va vu ta fié, léé, ’wo vo ’é va, yé ’wo go Bale lé we fe

¹⁵ yé é a se kɛlɛ wo lɛ léé, ’wo yonu si munu gi.

¹⁶ Mi vu ta fié lé é wo si, wo lé ke ’ko: Simɔn lé é a tɔ pa Piɛri koo,

¹⁷ Zébédé be Jak valé é zuané Jan koo, é wo fiénu tɔ pa Boanɛjɛ, ’bɛ gi léé, zagele kin‐anmazannu,

¹⁸ André koo, Filip koo, Baatélémi koo, Matio koo, Tɔmas koo, Alifé be Jak koo, Tadé koo, Zélɔt mi Simɔn koo,

¹⁹ Jézu pamunuleezan Kariɔtzan Judas koo, wo tɔ lé ke bɛ.

Jézu valé Béɛlzébul lé we

²⁰ Yé wo go kɔn ’léé, yé mi kiɛre da wo va é ziin, fɔɔ yé wo ’ka bɔa fɛ blele lɛ lo.

²¹ Wenu lé é bɔ mi, Jézu gɔnɔlamunu a ’ma aan wo, wo léé: A ’wuo a sɛrɛna, yé wo da a laa lɛ.

²² Yé sɛbɛgifemunu lé wo si Jérusalɛm, wo léma: Béɛlzébul a a gi; yonufaatagɔné lé plɛplɛ nya lé éé yonu sié munu gi.

²³ Jézu wo laa, yé é we laa wo lee gɔnévɔle nya léé: Satan é bɔa ébo binle lɛ kaa?

²⁴ Dé tɛrɛ do la munu a é kinile ékema, ’té tɛrɛ ’ko lé we ’ka bɔa mɔnle lɛ lo,

²⁵ yé dé kɔn do gimunu a é kinile ékema, ’té kɔn ’ko gimunu ’ka dan vo lɛ ana lo.

²⁶ Bɛwemalé dé Satan nwa ébozen ma, ’té ébo kulu ga, yé é ’ka bɔa mɔnle lɛ lo, ’té azé nyaa.

²⁷ Dé wo ’ka mi plɛplɛ yere lɛ é vinin lo, wo ’ka bɔa wɔrale lɛ alé kɔn gi yé wo alé fɛnu si gla nya lo, naa, dé wa yere faa, yé wo alé kɔngifɛnu sia gla nya.

²⁸ Maa a fe ka lɛ webozen nya léé, wenyanénu valé sɔnɔwenu lé blaminu a kɛla bɛ, Bale é dan wo ma we vo lɛ ’bɛ faa ma,

²⁹ naa, mian é Léli Sauun sɔnɔ, Bale ’ka dan ’bɛzan ma we vo lɛ monomono lo; a pagi éé kɛla wenyané lé a glɛ ’ka lo, a nya.

³⁰ Wo lé kɔɔn léé: Yo tiridɔle a a gi, bɛwemalé Jézu we ’ko fe.

Jézu bu valé a zuanénu

³¹ Yé Jézu bu valé a zuanénu da, yé wo dɔ kɔn ’léé, yé wo mi nwunvɔ a laana.

³² Té mi gu a é nyanale a zi, yé wo lé a lɛ léma: Bé ye, i bu valé i zuanénu a béera; wa i laana.

³³ Yé é a zi pa léé: De ɛ ke an bu nyaa? Yé de ɛ ke an zuanénu nyaa?

³⁴ Munu lé wo ke é nyanale a zi, é wo nagini, yé é léma: An bu valé an zuanénu lé ke ’ko.

³⁵ Mian éé Kazambale lé blibɔmawe kɛla, yee ɛ ke an zuané koo, an buru koo, an bu koo, wo nya.