Maak 13 - Kazambale lé Sebe Sauunu 1979

Jézu Balebangikɔn guru zanale a gi fale vɔ

¹ Jézu bɔra aan wo Balebangikɔn gi, yé a zuomi do lé a lɛ léé: Mizan, gɔlɛ zimanu lé ke ’ko, bé gini do; yé kɔn nɔnɔminu lé ke ’ko, bé gini do.

² Jézu lé a lɛ léé: I kɔn blɛn ’konu yee? Wo va gɔlɛ lé é dan vo lɛ é ke ta, ’té wo ’ka dan ’bɛ zana lɛ lo, ’bɛ gɔlɛ ’ka lo.

Nyanéblele pélisiana

³ É nyana Ɔlivi gɔ nwiin Balebangikɔn yara zia, yé Piɛri koo, Jak koo, Jan koo, André koo, wo we laa a lee, ’té wa wo saa, yé wo léé:

⁴ Bé fe ko lɛ, ’bɛ é dan bɔ lɛ mɛ yi laa? Yé tɔmase kyɛn nya lé wo dan a dɔɔ lɛ léé, we ’konu faa lɛ é dan sɔɔ lɛɛ?

⁵ Yé Jézu kun wefele ma wo lɛ, yé é léma: ’Ka yuɛ pa kabozen va, té mi do kpen é ka gi saan ka ma lo.

⁶ Naa, mi kiɛre é dan da lɛ an tɔ gi, ’té wa fé léé, ’wo ɛ ke Krist nya. Yé wo dan mi kiɛre gi saan lɛ ’wo ma.

⁷ Dé ka gulidanle we ’ma, dé ka ’ma léé, wa guli danna fɛ kiɛrena, té ka ’bɛ gi bɔrɔ pa lo, naa, é a lé we ’konu ’é bɔ, naa, ’bɛ ’ka a nyaabléyi nya lo.

⁸ Bɛn do é dan nwa lɛ bɛn do ma, yé bɛntɛrɛ do é dan nwa lɛ bɛntɛrɛ do ma; tɛrɛ ma é dan nyɔɔn lɛ fɛ kena, yé lɔrɔ é dan dɔ lɛ. ’Bɛ a nyanéblelenu pélisiana nya é pla.

⁹ ’Ka yuɛ pa kabozen va. Wo dan ka pa lɛ weblezannu lee, yé wo dan ka bla lɛ plén nya bazorokɔnnu gi, yé ka dan dɔ lɛ gbɔrɔnama valé minwiinmunu ’lɛ anlé we ma, kɛlɛle wenayezannu nya wo ’lɛ we gi.

¹⁰ É a lé wo Wenéné fe bɛnnu faa lɛ é vinin.

¹¹ Dé wo go ka nya ka nɔle weblezannu lɛ we ma, té ka kalé wefele gi bɔrɔ pa wefebléyi ’lɛ lo, naa, wean é dɔa ka gi a bléyi nya, ’ka a fe. Naa, wefezan ’ka ka nya lo, é a Léli Sauun nya.

¹² Mi é dan é zuané bɔra lɛ gale lɛ; mi é dan élé né bɔra lɛ gale lɛ. Nunukénénénu é dan nwa lɛ ’wo yaamunu ma, yé wo dan ’wo yaamunu gyɛ lɛ.

¹³ An tɔ lé we ma lé munu faa é dan ka za pa lɛ. Naa, mian éé yara paan anlé we kɛlɛle ta fɔɔ yé é bɔ a ’wuoplana, ’bɛzan é dan si lɛ we gi.

Nyanéblele blɛɛn

¹⁴ Mian éé sɛbɛ ’ko ta fé, ’bɛzan ’é yuɛ pa ébozen va ma. Fɛ sɛrɛle tata fɛ naané lé wo ’ka ’wo yuɛ vɔa a ta lo, dé ka a ye é dɔle fɛana lé a se ’ka a lɛ léé, é dɔ ana lo, ana, munu lé wo ke Judé tɛrɛ la, ’wo fwi yé ’wo go gɔnu nwiin ma.

¹⁵ Mian é ke kɔngwa ta, té é zun yé é wɔra élé kɔn gi élé fɛ do sile we gi lo.

¹⁶ Yé mian é ke féi, té é diéra é zuozia élé sɔ sile we gi lo.

¹⁷ Bɔnlomu valé lomu lé wolé né ke nyɔ ma ’bɛ yinu nya, wo gale nyɔ.

¹⁸ ’Ka bazoro léé, té we ’konu é bɔ dunubléyi va lo.

¹⁹ Yi ’konu lé nyanéblele é dan kɛlɛ lɛ blɛn fɔɔ é sia Kazambale lé tɛrɛkɛlɛ?-?bléyi va fɔɔ é bɔ kyɔ ma, nyanéblele ’ko zoɛ ’ka tan bɔ lɛ lo, yé wo ’ka dan a zoɛ ye lɛ monomono lo.

²⁰ Dé Mizambale ’ka kɔɔn yi kenu si lɛ a ta lo, ’té mi do kpen ’ka dan si lɛ we gi lo; naa, munu lé Kazambale wo si a va ézé nya, wolé we ma lé é yi kenu si a ta.

²¹ Dé mi do a fe ka lɛ léé: Krist a ’ko‐oo, é a mun‐oo, té ka bli é vo ’bɛ lɛ lo.

²² Dabli Kristnu valé viébalelayezannu é dan nwa lɛ, yé wo dan we blɛnblɛnnu valé gyɛzorowenu kɛlɛ lɛ fɔɔ yé munu lé Kazambale wo si a va ézé nya, yé wo wo saan, ’té dé wo bɔa kɔɔn saanle lɛ.

²³ ’Ka yuɛ pa kabozen va. Maa a faa fe ka lɛ a bɔle ’lɛ.

Blami Be dale

²⁴ Naa, ’bɛ yinu nya, nyanéblele zuo tɔɔn, gunu é dan dɔra lɛ yiri yara, yé moné ’ka dan bi lɛ é dɛrɛ lo,

²⁵ yé monénénu é dan si lɛ la gi yé wo dia, yé lanu gi fɛ plɛplɛnu ma é dan nyɔɔn lɛ.

²⁶ ’Bɛ zuo munu é dan maa blami Be ye lɛ dana latinu ta, plɛplɛ blɛn valé fua tagɔɔnle nya.

²⁷ Yé maa dan anlé lanjenu nwunvɔ lɛ yé munu lé maa wo si a va anzé nya, maa dan wo si lɛ tɛrɛsun ziɛn ta, é sia tɛrɛ glɛ sina fɔɔ yé é bɔ la glɛ sina yé maa wo zén ékeva.

Bɔrɔyili lé wepaale

²⁸ ’Ka we ’ko dan bɔrɔyili ma yé ’ka a gi ’ma ma. Dé a bɛnu ’yi dɔ ’é gi yé é a nɛɛna, ka gi dɔɔ léé, lɛɛdabléyi bɔ é pu.

²⁹ A zo duo lé, dé ka we ’konu ye bɔna, ka a gi dɔɔ léé, maa blami Be, an bié ka sɔnɔ boenwo.

³⁰ Maa lé ka lɛ webozen nya léé, munu lé wo ke ana ’bɛ bléyi va, wo faa ’ka dan ga lɛ we ’konu faa bɔle ’lɛ lo.

³¹ La valé tɛrɛ é dan gié lɛ, naa, an dérenu ’ka dan gié lɛ monomono lo.

Mi do kpen ’ka a dabléyi dɔɔa lo

³² Mi do kpen ’ka ’bɛ yi valé ’bɛ bléyi dɔɔa lo. Lagi lanjenu valé maa Bale Be ’ka a dɔɔa lo; an Ti do kpen ɛ a dɔɔ.

³³ Bléyian va lé ’bɛ ’yi ’ko é dan bɔ lɛ, ka ’ka a gi dɔɔa lo, amalé ’ka yuɛ pa kabozen va. ’Ka vo é yuɛma.

³⁴ É a bélé mi lé é go tawo lɛ, yé élé kɔn vo, yé é a se kɛlɛ é wuozannu lɛ, a zo. É wolé nyanama gɔɔn wo lɛ do do, yé é lé kɔntabinzan lɛ léé, ’é vo é yuɛma.

³⁵ Bléyian kɔnzan é dan da lɛ a nya, ka ’ka a dɔɔa lo; dé é a nyanadi bléyi nyaoo, dé é a tu méléna nyaoo, dé é a mane vinin webléyi nyaoo, dé é a bladi bléyi nyaoo, ka ’ka a dɔɔa lo, bɛwemalé ’ka vo é yuɛma.

³⁶ ’Ka kana léé, dé é da bɔ ka ma fiaa, ’té ka a yigyɛna.

³⁷ We lé maa a fé ka lɛ, maa a fé munu faa lɛ, léé: ’Ka vo é yuɛma.