Maak 10 - Kazambale lé Sebe Sauunu 1979

Jézu le bɔrale lé we fe

¹ Jézu si aan wo ’bɛna, yé é go Judé tɛrɛ la, Juudɛn yuu zi. Yé mi gu zén ékeva a sɔnɔ é ziin, yé é kun we paale ma wo gi é kɛlɛbɛ gi.

² Yé Farizimunu bié a gi danle we ma yé wa laa a lee léé, a se a gɔné lɛ léé, é na bɔraa?

³ Yé é a zi pa wo lɛ léé: Moizi lé ka lɛ nɔɔ?

⁴ Wo léé: Moizi zi nɔ gɔnénu lɛ léé, ’wo lebɔrasɛbɛ gyɛ yé wo daan a ma.

⁵ Yé Jézu lé wo lɛ léé: Ka tɔné gi yuyu lé we ma lé Moizi a fe a zo.

⁶ Naa, fɛ kɛlɛle pélisia bléyi va, Kazambale gɔné valé le kɛlɛ.

⁷ Amalé gɔnézan é dan si lɛ é ti valé é bu va, yé é dan péli vɔ lɛ ’é na va,

⁸ yé wo fiénu é dan kɛlɛ lɛ mi do kpen nya. ’Bɛ zo lé wo ’ka mi fié nya é dɛrɛ lo, wa mi do kpen ɛ nya.

⁹ Fɛ lé Kazambale a pa ékema, té mi a si ékema lo.

¹⁰ Wo wɔra aan wo kɔn gi, a zuomunu we ’ko gi laa a lee é ziin.

¹¹ Yé é lé wo lɛ léé: Mian é na bɔra yé é le bɛ si, ’té é le bɛ gini é na va;

¹² yé lean é si é zana va yé é gɔné bɛ si, ’té é gɔné bɛ gini é zana wuo.

Jézu nénu drɔɔ vo

¹³ Munu da nunukénénénu nya Jézu va a bɛ manele wo ma we gi. Naa, a zuomunu we ble munu lé, ’bɛnu da nénu nya, ’bɛnu va.

¹⁴ Jézu a ye aan wo, é ’na a ma, yé é lé é zuomunu lɛ léé: ’Ka daan nunukénénénu ma, ’wo da an va. Té ka wo dale yi ga lo; naa, munu lé wo ke bélé nénu zo, Kazambale a é plale wo ɛ nwiin.

¹⁵ Dé miomian é ’ka Kazambale plale ’é nwiin nyi sié bélé né kiéné zo lo, é ’ka dan wɔra lɛ Bale va lo. Maa fe ka lɛ.

¹⁶ ’Bɛ zuo, ’té éé nénu sié, ’té éé wo drɔɔ voo é bɛ plale nya wo ta.

Fuable pɛniɛ lé we

¹⁷ Dé Jézu a zi siana, gɔné do da vlan nya a va, yé é zun é powuo la a ’lɛ, yé é we laa a lee léé: Anzan zin, maa kɛla kaa yé an vo é yuɛma lɛɛfaama yé a glɛ ’ka dɔa loo?

¹⁸ Yé Jézu lé a lɛ léé: Mɛmalé i maa laan mi ziin? Kazambale do kpen ɛ ke é zin.

¹⁹ I bélidɔwenu dɔɔ: té i le bɛ gini lo, té i mi gyɛ lo, té i kyeenwo lo, té i viéwo mi ma lo, té i mi ta ble lo, i ti valé i bu lɛdɔma, woo lé.

²⁰ É a zi pa a lɛ léé: Anzan, an we ’konu faa kɛlɛle pélisia an kiéné la bléyi va.

²¹ Jézu a nagini, yé é sɔ a lɛ. Yé é lé a lɛ léé: Ilé we do vo. ’I go, ’ilé fɛnu faa dan yé bé mafɛ nɔ nyanégyɛzannu lɛ, yé i dan fɛwezan ye lɛ la gi. Dé i nyaa a nya faa, ’i da an zuo.

²² Alé fɛnu a di, amalé dére ’ko ’na a ma, yé é go é bli gi kyɛdɔle nya.

²³ Jézu é yuɛ bɔrɔ wo ta tɛɛɛn yé é lé é zuomunu lɛ léé: Munu lé fuafɛnu ke wo lee, wo plale Kazambale wuo a wo ma tɔntɔn.

²⁴ Jézu wean fe bɛ, é di kini a zuomunu gi. Yé é lé wo lɛ é ziin léé: Anlé nénu, plale Kazambale wuo a tɔntɔn.

²⁵ Fuablezan plale Kazambale wuo a tɔntɔn é mini nyɔgɔmé wɔrale sɔ béé sééné yɛrɛ gi ta.

²⁶ A zuomunu gi taa vuru ’wo ma yé wo lé ’wo ke lɛ léé: Yé de ɛ bɔalɛ léé, é si we gii?

²⁷ Jézu wo nagini yé é léé: Munu ’ka bɔa a kɛlɛle lɛ lo, naa, Kazambale ɛ bɔalɛ. Kazambale éé bɔa we faa kɛlɛle lɛ.

²⁸ Piɛri lé a lɛ léé: Bé ye, ko daan fɛ faa ma yé ko da i zuo.

²⁹ Jézu lé a lɛ léé: Maa lé ka lɛ webozen nya léé, mian é daan élé fɛnu ma, dé alé kɔn léé, dé a bwenu léé, dé a burunu léé, dé a bu léé, dé a ti léé, dé alé nénu léé, dé alé tɛrɛnu léé, dé é daan wo ma, maa valé Wenéné ’ko lé we ma,

³⁰ yé lao, tɛrɛ ’ko la, é ’ka wo lɛgi yé gɔnɔ yɔ soru lo, ’bɛzan ’ka lo; kɔnnu koo, bwenu koo, burunu koo, bunu koo, nénu koo, tɛrɛnu koo, é valé nyanéblelenu koo, é dan wo ye lɛ yé alé tɛrɛla nyaale zuo é dan vo lɛ é yuɛma lɛɛfaama, ’bɛ glɛ ’ka lo.

³¹ Mi vininzannu kiɛre é dan kɛlɛ lɛ mi voélazannu nya, yé mi voélazannu kiɛre é dan kɛlɛ lɛ mi vininzannu nya.

Jézu é gale fale vɔ a gɔnɔ yaazan nya

³² Jézu valé é vamunu go Jérusalɛm. Wa zia, ’té Jézu a wo ’lɛ. Di kini a zuomunu gi, yé munu go a zuo wo ta nya drɔɔdrɔɔ. Yé Jézu mi vu ta fié bié é sɔnɔ é ziin, yé wean é dan bɔ lɛ a ma, é kun a fele ma wo lɛ, yé é léé:

³³ Ka ye, kaa a gona Jérusalɛm yé wo dan maa blami Be pa lɛ Balebanmunu segelenu valé sɛbɛgifemunu lee. Wo dan ga dɔ lɛ an nwiin, yé wo dan an nɔ lɛ bɛn bɛnu lɛ,

³⁴ yé ’bɛnu é dan an ma we nana lɛ; wo dan ’lélibɔlɛ vɔ lɛ an ma, yé wo dan an bla lɛ wɛséné nya yé wo dan an gyɛ lɛ yé yi fié a yaazan nya an dan nwa lɛ gamunu va.

Jak valé Jan we do laa Jézu lee

³⁵ Zébédé benu Jak valé Jan bié Jézu ma yé wo lé a lɛ léé: Kozan, we lé ko dan a laa lɛ i lee, é sɔ ko lɛ léé, bé kɛlɛ ko lɛ.

³⁶ É lé wo lɛ léé: Mɛ fɛ ɛ sɔ ka lɛ léé, maa a kɛlɛ ka lɛɛ?

³⁷ Wo lé a lɛ léé: Dé i wɔra ilé fua gi, ’i zi nɔ ko lɛ yé ko nyana i bɛyila valé i bɛbola.

³⁸ Jézu lé wo lɛ léé: We lé ka a laa an lee, ka ’ka a gi dɔɔa lo. Kana lé an dan ’yi mini lɛ a gi ’naan, ka bɔalɛ léé, ka ’yi mini a gii? Yé wo dan an batizéwo lɛ bɛan gi ’naan, ka a nyi sié léé, wo ’ka batizéwo ’bɛ bɛ gii?

³⁹ Yé wo léé: Ko bɔalɛ. Jézu lé wo lɛ léé: Webozen lé, kana lé an dan ’yi mini lɛ a gi, a gi lé ka dan ’yi mini lɛ; yé wo dan an batizéwo lɛ bɛan gi, yee bɛ duo gi lé wo dan ka batizéwo lɛ é ziin.

⁴⁰ Naa, nyanale an bɛyila valé an bɛbola, ’bɛ nɔle ’ka sié an va lo. Bale é dan a nɔ lɛ munu lé, é a ta dɔ wozé nya, wo ɛ lɛ.

⁴¹ Mi vu ’bɛ ’ma aan wo, wo bli fli Jak valé Jan ma.

⁴² Jézu wo faa laa, yé é lé wo lɛ léé: Ka gi dɔɔ léé, munuan woo wo yé minwiinzannu nya bɛnnu va, woo ɛ plaan munu nwiin plɛplɛ, ’té munu lé wo ke vanu nya wo va bɛ, woo mi planu kɛla ’wo wuozannu nya.

⁴³ É ’ka ’bɛ zo ka méléna lo. Dé é sɔ miomian lɛ léé, ’é kɛlɛ ka nwiinzan nya, ’bɛzan ’é kɛlɛ ka wuozan nya ma.

⁴⁴ Yé dé é sɔ miomian lɛ lee, ’é kɛlɛ ka vininzan nya, ’bɛzan ’é kɛlɛ ka faa lé luu nya ma.

⁴⁵ Naa, maa blami Be ’ka da lɛ munu lé an mawe kɛlɛle we gi lo; naa, an da munu mawe kɛlɛle we gi, ’bɛ valé an gale mi kiɛre tabofɛ nya we gi.

Yuɛwiizan Baatimé béli

⁴⁶ Jézu koo, é zuomunu koo, mi gu blɛn koo, wo bɔ Jériko. Wo si aan wo ana, ’té Timé be Baatimé lé é ke yuɛwiizan nya, ’té éé doro paan, é a é nyanale zi nɔnɔ.

⁴⁷ É a ’ma léé, Nazarɛtzan Jézu da, yé é kun siaale ma léé: David be Jézu, ’i nyanai zén an ta.

⁴⁸ Yé mi kiɛre siaa a ta léé, ’é tadɔ. Naa, é siaa taawo plɛplɛ é ziin léé: David be Jézu, ’i nyanai zén an ta!

⁴⁹ Jézu dɔ yé é léé: ’Ka a laa, ’é da. Yé wo yuɛwiizan laa yé wo léé a lɛ léé: ’I bli ta dɔ plɛplɛ. ’I nwa, é a i laana.

⁵⁰ Yuɛwiizan élé sɔ dia, yé é nwa fɔrɔle nya yé é go Jézu va.

⁵¹ Jézu a laa a lee léé: É sɔ i lɛ léé, maa mɛ ɛ kɛlɛ i lɛɛ? Yuɛwiizan a zi pa a lɛ léé: Anzan, an yuɛ ’é fuo ma.

⁵² Yé Jézu lé a lɛ léé: ’I go. Ilé blipale ma lé i béli. ’Bɛna tɔɔn, a yuɛ fuo yé é go Jézu zuo.