Maak 14 - Kazambale lé Sebe Sauunu 1979

Minwiinmunu Jézu ma we ble

¹ Taboyi valé buru lé lévɛn ’ka a va lo, wolé fɛti yi vo fié. Balebanmunu segelenu valé sɛbɛgifemunu a kwa kulina léé, ’wo Jézu kun dabli nya yé wa gyɛ.

² Naa, wo léé: Té wa kɛlɛ fɛti yi nya lo, dé fla bɔ é da gyɛ.

Mari lasikɔrɔ zén Jézu nwiin

³ Bléyian va lé Jézu a Bétani, pantɛngyɛzan Simɔn lé kɔn gi, lezan do wɔra, ’té wa fɛ blena. Gɔlɛfukuo a a lee, ’té lasikɔrɔ bozen lé a tɔ ke nari, é vlɛ nya blɛn, é a a gi. É gɔlɛfukuo ’léé bɔi, yé é lasikɔrɔ zén Jézu nwiin.

⁴ Yé mi kenu bli fli yé wo lé ’wo ke lɛ léé: Mɛmalé é lasikɔrɔ sɛrɛ é plaa?

⁵ Wo bɔa kɔɔn a danle lɛ dénié wuru do yɔ soru va, a vlɛ boen gié ’bɛ ta, yé wa mafɛ nɔ nyanégyɛmunu lɛ. Yé wo bli kɛlɛ lezan ’ko ma tɔntɔn.

⁶ Yé Jézu léé: ’Ka a vo. Mɛmalé ka a lezan bli gi kyɛ dɔnaa? É wezin kɛlɛ an lɛ.

⁷ Nyanégyɛmunu a ka va yifaama, dé é sɔ ka lɛ léé, ka wezin kɛlɛ wo lɛ bléyio?-?bléyian va, ka bɔalɛ. Naa, maa ’ka ka va yifaama lo.

⁸ We lé é bɔa a kɛlɛle lɛ, yee lé é a kɛlɛ. An gale plaale we ma lé é a zén an ta bɛ. É a kɛlɛ an pale we ma a bléyi ’lɛ.

⁹ Fɛfaana lé munu é dan Wenéné ’ko fe lɛ tɛrɛ faa la, we lé lezan ’ko a kɛlɛ, wo dan a zuo fe lɛ yé lezan ’ko sele é dan dɔ lɛ munu gi. Maa fe ka lɛ.

Judas a nyi si léé, ’é Jézu pa munu lee

¹⁰ Kariɔtzan Judas a mi vu ta fié va mi do nya, yé é go Balebanmunu segelenu va Jézu liwole wo lɛ we ma.

¹¹ Wa dére ’ma aan wo, yé wo gi nana, yé wo lé a lɛ léé, ’wo dan gɔɔli nɔ lɛ i lɛ. Yé bléyian Judas é bɔalɛ léé, é Jézu pa wo lee, é a sin ’bɛ naginina.

Jézu valé é zuomunu Taboyi lé fɛti kɛlɛ

¹² Buru lé lévɛn ’ka a va lo, alé yi vininzan nya, yian nya lé woo Taboyi lé ’blané gya, Jézu zuomunu lé é lɛ léé: É sɔ i lɛ léé, ko go Taboyi lé fɛti ma’lɛrɛ i lɛ fɛ kyɛnnaa?

¹³ Yé é é zuomunu fié nwunvɔ, yé é lé wo lɛ léé: ’Ka go fla; ka dan kee lɛ gɔné do nya ’yibɔ nya é bɛ la; ’ka go a zuo.

¹⁴ Dé é wɔra kɔn‐oo kɔn‐an gi, ’ka a fe kɔnzan lɛ léé: Mizan léma: Fɛ kyɛnna lé yee valé é zuomunu é dan Taboyi lé fɛ ble lɛɛ?

¹⁵ Yé kɔn nwiin kɔn gi blɛn do lé tablénu valé blinnu ke a gi, é ma nya é ’lɛrɛle, é dan a gɔɔn lɛ ka lɛ. Ana lé ’ka Taboyi lé fɛti lé fɛnu ma’lɛrɛ kaa lɛ.

¹⁶ A zuomunu go yé wo bɔ fla; yé wo bɔ fɛnu ma bélé fɛan zo lé é a fe wo lɛ, a zo. Yé wo Taboyi lé fɛti lé fɛnu ma’lɛrɛ.

¹⁷ É nyanadi fɔfɔ, Jézu valé mi vu ta fié da.

¹⁸ Wa tablé zi fɛ blena aan wo, Jézu léma: Maa lé ka lɛ webozen nya léé, ka va mi do lé é ke fɛ blena an va, é dan an pa lɛ munu lee.

¹⁹ Wo bli kyɛ dɔ yé wo we laa a lee do do léé: Maa léé?

²⁰ É lé wo lɛ léé: Mi vu ta fié va mi do lé éé bɛ wɔraan an va pala gi, é a ’bɛzan nya.

²¹ Maa blami Be a gona, fɛan zo lé wo anlé we gyɛ sɛbɛ gi, a zo. Mi lé é blami Be pa munu lee, a gale nyɔ. A fila vɔ kɔɔn léé, té wa yaa lo.

Jézu we dɛrɛ paa é zuomunu gi

²² Wa fɛ blena aan wo Jézu buru si, yé dé é Bale bɔ vɔ faa é a bɔi, yé é a nɔ wo lɛ a fele nya léé: Buru ’ko a an kɔlɛ nya. ’Ka a si.

²³ ’Bɛ zuo é ’yiminikana do si, yé dé é Bale bɔ vɔ faa yé é a nɔ wo lɛ yé wo faa ’yi mini a gi.

²⁴ Yé é lé wo lɛ léma: Fɛ ’ko, an nyɛ lé. Gipawe dɔ plɛplɛ nyɛ lé é zana mi kiɛre lé we ma, yee lé.

²⁵ Maa lé ka lɛ webozen nya léé, maa ’ka dan dɔrɔyi mini lɛ é ziin monomono lo fɔɔ, ’té an bɔ é wo Kazambale lé fuatɛrɛ la, yé maa a dɛrɛ mini.

²⁶ Dé wo lɛrɛ vɔ faa, yé wo go Ɔlivi gɔ nwiin.

Jézu Piɛri lé sɔnvɔle ’é ma we fe

²⁷ Jézu lé wo lɛ léma: Anlé we é dan ka faa kele lɛ. Naa, wa gyɛ Kazambale lé sɛbɛ gi léé: An dan ’blatabinzan gyɛ lɛ, yé ’blanu é dan fwila lɛ.

²⁸ Naa, dé an nwa gale va faa maa dan go lɛ ka ’lɛ Galilé tɛrɛ la.

²⁹ Yé Piɛri lé a lɛ léma: Dé ilé we mi faa kele, maa do ’ko, é ’ka dan maa kele lɛ monomono lo.

³⁰ Jézu lé a lɛ léé: Kyɔ é béli ’ko, dé manegɔné ’ka tan we lɛ a gɔnɔ fiézan nya lo, i dan a fe lɛ gɔnɔ yaa léé, ’é ’ka an dɔɔa lo. Maa fe i lɛ.

³¹ Yé Piɛri we fe é sɔbɛla nya léé: Dé é a gale i va nyaoo, maa ’ka dan a fe lɛ léé, an ’ka i dɔɔa lo lo. Yé wo faa yee we duo ɛ fe.

Jézu bazoro Jɛtsémané

³² ’Bɛ zuo Jézu valé é zuomunu go fɛ lé wana laama Jɛtsémané, ana. Yé Jézu lé é zuomunu lɛ léma: ’Ka nyana ’ko, yé an bazoro ma.

³³ Yé Piɛri koo, Jak koo, Jan koo, é wo si yé é go wo nya, yé a gi nyɛ kun kinile ma, ’té éé nyané blé kaii.

³⁴ Yé é lé wo lɛ léma: An bɔn‐in kyɛ dɔle ’ko, é vo sɛ é an gyɛ. ’Ka vo ’ko yé ’ka vo é yuɛma.

³⁵ Yé é bié é ’lɛ sɛ, yé ébo dia tɛrɛ va, yé é bazoro léé: Dé é bɔalɛ é kɛlɛ, bléyi ’ko ’é gié an ta.

³⁶ Yé é léma: Aba, an Ti, i bɔa we faa kɛlɛle lɛ. ’I ’yiminikana ’ko si an lee ma. Naa, té é kɛlɛ an sɔlɛwe nya lo, ’é kɛlɛ i sɔlɛwe nya ma.

³⁷ Yé é da é zuomunu va; é bɔ wo ma yigyɛna yé é lé Piɛri lɛ léma: Simɔn, i a yigyɛnaa? I ’ka bɔa vole lɛ é yuɛma lɛrɛ do nya loo?

³⁸ ’Ka vo é yuɛma yé ’ka bazoro, té wo ka gi dan lo we ma; mi bli a nyi sié, naa, mi a tɔɔtɔɔ.

³⁹ Yé é si wo va é ziin, yé é yee bazoro dére duo fe.

⁴⁰ Yé é da é pa gi yé é bɔ wo ma yigyɛna é ziin. Naa, wo yuɛla bɛn a kaii. Wo ’ka we zi pa dére dɔɔa lo.

⁴¹ Yé é da wo va a gɔnɔ yaazan nya, yé é lé wo lɛ léma: ’Ka yi gyɛ sin, yé ka flin. É nyaa. A bléyi bɔ. Wa gona maa blami Be pana wenyanékɛlɛmunu lee.

⁴² ’Ka nwa, kaa go. Ka ye, mi lé é ke an pana wo lee, yee lé é dan bɛ.

Wo Jézu kun

⁴³ É a tan wefena aan wo tɔɔn, Judas lé é ke mi vu ta fié va mi do nya, é bɔra mi gu nya é va, ’té gwɔunnu valé yilinu a wo lee. Balebanmunu segelenu koo, sɛbɛgifemunu koo, mi segelenu koo, wo ɛ wo nwunvɔ.

⁴⁴ Jézu liwozan tɔmase ’ko gɔɔn wo lɛ léé: Dé maa mian tuu gyɛ, ’té yee lé. ’Ka a kun yé ka goan tegeleee.

⁴⁵ Judas bɔ aan wo tɔɔn, é bié Jézu ma yé é léma: Anzan. Yé é a tuu gyɛ.

⁴⁶ Yé munu ’konu Jézu kun, yé é vo wo lee.

⁴⁷ Jézu zuomunu va mi do gwɔun so é kɔlɛ gi, yé é a vɔ Balebanmunu ’lɛzan wuozan ma yé é a tɔné bɔi.

⁴⁸ Jézu lé wo lɛ léé: Ka da an kun lɛ gwɔunnu valé yilinu nya ka lee bélé fɛan zo lé ka da kyeenwozan kun lɛ, a zo.

⁴⁹ Maa a yifaama ka va we paana munu gi Balebangikɔn gi, yé ka ’ka an kun lɛ lo. Naa, wo we ’ko kɛlɛ Kazambale lé sɛbɛ gi we lɛsɔɔle we ma.

⁵⁰ Yé Jézu zuomunu faa si é zi, yé wo fwila.

⁵¹ Yé pɛniɛ do go Jézu zuo sɔ nya é zénle é ta. Yé munu a kun;

⁵² naa, é daan élé sɔ ma yé é go vlan nya é porole.

Wo go Jézu nya webolikinimunu va

⁵³ Wo go Jézu nya Balebanmunu ’lɛzan va, fɛana lé Balebanmunu segelenu faa koo, mi segelenu koo, sɛbɛgifemunu koo, wa é zénle ékeva, ana.

⁵⁴ Piɛri vo dana a zuo baa, fɔɔ yé é bɔ Balebanmunu ’lɛzan lé gɔrɔ gi, yé é nyana sunyanu va kyɛ zi.

⁵⁵ Balebanmunu segelenu valé webolikinimunu faa, wa wenu naginina Jézu ma, ga dɔle a nwiin we ma, naa, wo ’ka a do kpen ye lɛ lo.

⁵⁶ Wenayemunu kiɛre viéwo a ma, naa, wo dére ’ka bɔ lɛ ékema lo.

⁵⁷ Wenayemi kenu nwa, yé wo viéwo a ma, yé wo léé:

⁵⁸ Wean é a fe, ko a ’ma; é léé, Balebangikɔn ’ko lé mi a dɔ, ’é dan a zana lɛ, yé ’é dan a bɛ dɔ lɛ a pa gi yi yaa, ’té munu ’ka ’bɛ dɔ lɛ lo.

⁵⁹ We ’ko ma é ziin, wo dére ’ka bɔ lɛ ékema lo.

⁶⁰ Yé Balebanmunu ’lɛzan nwa zén‐ékevamunu méléna, yé é we laa Jézu lee léé: I ’ka we zi do kpen paan loo? Mɛ we lé munu ’ko ke a dɔna i nwiin bɛɛ?

⁶¹ Jézu vo é tadɔle yé é ’ka we zi do kpen pa lɛ lo. Balebanmunu ’lɛzan we laa a lee é ziin, yé é léé: Bii ɛ ke Krist nyaa? Kazambale lé wa drɔɔ voo, a Be lé i nyaa?

⁶² Jézu a zi pa a lɛ léé: Iin, maa lé. Yé ka dan maa blami Be ye lɛ é nyanale Plɛplɛzan Bale bɛyilazia, yé ka dan an ye lɛ dana latinu ta.

⁶³ Yé Balebanmunu ’lɛzan élé sɔ fia, yé é léma: Ko mawe a é ziin wenayezan bɛnu gii?

⁶⁴ Ka sɔnɔ dére ’ma sin a ta. É dɔ ka gi kaa? Yé wo faa léé: ’Wa ’gyɛ, wa gyɛ, ’wa ’gyɛ!

⁶⁵ Mi kenu kun ’lélibɔlɛ vɔle ma a ma, yé wo sɔ vuru a yuɛ la, yé wo fɔlɛ duun a lɛ yé wo léé: ’I balelaye ma. Yé sunyanu a blin kyɛ si.

Piɛri sɔn vɔ Jézu ma

⁶⁶ Bléyian va lé Piɛri a béera gɔrɔ gi, Balebanmunu ’lɛzan wuole do da.

⁶⁷ É Piɛri ye aan wo é dɔle kyɛ zi, yé é a nagini, yé é lé a lɛ léé: Bii é ziin, bii a turu Nazarɛtzan Jézu va.

⁶⁸ Naa, é gba vɔ yé é léé: Bé fé nɔɔ? Maa a gi dɔɔa lo, maa a maan lo. Yé é nwa yé é yara dɔ gɔrɔ ’léé zia. Yé manegɔné we.

⁶⁹ Wuole a ye aan wo, yé é lé ana munu lɛ léé: Mi ’ko, é a munu ’ko va mi do nya.

⁷⁰ Yé é gba vɔ é ziin. ’Bɛ zuo sɛ, ana munu é ziin, ’bɛnu lé Piɛri lɛ léé: Naa, Galilé mi lé i nya; bii a munu ’ko va mi do nya webozen nya.

⁷¹ Yé é kun bale pale ma, ’té éé bale ’nyɔɔn‐an léé: Mian ka alé we fé bɛ, dé maa a dɔɔ pe! Kazambale bozen ana.

⁷² ’Bɛna tɔɔn, yé manegɔné we a gɔnɔ fiézan nya. Yé dére lé Jézu a fe Piɛri lɛ, a sele dɔ a gi léé: Dé manegɔné ’ka tan we lɛ a gɔnɔ fiézan nya lo, i dan a fe lɛ gɔnɔ yaa léé, ’é ’ka an dɔɔa lo. É vo é gi bɔrɔna ’bɛ ma yé é wuvɔ.