WENÉNÉ LÉ LUK A GYE (Évangile selon Luc) 9 - Kazambale lé Sebe Sauunu 1979

Jézu mi vu ta fié nwunvɔ

¹ Jézu mi vu ta fié zén aan wo ékeva yé é plɛplɛ nɔ wo lɛ, yé é a se kɛlɛ wo lɛ léé, wo yonu faa kele yé é gyɛgyɛmunu béli plɛplɛ nɔ wo lɛ é ziin.

² É wo nwunvɔ Kazambale plale mi nwiin lé we fele valé gyɛgyɛmunu bélile we gi.

³ É lé wo lɛ léma: Té ka go tawofɛ do kpen nya ka lee lo; yili koo, bala koo, buru koo, gɔɔli koo, té ka go wo do kpen nya ka lee lo, yé té ka go varɔ fié nya lo.

⁴ Dé ka go kɔn‐an ’léé, dé wo ka si bɛn nya, ’ka vo ana fɔɔ yé ka goyi é bɔ.

⁵ Dé munu ’ka ka bɛn si lɛ lo, ’ka si fla ’ko la yé ’ka wo ma we fe wolé fla vungoi puole nya ka gane ma.

⁶ Wo go yé wo gié fla faa do do ta, wenéné fele nya, é valé mi bélile nya fɛfaana.

Mi batizéwozan Jan gale

⁷ We faa lé wo ke bɔna, gyamalati Érɔd a ’ma, yé we lé é dɔ a gi we ’konu ma é ’ka a gi dɔɔa lo, naa, mi kenu léé, Jan nwa gamunu va;

⁸ yé a bɛnu léé, Éli bɔra munu va, yé a koɛnu léé, balelayezan vinin do lé é nwa gale va, yee lé.

⁹ Naa, Érɔd léé: An Jan ’wuo kini ’naan, mi ’ko lé maa a kɛlɛwe ’ko zoɛ ’ma bɛ, de ɛ ke ’bɛ nyaa? Yé é a kwa kulina léé, ’é a ye.

Jézu fɛ nɔ mi baa fié wuru soru lɛ

¹⁰ Nwunvɔzannu da aan wo wo pa gi Jézu va, wo ’wo zuo faa fe a lɛ. É wo si yé é go wo nya é yɛrama, fla do lé wa laama Bɛtsaida, a sɔnɔ.

¹¹ Mi gu ’bɛ ’ma aan wo yé wo go a zuo. Jézu wo si yé é Kazambale plale mi nwiin lé we fe wo lɛ, yé é ziin, munu lé wo mawe ke bélile gi, é wo béli.

¹² Yiri bɔ aan wo baa, mi vu ta fié bié yé wo lé Jézu lɛ léé: Kaa a bwi gi ’ko, amalé ’i munu pa zia, ’wo go flanu valé ’wo zi féinu ta yiakɔn valé fɛblele yele we gi.

¹³ Jézu lé wo lɛ léé: Kabozen, ’ka fɛblele nɔ wo lɛ. Yé wo léé: Buru soru valé pɔ fié saa ɛ ke ko lee, ’naan, ’ko go munu ’konu faa lé fɛblele lɔɔ?

¹⁴ ’Té woo mi baa fié mi wuru soru bɔa. Jézu lé é zuomunu lɛ léé: ’Ka wo nyana é bale nya bale nya, mi yɔ fié wɔlɛ vu vu.

¹⁵ Wa kɛlɛ a zo yé wo munu faa nyana.

¹⁶ Jézu buru soru valé pɔ fié si, yé é yara nwa lagi zia yé é Kazambale bɔ vɔ. Yé é a bɔi yé é a nɔ é zuomunu lɛ, wolé a nɔle mi gu lɛ we gi.

¹⁷ Wo faa fɛ ble yé wo kan, yé wo kyɛɛné vu ta fié fan a kurunu lé wo vo, a nya.

Piɛri Jézu ta bɔra

¹⁸ Yi do nya Jézu go é yɛrama yé é bazoro. A zuomunu a a va, yé é we laa wo lee léé: Mi gu léé, maa a de nyaa?

¹⁹ Wa zi pa a lɛ léé: Wo léé, bii a mi batizéwozan Jan nya; mi kenu léé, bii a Éli nya; yé a koɛnu léé, bii a balelayezan vinin do lé é nwa gale va, a nya.

²⁰ É lé wo lɛ léé: Yé ka lé nɔɔ? Piɛri léé: Bii a Kazambale lé Krist nya.

²¹ Jézu a yi ga wo lee plɛplɛ léé, té wa fe mi do kpen lɛ lo.

Jézu é gale fale vɔ

²² Yé é we taa fe léé: É a lé maa blami Be, an nyané ble é baba; é a lé mi segelenu koo, Balebanmunu segelenu koo, sɛbɛgifemunu koo, wo sɔn vɔ an ma; é a lé wo an gyɛ yé yi fié a yaazan nya yé an nwa gamunu va.

²³ A zuo é lé wo faa lɛ léé: Dé é sɔ mian lɛ léé, ’é da an zuo, ’é bli si ébozen lɛ, yé ébo lé yiliblan sia tu valé é kinile ma yé ’é da an zuo.

²⁴ Naa, mian é sɔ a lɛ léé, é ’élé tɛrɛla kɛlɛ blɛn, é dan vuru lɛ a gi, yé mian é vuru we faa gi anlé we ma, ’bɛzan é dan ézé ye lɛ.

²⁵ Dé mi tɛrɛlafɛ faa ye, dé ébozen sɛrɛ yé ébozen san, ’bɛ tɔnɔ lé é ke mɛ fɛ nyaa?

²⁶ Naa, mian é yara gya maa valé an dérenu lé we ma, yara é dan maa blami Be gyɛ lɛ ’bɛzan lé we ma, yian nya lé an dan da lɛ, maabozen koo, an Ti koo, lanje sauunnu koo, wolé fua gi, a yi nya.

²⁷ Munu lé ke ’ko, wo va mi kenu ’ka dan ga lɛ lo fɔɔ yé wa ye léé, Kazambale a é plale munu nwiin. Maa fe ka lɛ.

Jézu dɔbɛ nɔla gɔ nwiin

²⁸ Alé we ’konu fele zuo, dé yi sɔraa giéle léé? Jézu go Piɛri koo, Jan koo, Jak koo, wo nya ’é va gɔ torole nwiin bazoro lɛ.

²⁹ Jézu a bazorona aan wo a yara dɔbɛ nɔla yé alé sɔ kinin sɔ fu tata nyananyana nya.

³⁰ Yé mi fié vo glewona a va; Moizi valé Éli lé.

³¹ Wo da fuasan gi yé go lé é dan wo lɛ Jérusalɛm bɛ, ’té wana glewo.

³² ’Té yi vɔ Piɛri valé é bɔlunu yuɛ la; naa, wo vuo aan wo tɔɔn yé wo Jézu lé fuasan valé é va mi fié ye.

³³ Bléyian va lé munu ’konu a sina Jézu va, Piɛri lé a lɛ léé: Anzan, kaa vole ’ko a é zima; kaa ban yaa dɔ ma, izé do, Moizi zé do, Éli zé do. We lé é ke a fena é ’ka a gi dɔɔa lo.

³⁴ É a we fena ’bɛ zo aan wo, lafu tua wo nwiin; zuomunu wobo ye aan wo lafu worona, kana zén wo gi.

³⁵ Yé Bale we fe lafu gi yé é léé: Mi ’ko a an Be lé maa a si a va, a nya. ’Ka tɔné dɔ a lɛ.

³⁶ Bléyian va lé wo dére ’ko ’ma, ’té Jézu vo é do. Zuomunu ’wo tadɔ, yé we lé wa ye wo ’ka a do kpen fe lɛ mi do kpen lɛ ’bɛ bléyi va lo.

Jézu yo tiridɔle si né gi

³⁷ ’Bɛ é tu kini, wo si aan wo gɔ nwiin mi gu da Jézu va.

³⁸ ’Té mi do éé siaan mi gu worona léé: Anzan, ilé zanté, ’i yuɛ vɔ an be ta, naa, é a an be wɔlɛ do kpen nya.

³⁹ Yo do a kunwo, ’té éé siaan, ’té yo a sunsun dɔa, ’té a ’léé buiɛ éé dɔa; yé dé é nyɛ dɔ a kɔlɛ gi faa yé a daanle a ma a tɔntɔn.

⁴⁰ Maa zanté vɔ i zuomunu ma léé, ’wo yo si a gi, yé wo ’ka bɔ lɛ a lɛ lo.

⁴¹ Jézu léé: Blipaanlo bɛn, zirizobɛn, ka léé, an lɛɛ nɔɔ ɛ kɛlɛ ka va faa ’lɛ yé ka bli é vo an lɛɛ? Ka léé, maa kɛlɛ kaa? ’I da i be nya ze.

⁴² Dé né bié yo tiridɔle a dia tɛrɛ va yé é a sunsun dɔ. Jézu siaa yo tiridɔle ta, yé é nézan béli yé é a nɔ é ti lɛ.

⁴³ Yé wo faa gi vuru Kazambale lé plɛplɛ blɛn ma. Bléyian va lé mi faa do do a Jézu ze vɔna we faa lé é ke a kɛlɛna bɛ, a ma, Jézu lé é zuomunu lɛ léé:

Jézu é gale fale vɔ é ziin

⁴⁴ ’Kaanu, ’ka tɔné dɔ we ’ko lɛ é zima ma: wo dan maa blami Be pa lɛ munu lee.

⁴⁵ Naa, a zuomunu ’ka we ’ko gi ’ma lɛ lo; a ta a é yɔɔle wo lee, té wa gi ’ma lo we gi; yé wo kana we ’ko gi laale ma a lee.

Mi kyɛn ɛ ke blɛn é mini é bɔluzannu taa?

⁴⁶ Wa za vɔna wo worona léé, dé wo va mi kyɛn ɛ ke mi blɛn nyaa?

⁴⁷ Jézu wo bli giwe dɔɔ aan wo é né kiéné do si yé é a dɔ é sɔnɔ yé é lé wo lɛ léé:

⁴⁸ Dé miomian éé né kiéné ’ko sié anlé we ma, ’té éé maabozen sié é ziin; yé mian éé an sié, mi lé é an pa zia éé ’bɛzan sié. Naa, mian é ke kiiéné ka faa méléna, yee ɛ ke mi blɛn nya.

Mi lé é ’ka ka ma lo, é a ka va

⁴⁹ Yé Jan léé: Anzan, ko mi do ye yonu sina munu gi i tɔ nya yé ko a yi ga a lee. É ’ka ko va lo, ’bɛzama.

⁵⁰ Jézu lé a lɛ léé: Té ka a yi ga a lee lo; naa, mi lé é ’ka kamazan nya lo, é a ka va.

Samari fla do sɔn vɔ Jézu ma

⁵¹ Jézu sile tɛrɛ la bléyi bɔ aan wo é pu, a yara a é pale a ta léé, ’é go Jérusalɛm.

⁵² É nwunvɔzannu nwunvɔ é ’lɛ yé wo zi sia yé wo bɔra Samari fla do la, a yiana ma’lɛrɛle we gi.

⁵³ A yara a é dɔle Jérusalɛm zia, amalé Samari munu ’ka a vole ’wo va nyi si lɛ lo.

⁵⁴ A zuomunu Jan valé Jak, wo ’bɛ ye aan wo, wo léé: Mizan, é sɔ i lɛ léé, ko kyɛ laa léé, ’é si la gi yé ’é wo blee?

⁵⁵ Jézu nɔla wo va yé é we pla wo lɛ a fele nya léé: Bli lé ka ke we kɛlɛna a nya, ka ’ka a dɔɔa lo.

⁵⁶ Naa, maa blami Be, an ’ka da lɛ munu bozennu saanle we gi lo, naa, an da wo sile we gi we ma. Yé wo go fla bɛ la.

Munu lé é sɔ wo lɛ léé, wo go Jézu zuo

⁵⁷ Bléyian va lé wa gona zia mi do lé a lɛ léé: Dé i go fɛofɛana, ’maa goo i zuo.

⁵⁸ Jézu lé a lɛ léé: Kwanénu yɛrɛ a, yé mianénu kɔn a, naa, maa blami Be, an yiana ’ka lo.

⁵⁹ É lé a bɛ lɛ léé: ’I da an zuo. Yé ’bɛ léé: ’I zi nɔ an lɛ yé an go an ti pa é vinin faa lɛ.

⁶⁰ Jézu a zi pa a lɛ léé: ’I mi galenu vo yé wo ’wozé migalenu pa, yé bii, ’i go Kazambale plale mi nwiin lé we fe.

⁶¹ A bɛ léé: Anzan, maa dan go lɛ i zuo, naa, ’i zi nɔ an lɛ é vinin yé an go anlé kɔngimunu yai vɔ.

⁶² Jézu lé ’bɛ é lɛ léé: Dé miomian kun gwané yili ma, ’té éé zuo naginian, wɔrale Kazambale lé fuatɛrɛ la ’ka a nyɛɛ lɛ lo.