WENÉNÉ LÉ LUK A GYE (Évangile selon Luc) 4 - Kazambale lé Sebe Sauunu 1979

Yonufaatagɔné Jézu gi dan

¹ Léli Sauun vɔ Jézu ta yé é si Juudɛn yuu va,

² yé Léli go a nya bwi gi, yé yonufaatagɔné a gi dan yi yɔ fié wuo. É ’ka fɛ do kpen ble lɛ yi ’konu wuo lo, yé yinu giéle zuo lɔrɔ a gyɛ.

³ Yé yonufaatagɔné lé a lɛ léé: Dé bii a Kazambale Be nya, bé fe gɔlɛ ’ko lɛ léé, ’é kinin buru nya.

⁴ Yé Jézu a zi pa a lɛ léé: Wa gyɛ Bale lé sɛbɛ gi léé: Mi ’ka voo é yuɛma fɛblele saa nya lo.

⁵ Yonufaatagɔné go a nya loru yé é tɛrɛ la bɛntɛrɛnu faa gɔɔn a lɛ bléyi do kpen nya

⁶ yé é léé: Plɛplɛ ’ko faa koo, bɛntɛrɛ ’konu lé fua koo, maa dan a nɔ lɛ i lɛ; wo wo nɔ an lɛ, yé mian é sɔ an lɛ léé, maa wo nɔ a lɛ, azan lɛ lé, maa wo no.

⁷ Amalé dé i dia i bli la an ’lɛ, wo faa é dan kɛlɛ lɛ izé nya.

⁸ Jézu a zi pa a lɛ léé: Wa gyɛ Bale lé sɛbɛ gi léé: ’I ’wuo tua Mizan izé Bale lɛ, yé i yee do kpen ɛ bɔ.

⁹ Yonufaatagɔné go a nya é ziin Jérusalɛm yé é a vɔ Balebangikɔn nwiin loru yé é lé a lɛ léé: Dé i a Bale Be nya ’i fɔrɔ, ’i zun, naa,

¹⁰ é a é gyɛle Bale lé sɛbɛ gi léé: É dan ilé we fe lɛ élé lanjenu lɛ léé, ’Wo yuɛ pa i va.

¹¹ Yé é a é gyɛle Bale lé sɛbɛ gi é ziin léé: Wo dan ’wo bɛ dɔ lɛ i wuo Dé i sɔné é da san gɔlɛ ma.

¹² Jézu a zi pa a lɛ léé: Wo léé: Té i Mizan izé Bale gi dan lo.

¹³ Yonufaatagɔné a gi dan bɛ ’konu faa ma, ’bɛ zuo yé é daan a ma sɛ.

Jézu élé nyanama pale pélisia Galilé tɛrɛ la

¹⁴ Kazambale Léli vɔ Jézu ta, yé é go Galilé tɛrɛ la é ziin yé a tɔ blɛn nwɛɛn ana tɛrɛ faa zi.

¹⁵ É we paa munu gi bazorokɔn gi, yé munu faa a tɔ zin bɔ.

Nazarɛt munu sɔn vɔ Jézu ma

¹⁶ Jézu go Nazarɛt, fɛana lé é tin, ana, yé é go bazorokɔn gi flinyi nya a kɛlɛbɛ kyɛn gi. É nwa sɛbɛ tafele we gi,

¹⁷ yé wo balelayezan Ézai lé sɛbɛ nɔ a lɛ. É sɛbɛ fuo yé fɛana lé we ’ko ke é gyɛle, é ana ye; é a ta fe léé:

¹⁸ Mizambale Léli a maa ta Yé é nyɔnɔ zén an nwiin anlé wenéné fele nyanégyɛmunu lɛ we gi; É an pa zia munu lé blikyɛdɔwe blɛn bɔ wo ma, wo va, wo bélile koo, Luugimunu vole woboma valé Yuɛwiimunu yuɛ fuole koo, Munu lé woo yaan wo ta, wo vole woboma valé

¹⁹ Mizambale lé zin kɛlɛ lɛɛ lé we fele gɔrɔ la koo, wo faa we ma.

²⁰ ’Bɛ zuo é sɛbɛ plin yili ma yé é a nɔ bazorokɔn tabinzan lɛ yé é nyana. Munu faa lé wo ke bazorokɔn gi, wo faa yuɛ vo a va vɔɔɔn ’té wa naginian.

²¹ Yé é kun a fele ma wo lɛ léé: Sɛbɛ gi dére lé ka a ’ma lao, a lɛ sɔɔ kyɔ.

²² Wo faa kun a ma we fele ma; wo faa gi vuru dére zinnu lé é ke a fena, a we ma, yé wo léé: Jozɛfu be kaan loo?

²³ Jézu lé wo lɛ léé: Wezen lé, ka dan gɔné vɔ lɛ an lɛ léé, dɔtrɔ gyétrɛn, ’ibo béli ma, yé ka dan a fe lɛ an lɛ léé, we faa lé ko a ’ma léé, bé kɛlɛ Kapɛnaum, bé kɛlɛ ibo lé tɛrɛ la ’ko.

²⁴ Naa, é we taa fe léé: Maa lé ka lɛ webozen nya léé, wo ’ka balelayezan do kpen yé mi nya ébo lé tɛrɛ la lo.

²⁵ Maa lé ka lɛ webozen nya léé, gyɛzaralomu kiɛre ana Izraɛl tɛrɛ la Éli bléyi va, ’té lɛɛ ’ka dan lo lɛɛ yaa moné suiɛdo, yé lɔrɔ blɛn dɔ ana tɛrɛ faa ta,

²⁶ naa, Kazambale ’ka Éli pa lɛ zia wo va le do kpen va lo, é a pa zia gyɛzarale do lé é ke Sarɛpita, Sidɔn tɛrɛ la, yee ɛ va.

²⁷ É ziin, pantɛngyɛzannu ana kiɛre Izraɛl tɛrɛ la balelayezan Élizé bléyi va; naa, wo va mi do kpen ’ka béli lɛ lo, ’té dé é ’ka Siri mi Naaman nya lo.

²⁸ Wo we ’konu ’ma aan wo, bazorokɔn gi munu faa bli fli.

²⁹ Wo nwa yé wo go Jézu nyunule nya léé, ’é si fla yé wo goan gɔ lé wolé fla ke é pale a ma, a nwiin, a vulile tɛrɛ va we gi.

³⁰ Naa, Jézu gié wo méléna yé é go.

Mi lé yo tiridɔle ke a gi

³¹ É go Kapɛnaum, Galilé tɛrɛ la fla do la yé é we paa munu gi flinyi nya.

³² Alé wefele se a a lɛ, amalé wo gi vuru alé we paale ma.

³³ Mi do lé yo tiridɔle ke a gi, é a bazorokɔn gi, yé é siaa dére plɛplɛ nya léé:

³⁴ Aa! Nazarɛtzan Jézu, mɛmalé i we kolé we maa? I da ko gyɛ lɛɛ? Mi lé i ke a nya, maa a dɔɔ. Kazambale lé Mi Sauun lé i nya.

³⁵ Jézu we gyɛ a lɔlu la yé é léé: ’I tadɔ. ’I si mi ’ko gi. Yé yo a dia zén‐ékevamunu méléna yé é si a gi yé é ’ka we do kɛlɛ lɛ a lɛ lo.

³⁶ Wo faa ’léé ma wo ma yé wo lé ’wo ke lɛ léé: Mɛ dére lé ke ’koo? A se valé plɛplɛ a a lee, yé é pla yo tiridɔlenu nwiin, ’té éé wo sié munu gi.

³⁷ Yé a tɔ bɔ Kapɛnaum zi tɛrɛ faa la.

Jézu Piɛri na bu béli

³⁸ Jézu si aan wo bazorokɔn gi yé é wɔra Simɔn lé kɔn gi. ’Té Simɔn na bu kɔlɛ gi kyɛ a é baba yé wo zanté vɔ Jézu lɛ alé we ma.

³⁹ É bua a nwiin yé é siaa a kɔlɛ gi kyɛ dɔle ta yé a kɔlɛ gi kyɛ dɔle si a ma. A bléyi duo nya é nwa yé é fɛ nɔ wo lɛ.

Jézu mi kiɛre béli nyanadi bléyi va

⁴⁰ Yiri vɔle zuo, munu faa lé gyɛ ke wolé munu ma, wo da wo nya a va. É bɛ pla wo faa ta do do yé é wo béli.

⁴¹ Yonu é ziin wo si mi kiɛre gi siaale valé wefele nya léé: Bii a Kazambale Be nya. Naa, wa gi dɔɔ léé, é a Krist nya, amalé é we gyɛ wo lɔlu la yé é ’ka a nyi si lɛ léé, wo we fe lo.

Jézu go we fe lɛ fla zi

⁴² Dé tu kini tɔɔn Jézu bɔra yé é go bwi gi. Mi gu go a nagini lɛ yé wo bɔ fɛana lé é ke, ana; wa a va léé, ’é vo ’wo va, té é si wo va monomono lo.

⁴³ Naa, é lé wo lɛ léé: É a lé maa Kazambale plale mi nwiin lé wenéné fe fla bɛnu la; bɛwemalé wo an pa zia.

⁴⁴ Yé é Kazambale lé we fe Galilé tɛrɛ la bazorokɔnnu gi.