Maak 16 - Kazambale lé Sebe Sauunu 1979

Jézu nwale

¹ Dé wolé flinyi gié, Magadala le Mari koo, Mari lé ke Jak bu nya koo, Salomé koo, wo lia ginzan lɔ Jézu plaafɛ nya.

² Dimansi nya bladi, yirinwabléyi va, wo go gɔlɛkoro na.

³ Yé wo lé ’wo ke lɛ léé: De ɛ dan gɔlɛ burula lɛ ko lɛ yé é si gɔlɛkoro ’léé?

⁴ Yé wa nagini yé wa ye léé, gɔlɛ lé ke blɛɛn bɛ, wa burula kɔɔn é kwakwa.

⁵ Yé wo wɔra gɔlɛkoro gi, yé wo pɛniɛ do ye é nyanale ’wo bɛyila, varɔ fu grɔgrɔ do nya é ta. Wo gi nyɛ blɛn kini.

⁶ Yé é lé wo lɛ léé: Té ka gi nyɛ é kini lo. Mi lé ka ke a naginina, Nazarɛtzan Jézu lé wa gyɛ yiliblan ta, yee lé. É ’ka ’ko lo. É nwa é yuɛma. ’Ka nagini. Fɛana lé wa pa, yee lo.

⁷ Naa, ’ka go yé ’ka fe Piɛri valé Jézu zuomunu pɔnénu lɛ léé: É go ka ’lɛ Galilé tɛrɛ la. Ana lé ka dan a ye lɛ, yee lé é a fe ka lɛ é kyɛn.

⁸ Yé wo bɔra gɔlɛkoro gi é kele vlan nya. ’Té gligli a wo gi, yé é tablaa pa wo ma. Wo kanale lé we ma lé, wo ’ka we ’ko do kpen fe lɛ mi do lɛ lo.

Jézu ébo nagɔɔn Magadala le Mari lɛ

⁹ Jézu nwa é yuɛma aan wo dimansi nya é bladi, é ébozen nagɔɔn Magadala le Mari lɛ é vinin. É kyɛn é yo sɔrafié si lezan ’ko gi.

¹⁰ Yé é go a zuo fe lɛ munu lé wo ke é kyɛn Jézu va, wo lɛ, ’té wa wuvɔna, ’té wo yuɛyi éé bɔa.

¹¹ Wa ’ma aan wo léé, é a é yuɛma, yé Mari a ye, wo bli ’ka vo lɛ a lɛ lo.

Jézu ébo nagɔɔn é zuomi fié lɛ

¹² ’Bɛ zuo é kɔlɛ tavɔɔ yé ébozen nagɔɔn wo va mi fié lé wo ke gona zia, wo lɛ.

¹³ Yé wo da é ziin, yé wa zuo fe mi pɔnénu lɛ, yé wo ’ka wo bli vo lɛ a lɛ é ziin lo.

Jézu é zuomunu nwunvɔ

¹⁴ ’Bɛ zuo é ébozen nagɔɔn mi vu ta do lɛ bléyian va lé wa fɛ blena, a bléyi va. Wo ’ka wo bli voo a lɛ lo, yé wo tɔné gi a yuyu, amalé é we ble wo va. Munu lé ’bɛnu a ye a nwale zuo, wo ’ka dɔ lɛ ’bɛnu dére ta lo, azama.

¹⁵ Yé é lé wo lɛ léé: ’Ka go tɛrɛ faa la, yé ’ka Wenéné ’ko fe munu faa lɛ.

¹⁶ Mian é bli vo a lɛ yé wa batizéwo, é dan si lɛ we gi. Mian é ’ka é bli vo lɛ a lɛ lo, alé we é dan a gyɛ lɛ.

¹⁷ Munuan wo bli vo a lɛ, wo dan gyɛzorowenu kɛlɛ lɛ. Wo dan yonu si lɛ munu gi an tɔ nya; wo dan dére dɛrɛnu vɔ lɛ;

¹⁸ wo dan ménénu sia lɛ ’wo bɛ nya, yé dé wo migyɛlale mini, é ’ka dan we do kɛlɛ lɛ wo lɛ lo; wo dan ’wo bɛ pla lɛ gyɛgyɛmunu ta yé ’bɛnu é dan béli lɛ.

Jézu gole la gi

¹⁹ Mizan we fe aan wo wo lɛ faa, yé Bale a sia yé é goan la gi, yé é nyana Kazambale bɛyila.

²⁰ Yé wo go Bale lé we fe lɛ fɛfaana. Mizan vo nyanama pana wo va, yé é dére dɔ gligli gyɛzorowenu lé wa kɛlɛna, wo nya.