Maak 1 - Kazambale lé Sebe Sauunu 1979

Mi batizéwozan Jan lé wefele

¹ Kazambale Be Jézu Krist lé Wenéné pélisiana lé ke ’ko.

² É a é gyɛle balelayezan Ézai lé sɛbɛ gi léé: Bale léma: Bé ye, maa anlé nwunvɔzan pa i ’lɛzia, Yé é dan ilé zi ma’lɛrɛ lɛ i ’lɛ,

³ Mi lé é ke siaana bwi gi, a dére lé ke ’ko: ’Ka zi ma’lɛrɛ Mizan lɛ, ’Ka alé zinu ta bɔ ékema.

⁴ Jan bɔra, yé é munu batizéwo bwi gi, yé é Bale lé we fe wo lɛ yé é lé wo lɛ léé: ’Ka bli nɔla yé maa ka batizéwo a tɔmase nya, yé Kazambale ’é ka ma we vo.

⁵ Yé Judé tɛrɛlamunu faa koo, Jérusalɛm munu faa koo, wo go a va. Wo ’wolé wenyanénu fe, yé é wo batizéwo Juudɛn yuu va.

⁶ Nyɔgɔmé kyɛɛ varɔ a é zénle Jan ta, yé wikɔlɛ kyɛsidi a é dɔle a gyɛn. Flɛlɛ valé bwi gi zɔrɔnyɔnɔ lé ke alé fɛblele nya.

⁷ É Bale lé we fe yé é léé: Mi lé a plɛplɛ mini an ta, yé a yara ’ka an yara lé an bua alé sawala bale fuole we gi lo, é dan da lɛ an zuo.

⁸ Maa ka batizéwo ’yi nya; naa, yee ɛ dan ka batizéwo lɛ Léli Sauun nya.

Jan Jézu batizéwo

⁹ Bléyi ’ko va Jézu si Nazarɛt, Galilé tɛrɛ la, yé Jan a batizéwo Juudɛn yuu va.

¹⁰ Bléyian va lé Jézu bɔra ’yi wuo tɔɔn, é la fee ye gyɛna, yé é Kazambale Léli ye zunna ’é ta bélé plala zo.

¹¹ Yé Bale we fe la gi yé é léé: An Be, i sɔ an lɛ é baba; i va sɔlɛle a an gi blɛn.

Yonufaatagɔné Jézu gi dan

¹² Yé kele tɔɔn, Kazambale Léli go Jézu nya bwi gi.

¹³ É yi kɛlɛ ’bɛna yɔ fié, yé Satan a gi dan. É a bwigiwinu va, ’té lanjenu a mawe kɛla.

Jézu élé nyanama pélisia Galilé tɛrɛ la

¹⁴ Dé wo Jan vɔ bokɔn gi faa, yé Jézu go Galilé, Kazambale lé Wenéné fele nya.

¹⁵ Yé é léma: A bléyi lɛ sɔɔ yé Kazambale lé plale mi nwiin bɔ é pu. ’Ka bli nɔla yé ’ka bli vo Wenéné ’ko lɛ.

Jézu pɔgyɛmunu ziɛn laa

¹⁶ Jézu a giéna aan wo Galilé wɛyi gɔ la, é Simɔn valé é zuané André ye pɔgyɛséli nwɛɛnna wɛyi va. Wa pɔgyɛmunu nya.

¹⁷ Yé Jézu lé wo lɛ léma: ’Ka da an zuo, yé an ka kɛlɛ munu ginizannu nya.

¹⁸ Tɔɔ, wo daan ’wolé pɔgyɛsélinu ma, yé wo go a zuo.

¹⁹ É go aan wo é ’lɛ sɛ, é Zébédé be Jak valé é zuané Jan ye. Wonu é ziin, wa ’yitagoro gi, yé wa pɔgyɛsélinu buruna bééna.

²⁰ Tɔɔn é wo laa, yé wo ’wo ti Zébédé vo ’yitagoro gi, é valé nyanamapamunu nya, yé wo go a zuo.

Mi lé yo tiridɔle ke a gi

²¹ Wo go Kapɛnaum. Flinyi bɔ aan wo, é wɔra bazorokɔn gi, yé é we paa munu gi.

²² Yé wo gi vuru alé wepaale ma. Éé we paan wo gi bélé mian a se ke a lɛ, a zo. É ’ka a paana wo gi bélé sɛbɛgifemunu zé zo lo.

²³ Mi do ana wolé bazorokɔn gi, yo tiridɔle a a gi. É siaa,

²⁴ yé é léma: Nazarɛtzan Jézu, mɛmalé i we kolé we maa? I da ko gyɛ lɛɛ? Mi lé i ke a nya, maa a dɔɔ: Kazambale lé Mi Sauun lé i nya.

²⁵ Jézu we gyɛ a lɔlu la yé é léé: ’I tadɔ; ’i si mi ’ko gi.

²⁶ Yé yo tiridɔle a ma nyɔɔn plɛplɛ yé é si a gi siaale plɛplɛ nya.

²⁷ Yé di kini munu faa gi. Yé wo vo we laana wo ke lee léé: Mɛ we lé ke ’koo? We paale dɛrɛ léé? A se a a lɛ léé, é pla yo tiridɔlenu nwiin é ziin yé wa lɛdɔma.

²⁸ Tɔɔn, yé a tɔ bɔ Galilé sɔnɔ tɛrɛ faa la.

Jézu Piɛri na bu béli

²⁹ Wo si aan wo bazorokɔn gi, yé wo go Jak valé Jan nya ékeva yé wo wɔra Simɔn valé André lé kɔn gi.

³⁰ Simɔn na bu a é yiale é kɔlɛ gi kyɛdɔle nya. A bléyi duo va wo alé we fe Jézu lɛ.

³¹ Yé Jézu bié a va, yé é kun a bɛ ma, yé é a nwa; a kɔlɛ gi kyɛ dɔle si, yé é fɛ nɔ wo lɛ.

Jézu munu kiɛre béli nyanadi

³² É nyanadi, yiri vɔle zuo, munu da gyɛgyɛzannu faa valé yoagizannu nya a va.

³³ Yé flamunu faa zén kɔn ’léé.

³⁴ Yé Jézu gyɛ gɔnɔ faa si munu kiɛre ma. Yé é yo kiɛre si munu gi. Yonu Jézu dɔɔ, yé é ’ka zi nɔ lɛ wo lɛ léé, ’wo we fe lo.

Jézu go we fe lɛ fla zi

³⁵ Manegɔné fiézan wele nya, Jézu nwa yé é bɔra yé é go bwi gi bazoro lɛ.

³⁶ Simɔn valé é bɔlunu kun a ginile ma.

³⁷ Wa ye aan wo, yé wo lé a lɛ léé: Mi faa a i ginina.

³⁸ É a zi pa wo lɛ léé: Kaa go fɛ bɛna, flanu lé ke é pu, ana, anlé wefele ’bɛna we ma é ziin. Awemalé an bɔra.

³⁹ Yé é go we fe lɛ bazorokɔnnu gi Galilé tɛrɛ faa la, yé é yonu si munu gi.

Jézu pantɛn si mi do ma

⁴⁰ Pantɛngyɛzan do da Jézu va; yé é powuo zun tɛrɛ va, yé é we fe a lɛ dunu vɔ ma dére nya léé: Dé é sɔ i lɛ, i bɔalɛ, yé i pantɛn si an ma.

⁴¹ Yé Jézu nyanai zén a ta, yé é bɛ soi, yé é bɛ mane a ma, yé é léma: É sɔ an lɛ; ’é si i ma.

⁴² Tɔɔn, yé alé pantɛn si a ma yé é béli.

⁴³ Jézu a pa zia é nya do, yé é lé a lɛ yara tɔntɔn nya léé:

⁴⁴ ’I yuɛ pa ibozen va. Té i we do kpen fe mi do lɛ lo. ’I go ibo nagɔɔn Balebanzan lɛ, yé fɛ lé Moizi a nɔle béli dɔ, bé banwo, yé é kɛlɛ munu lɛ i bélile tɔmase nya.

⁴⁵ Mi ’ko go aan wo, yé é kun we ’ko zuo fele ma munu faa lɛ, yé é a nwɛɛn fɔɔ yé Jézu ’ka bɔalɛ léé, é go flanu ta munu yuɛ va lo. É vo bwi gi, ’té fla faa la munu éé goo a va.