Maak 15 - Kazambale lé Sebe Sauunu 1979

Jézu dɔ Pilat ’lɛ

¹ Bladi tutu, Balebanmunu segelenu koo, mi segelenu koo, sɛbɛgifemunu koo, mi bɛnu lé ke webolikinimunu nya, wo koo é ziin, wo kun wo va weblele ma. Dé wo bale vɔ Jézu ma faa wo goan yé wa nɔ Pilat lɛ.

² Pilat we laa a lee léé: Juifinu nwiinzan blɛn lé i nyaa? Jézu a zi pa a lɛ léé: Yee lé bé fe bɛ.

³ Yé Balebanmunu segelenu we kiɛre dɔ a nwiin.

⁴ Pilat we laa a lee é ziin léé: I ’ka we zi do kpen paan loo? Bé ye, wa we kiɛre dɔna i nwiin.

⁵ Yé Jézu ’ka we do kpen zi vɔ lɛ é ziin lo. Amalé Pilat gi vuru.

Wo ga dɔ Jézu nwiin

⁶ Taboyi lé fɛti faa do do bɔle nya, Pilat éé bokɔn gizan do bɔraan munu lɛ, mian mi gu a laa a lee, yee lé.

⁷ Munu lé wo nwa minwiinmunu ma, yé wo mi gyɛ, wa bokɔn gi ’bɛ bléyi ’ko va. Wo wo va mi do laama Barabas.

⁸ Munu zén ékeva yé wo vo we fena Pilat lɛ léé, ’é a kɛlɛ é kɛlɛbɛ yɛrama.

⁹ Pilat lé wo lɛ léé: É sɔ ka lɛ léé, an Juifinu nwiinzan blɛn bɔra ka lɛɛ?

¹⁰ É a gi dɔɔ léé, Balebanmunu segelenu a maawona Jézu va, amalé wo da a nya ’é lɛ.

¹¹ Naa, Balebanmunu segelenu munu ma kyɛ dɔ léé, Pilat ’é Barabas bɔra.

¹² Pilat we fe é ziin, yé é lé wo lɛ léé: Mi lé ka a laan Juifinu nwiinzan blɛn ’naan, é sɔ ka lɛ léé, maa mɛ ɛ kɛlɛ ’bɛ lɛɛ?

¹³ Yé wo siaa é ziin léé: Bé gyɛ yiliblan ta ma!

¹⁴ Yé Pilat lé wo lɛ léé: Mɛ wenyané lé é a kɛlɛɛ? Yé wo siaa é ziin plɛplɛ léé: Bé gyɛ yiliblan ta ma!

¹⁵ É sɔ Pilat lɛ léé, é mi gu lé blibɔmawe kɛlɛ amalé é Barabas bɔra wo lɛ. É Jézu bla aan wo wɛsɛné nya yé é a nɔ sunyanu lɛ a gyɛle yili ta we ma.

Sunyanu we nana Jézu ma

¹⁶ Sunyanu go Jézu nya minwiinzan lé weblegɔrɔ gi. Yé wo ’wo pɔnénu laa yé wo faa zén ékeva ’bɛna.

¹⁷ Wo galunaa sɔ zén Jézu ta, yé wo léli vuru ékema yé wa wo a ’wuo ma alé tɔkoro nya.

¹⁸ Yé wo kun wele ma a va, yé wo léé: Juifinu nwiinzan blɛn, i nyɔn‐o.

¹⁹ Yé wo gyan dia a nwiin yé wo ’lélibɔlɛ vɔ a ma, yé wo powuo zun tɛrɛ va, yé wo dia ’wo bli la a ’lɛ a ma yéri sile nya.

²⁰ Dé wa ma we nana ’ko zo faa wo galunaa sɔ si a ta, yé wo alé sɔnu zén a ta é ziin yé wo go a nya a gyɛle yili ta we ma.

Jézu gyɛle yiliblan ta

²¹ Sirɛnezan Simɔn, yee lé ke Alézandre valé Rufus ti nya, é si féi yé é a giéna, yé wo Jézu lé yiliblan nɔ a lɛ gla nya a gole a nya we gi.

²² Wo go Jézu nya fɛana lé wa laama Gɔlgɔta, ’bɛ gi léé, mi ’wuowɔlɛ lé fɛna, ana.

²³ Yé lia lé wa laama miré, wa vɔɔ dɔrɔ nya yé wa nɔ a lɛ, naa, é ’ka a si lɛ lo.

²⁴ Wa gyɛ yiliblan ta, ’bɛ zuo wo ’munnu zun alé sɔ do do ta, dé de ɛ dan a ye lɛ ézé nyaa?

²⁵ Wa gyɛ bladi valé é yiéyi méléna.

²⁶ Wean ma lé wo ga dɔ a nwiin, wa sɛbɛ gyɛ léé: Juifinu nwiinzan blɛn lé.

²⁷ Wo kyeenwomunu fié gyɛ a va, a do a a bɛyilazia, yé a do a a bɛbolazia.

²⁸ We lé ke é gyɛle Kazambale lé sɛbɛ gi léé, wa tɔ vɔ wenyanékɛlɛzannu va, a lɛ sɔɔ a zo.

²⁹ Giémunu a sɔnɔ, ’té woo ’wuo nyɔɔn‐an a fele nya léé: Éé! Biian i Balebangikɔn sɛra, yé bé dɔa é ziin yi yaa nya,

³⁰ ’ibo si we gi, ’i si yiliblan ta, ’i zun.

³¹ Balebanmunu segelenu é ziin, wo valé sɛbɛgyɛmunu, wo we nana a ma ’wo ke va, ’té wa fé léé: É mi bɛnu si we gi, yé é ’ka bɔa ébo sile lɛ we gi lo.

³² Krist, Izraɛl nwiinzan blɛn, ’é si sin yiliblan ta yé ’é zun ma. Dé ko ye ’té ko pa a ta. Munu lé wo ’bɛnu gyɛ yiliblan ta a va bɛ, ’bɛnu é ziin, ’bɛnu a sɔnɔ.

Jézu gale

³³ Yiéyi pa aan wo, gunu dɔra tɛrɛ faa la fɔɔ yili tɛnlale plɛplɛ nya.

³⁴ Jézu siaa dére plɛplɛ nya léé: Éloi, Éloi, lama sabakatani? ’Bɛ gi léé, anzé Bale, anzé Bale, mɛmalé i an vo an doo?

³⁵ ’Bɛna mi kenu a ’ma aan wo yé wo léma: Ka ye, é a Éli laana.

³⁶ Wo va mi do go vlan nya yé é nézurufɛ sia yé é a vɔ dɔrɔ tɔndɔle va yé é a pa gyan do ’léé yé é a dɔ Jézu lɔ ma, léé, ’é a gi’yi mini, yé é léé: ’Ka a vo. Dé Éli é dan da lɛ a zun lɛɛ? Ko dan a ye lɛ.

³⁷ Naa, Jézu siaa plɛplɛ, yé é ga.

³⁸ Balebangikɔn gi sɔ lé wa kɛlɛ kɔnmi nya, a fee bo, é sia loru yé é bɔ tɛrɛ.

³⁹ Jézu ga fɛan zo bɛ, sunyayɔsoru ’lɛzan lé ke Jézu yara zia, é a ye aan wo yé é léé: Mi ’ko a Kazambale Be nya, webozen nya.

⁴⁰ Lomu ana bɛ é ziin. Wa é dɔle baa, ’té wa naginian. Wo va le kenu lé ke ’ko: Magadala le Mari koo, Mari lé ke Jak kiéné valé Jozé bu nya koo, Salomé koo, woo lé.

⁴¹ Dé é a Galilé tɛrɛ la wo go a zuo ’té woo a mawenu kɛla. Wo va le kenu a a va, lomu lé wo da wo nya Jérusalɛm, wo nya.

Jézu pale

⁴² Flinyi tasi nya é a wolé fɛ ma’lɛrɛyi nya amalé nyanadi pa aan wo,

⁴³ Arimatézan Jozɛfu é bli ta dɔ plɛplɛ, yé é go Pilat va Jézu gale laa lɛ a lee. Jozɛfu ’ko, é a webolikinizannu va mi do nya, yé é a Kazambale plale munu nwiin lɛbɛnna.

⁴⁴ Yé Pilat léé: I, é ga tɛkɛɛ? Yé é sunyayɔsoru ’lɛzan laa, yé é we laa a lee léé: A gana mɔɔn?

⁴⁵ Dé é sunyayɔsoru ’lɛzan dére ’ma faa é lé Jozɛfu lɛ léé: Bé si.

⁴⁶ Yé Jozɛfu mipasɔ do lɔ, yé é Jézu gale si yiliblan ta, yé é a pasɔ vuru a ma yé é a pa mi pana lé wa bo gɔlɛ gi, ana. ’Bɛ zuo é gɔlɛ blɛn do burula yé é a dɔ a ’léé.

⁴⁷ Yé Magadala le Mari valé Jozé bu Mari a pana ye.