Maak 11 - Kazambale lé Sebe Sauunu 1979

Jézu wɔra Jérusalɛm minwiinzan blɛn nya

¹ Wo bɔ aan wo Jérusalɛm sɔnɔ, ’bɛ gi léé, wo bɔ Bɛtfajé valé Bétani, Ɔlivi gɔ ma zia, Jézu é zuomunu fié nwunvɔ

² yé é lé wo lɛ léé: ’Ka go fla lé ke ka ’lɛ bɛ, a ta. Dé ka bɔ ana tɔɔn, ka dan sokofale boroné do ye lɛ é polu nya é dɔle, ’té mi vinin ’ka tan vɔ lɛ a ta lo. ’Ka a polu so, yé ’ka da a nya.

³ Dé mi do a fe ka lɛ léé: Mɛmalé ka kɛlɛ a zoo? ’ka fe a lɛ léé: Mizan mawe a a gi, naa, ko dan da lɛ a nya é ziin é kele.

⁴ A zuomunu go yé wo bɔ sokofale boroné ma, é polu nya é dɔle zi pɛn ma, kɔn do ’léé sɔnɔ. Yé wa polu so.

⁵ Munu lé wo ke ana bɛ, wo va mi kenu lé wo lɛ léé: Ka sokofale polu so ka goan kyɛɛn?

⁶ Fɛan zo lé Jézu we pa wo ’léé, a zo lé wa fe, yé wo zi nɔ wo lɛ yé wo go.

⁷ Yé wo go sokofale boroné nya Jézu va. Wo ’wolé sɔnu pla sokofale boroné punu, yé Jézu nyana a ta.

⁸ Yé mi kiɛre ’wolé sɔnu fwila zia. Yé mi pɔnénu go yilibɛ yéli lɛ zi ma, yé wa zana zia.

⁹ Munu lé wo ke tawona Jézu ’lɛ, é valé munu lé wo ke tawona a zuo, wa siaana léé: Ozana! mi lé é da Mizambale tɔ gi, a drɔɔ ’é vo ma!

¹⁰ Plale mi nwiin lé é dan da lɛ, ’té é ke ko tra David zé nya bɛ, a drɔɔ ’é vo ma. Lai loru munu, ’ka siaa mi, Ozana!

¹¹ Jézu bɔra Jérusalɛm, yé é wɔra Balebangikɔn gi. A nyaale fɛnu faa naginile nya, ’té yiri bɔ baa, yé é go Bétani, yee valé mi vu ta fié nya.

Jézu bale pa bɔrɔyili ma

¹² ’Bɛ é tu kini, wo si Bétani, ’té lɔrɔ a Jézu gyɛna.

¹³ É bɔrɔyili do ye baa, ’té a laanu a a ta. É go a nagini lɛ, dé a poro baa? É bié a ma, yé é a laa saa ɛ ye. Bɔrɔ poro baabléyi ’ka tan bɔ lɛ lo, azama.

¹⁴ Yé é lé yili lɛ léé: Té i poro é baa é dɛrɛ monomono lo. Yé a zuomunu a dére ’ma.

Jézu Balebangikɔn ’lɛrɛ

¹⁵ Wo bɔ aan wo Jérusalɛm yé Jézu wɔra Balebangikɔn gi. Yé é kun fɛlɔmunu valé fɛdanmunu bɔrale ma Balebangikɔn gi. É gɔɔli tavɔɔmunu lé tablénu zana a gi, yé é plawuoné danmunu lé blinnu yara bua.

¹⁶ Yé é ’ka a nyi si lɛ léé, mi do kpen é gié fɛ do nya Balebangikɔn gi lo.

¹⁷ Yé é we pla wo lɛ a fele nya léé: Wo ’ka a gyɛ lɛ Kazambale lé sɛbɛ gi léé, wo dan anlé kɔn laa lɛ bɛn faa lé bazorokɔn loo? Naa, ka a kɛlɛ kyeenwozannu yɔɔkɔn nya.

¹⁸ Balebanmunu segelenu valé sɛbɛgifemunu we ’ko ’ma aan wo, wo kwa kuli léé, wa gya, naa, munu faa gi vuru alé wepaale ma, amalé wo kana.

¹⁹ É nyanadi yé Jézu si fla yé é go.

Jézu blipale we lɛ lé we fe

²⁰ ’Bɛ é tu kini, wa giéna aan wo, yé a zuomunu bɔrɔyili ye é gale, fɔɔ yé é bɔ a suni ma.

²¹ We lé é bɔ, a sele dɔ Piɛri gi, yé é lé Jézu lɛ léé: Anzan, bé nagini. Bɔrɔyili lé i bale pa a ma, é ga.

²² Jézu léé: ’Ka bli vo Kazambale lɛ.

²³ Maa lé ka lɛ webozen nya léé: Dé miomian é a fe gɔ blɛn ’ko lɛ léé: ’I si ’ko yé ibo vuli wɛyi va, dé a bli ’ka kɛlɛ lɛ fié a laale ma lo, naa, dé a bli vo a lɛ léé, we lé é a fe é dan kɛlɛ lɛ, a lɛ é dan sɔɔ lɛ a lɛ.

²⁴ Amalé maa lé ka lɛ léé: Fɛ faa lé ka a laan bazorole nya, ’ka bli vo a lɛ léé, é a ka lee, yé a lɛ é dan sɔɔ lɛ ka lɛ.

²⁵ Yé bléyian va lé ka a é dɔle bazorona, dé mi do va we a ka gi, ’ka a ma we vo, ka Ti lé é ke la gi, alé ka ma we vole we ma.

²⁶ Naa, dé ka ’ka munu ma we voo lo, ka Ti lé é ke la gi, é ’ka ka ma we voo lo é ziin.

Wa laa Jézu lee léé: De ɛ se kɛlɛ i lɛɛ?

²⁷ Yé wo go Jérusalɛm é ziin. Bléyian va lé Jézu a dɔwona Balebangikɔn gɔrɔ gi, Balebanmunu segelenu koo, sɛbɛgifemunu koo, mi segelenu koo, wo da a va.

²⁸ Yé wa laa a lee léé: Se ka nya lé i we ’konu kɛlaa? Mi kyɛn ɛ se kɛlɛ i lɛ léé, i wo kɛlɛɛ?

²⁹ Jézu lé wo lɛ léé: Maa dan we do laa lɛ ka lee é ziin; dé ka a zi pa an lɛ, yé mian é se ’ko kɛlɛ an lɛ, maa dan ’bɛzan tɔ fe lɛ ka lɛ.

³⁰ De ɛ Jan nwunvɔ munu batizéwonaa? Kazambale lé laa, munu léé? ’ka fe an lɛ.

³¹ Yé wo ’wo va we ble, yé wo léé: Dé ko fe léé, Kazambale ɛ a nwunvɔ, ’té é dan a fe lɛ léé: Mɛmalé ka ’ka ka bli vo lɛ a lɛ loo?

³² Yé dé ko fe léé, munu ɛ a nwunvɔ . . . Wa kanana munu lee. Munu faa éé Jan yé balelayezan bozen nya, amalé.

³³ Yé wa zi pa Jézu lɛ léé: Ko ’ka a gi dɔɔa lo. Yé Jézu lé wo lɛ léé: Maa é ziin, sean nya lé maa we ’konu kɛla, maa ’ka dan a fe lɛ ka lɛ lo.