Maak 2 - Kazambale lé Sebe Sauunu 1979

Jézu furuagyɛzan béli

¹ ’Bɛ zuo, dé yi nɔɔ? yé Jézu go Kapɛnaum é ziin. Wa ’ma aan wo léé, Jézu a kɔn gi,

² yé mi kiɛre zén ékeva kɔn ’léé fɔɔ yé wo va mi kenu ’ka dɔna ye lɛ lo. Yé é Bale dére fe wo lɛ.

³ Yé munu da furuagyɛzan nya a va; mi ziɛn ɛ ke a sina.

⁴ Mi gu blɛn lé we ma lé wo ’ka bɔa dale lɛ Jézu punma lo. Amalé wo kɔn fɔn é nwiin fɛana lé Jézu ke é dɔle, a yɛrama. Yé yialafɛ lé furuagyɛzan ke a ta, yé wa zun kɔn fɔnna.

⁵ Jézu a ye aan wo léé, wo bli a ’é lɛ, é lé furuagyɛzan lɛ léé: Anlé né, maa i ma we vo ilé wenyanénu ma.

⁶ Sɛbɛgifemi kenu a é nyanale fɛkona. Wo lé ’wo bli gi léma:

⁷ É kɛlɛ kaa yé mi ’ko éé we fé ’bɛ zoo? É Kazambale sɔnɔ. Dé é ’ka Kazambale do kpen nya lo, de ɛ bɔa mi ma we vole lɛɛ?

⁸ Tɔɔn, wean wa bɔrɔna wo bɔn gi, é dɔ Jézu gi, yé é lé wo lɛ léma: Mɛmalé gi bɔrɔlenu ’ko zo ke ka gii?

⁹ Dé ma lé furuagyɛzan lɛ léé, maa i ma we vo ilé wenyanénu ma, ’bɛ a do, dé maa lé a lɛ léé, ’i nwa, ilé yialafɛ sia, yé ’i tawo, ’bɛ a do, ’naan, a kyɛnzan ɛ ke we blɛn nya é mini é bɔluzan taa?

¹⁰ É sɔ an lɛ léé, ka a gi dɔɔ léé, a se a maa blami Be lɛ léé, an mi ma we vo tɛrɛ la, amalé é lé furuagyɛzan lɛ léé:

¹¹ Maa lé i lɛ léé, ’i nwa, ’ilé yialafɛ sia, yé ’i go ilé kɔn ’léé.

¹² Tɔɔn, yé é nwa, yé élé yialafɛ sia, yé é bɔra munu faa yuɛ va. Wo faa gi vuru, yé wo Kazambale tɔ zin bɔ a fele nya léé: Ko ’ka tan we ’ko zoɛ vinin ye lɛ lo.

Jézu Lévi laa

¹³ Jézu go é ziin wɛyi gɔ la. Munu faa go a va, yé é we paa wo gi.

¹⁴ É ke aan wo giéna yé é Alifé be Lévi ye. É a é nyanale vagɔɔli sina. Yé Jézu lé a lɛ léma: ’I da an zuo. Yé Lévi nwa, yé é go a zuo.

¹⁵ Jézu a fɛ blena aan wo Lévi lé kɔn gi, vagɔɔlisizannu kiɛre valé wenyanékɛlɛmunu é ziin wo nyana fɛblele zi Jézu valé é zuomunu va. Naa, wa mi kiɛre, yé wo da a zuo.

¹⁶ Sɛbɛgifemunu lé wo ke Farizimunu nya, wa ye aan wo léé, é a fɛ blena vagɔɔlisizannu valé wenyanékɛlɛzannu va, wo lé a zuomunu lɛ léma: Mɛmalé é ke fɛ blena vagɔɔlisizannu valé wenyanékɛlɛzannu vaa?

¹⁷ Jézu ’bɛ ’ma aan wo, yé é lé wo lɛ léma: Munu lé wo ke plɛplɛ, wo mawe ’ka dɔtrɔ gi lo, naa, gyɛgyɛmunu ɛ mawe ke dɔtrɔ gi. An ’ka da lɛ mi tegelenu laa lɛ lo, an da wenyanékɛlɛmunu ɛ laa lɛ.

Lɔrɔsɔnle lé we

¹⁸ Jan zuomunu valé Farizimunu a lɔrɔ sɔnna. Yé munu da we laa lɛ Jézu lee, yé wo léé: Mɛmalé Jan zuomunu valé Farizinu zuomunu a lɔrɔ sɔnna ’naan, yé i zuomunu ’ka lɔrɔ sɔnna loo?

¹⁹ Jézu a zi pa wo lɛ léma: Dé ledɛrɛsizan a é béénu va, wo bɔa lɔrɔ sɔnle lɛɛ? Bléyian va lé ledɛrɛsizan a wo va, wo ’ka bɔa lɔrɔ sɔnle lɛ lo.

²⁰ Bléyi do é dan bɔ lɛ yé wo dan ledɛrɛsizan si lɛ wo va; ’bɛ bléyi nya lé wo dan lɔrɔ sɔn lɛ.

²¹ Wo ’ka sɔkuru dɛrɛ bééan sɔ kwa buruna lo; dé wa kɛlɛ, sɔ dɛrɛ éé sɔ kwa fiaan yé a buruna é kɛlɛ blɛn.

²² Yé wo ’ka dɔrɔ dɛrɛ zén‐é wikɔlɛkuo kwanu gi lo; dé wa kɛlɛ, dɔrɔ éé kuonu faama, yé dɔrɔ valé kuonu é sɛrɛ. Naa, é a lé wo dɔrɔ dɛrɛ zén wikɔlɛkuo dɛrɛnu gi.

Jézu zuomunu buruwɔlɛ poro é ma flinyi nya

²³ Flinyi do nya, Jézu a giéna aan wo buru féi méléna. Bléyian va lé a zuomunu a giéna, wo kun buruwɔlɛnu nɛnɛnu porole ma é ma.

²⁴ Farizimunu lé Jézu lɛ léma: Bé yee, we lé wa kɛlɛle yi ga flinyi nya, mɛmalé i zuomunu a kɛlɛnaa?

²⁵ Jézu lé wo lɛ léma: We lé David a kɛlɛ bléyian va lé fɛ do kpen ’ka a lee lo, ’té lɔrɔ a a gyɛna, yee valé é vamunu nya, ka ’ka tan a ta fe lɛ loo?

²⁶ Fɛan zo lé é wɔra Bale lé sɔkɔn gi, ’té Abiataa a Balebanmunu ’lɛzan nya ’bɛ bléyi va, yé Kazambale ’lɛburu lé a blele se a Balebanmunu saa ɛ lɛ, é a ble, yé é a ke nɔ é vamunu lɛ, ka ’ka tan a ta fe lɛ sɛbɛ gi loo?

²⁷ Yé é lé wo lɛ léma: Wo flinyi kɛlɛ munu zé nya; wo ’ka munu kɛlɛ lɛ flinyi zé nya lo.

²⁸ Bɛwemalé, maa blami Be, maa a flinyizan nya é ziin.