WENÉNÉ LÉ LUK A GYE (Évangile selon Luc) 24 - Kazambale lé Sebe Sauunu 1979

Jézu nwale

¹ Dimansi nya, lomu go gɔlɛkorona fɛna kini bléyi va, lia ginzannu lé wa ma’lɛrɛ, wo nya wo lee.

² Wa ye léé, gɔlɛ a é sile gɔlɛkoro ’léé;

³ wo wɔra gɔlɛkoro gi yé wo ’ka Mizan Jézu gale ye lɛ lo.

⁴ Wo dɔ dan‐uun é pla, tɔɔn mi fié bɔra wo va sɔ nyananyana nya ’wo ta.

⁵ Lomu gi nyɛ kini yé wo yara tua tɛrɛ va; naa, ’bɛnu lé wo lɛ léé: Mi lé é ke é yuɛma, mɛmalé ka a naginian gamunu vaa?

⁶ É ’ka ’ko lo; é nwa é yuɛma. Bléyian va lé é ke turu Galilé tɛrɛ la, fɛan zo lé é we fe ka lɛ, a sele ’é dɔ ka gi ma.

⁷ É léé: É a lé wo maa blami Be nɔ wenyanékɛlɛzannu lɛ, yé wo an gyɛ yili la, yé an nwa gamunu va yi fié a yaazan nya. Yee kaan loo?

⁸ Yé Jézu dére sele dɔ woo lomu gi.

⁹ Wo si aan wo gɔlɛkoro ’léé, wo we ’konu faa zuo fe mi vu ta do valé mi pɔnénu faa lɛ.

¹⁰ Lomu lé wo we ’konu fe nwunvɔmunu lɛ, wa Magadala le Mari koo, Jane koo, Jak bu Mari koo, le bɛnu lé wo ke wo va koo, wo nya.

¹¹ É dɔ wo gi léé, nyɛflawe lé, yé wo ’ka dɔ lɛ lomu ’konu dére ta lo.

¹² Naa, Piɛri nwa yé é go vlan nya gɔlɛkorona. É tua aan wo, mipasɔ lé ke tɛrɛ va, yee saa lé é a ye; a zuo é go élé kɔn ’léé é gi vurule nya, wenu lé wo bɔ, a ma.

We lé é bɔ Émaus zi ta

¹³ Yi ’ko duo nya Jézu zuomunu fié a gona fla do lé wa laama Émaus, a ta; é a é sile Jérusalɛm ma kilo vu ta do.

¹⁴ We faa lé é bɔ, ’té woo goo ana glewole nya.

¹⁵ Bléyian va lé wo ke wefena, ’té woo za vɔa, Jézu bozen a dɔ wo ma yé wo vo tawona ékeva.

¹⁶ Naa, Jézu ta tiéra wo yuɛ gi yé wo ’ka gi dɔɔ lɛ léé, Jézu lé, lo.

¹⁷ Jézu lé wo lɛ léé: Mɛ gle lé ka go a wole nya ziaa? Wo dɔ ’té wo yara kyɛ a é vɔle a gi.

¹⁸ Wo va mi do lé wa laama Kléopas, ’bɛ a zi pa a lɛ léé: We lé é bɔ Jérusalɛm yi ’konu nya, bii do kpen a ’bɛna bɛn nya yé i ’ka a gi dɔɔa loo?

¹⁹ Yé é lé wo lɛ léé: Mɛ we léé? Yé wo lé a lɛ léé: We lé é kɛlɛ Nazarɛtzan Jézu lɛ, yee lé. É a balelayezan lé é ke plɛplɛ we kɛlɛle valé dére fele gi Kazambale valé munu faa yuɛ va, a nya.

²⁰ Kolé Balebanmunu valé ko nwiinmunu a nɔ léé, ’wo ga dɔ a nwiin, yé wa gyɛ yiliblan ta.

²¹ Ko bli a a lɛ léé, é dan Izraɛl si lɛ wo nyanézannu lee; ’bɛ ta loru we ’konu bɔ aan wo a yi yaa lo.

²² Yé webozen nya, ko va lomu ko ’léé ma ko ma é baba; wo go gɔlɛkorona bladi

²³ yé wo ’ka a gale ye lɛ lo, yé wo da yé wo léé, lanjenu bɔra ’wo va yé wo lé ’wo lɛ léé, é a é yuɛma.

²⁴ Ko va mi kenu go gɔlɛkorona yé we lé lomu a fe wa ye a zo, naa, wo ’ka Jézu bozen ye lɛ lo.

²⁵ Yé Jézu lé wo lɛ léé: Éé munu, ka bɔn‐in ’ka ka ma lo yé we faa lé balelayezannu a fe, a gini ’ka dɔa ka gi é pu lo.

²⁶ É ’ka lé Krist é nyané ’konu ble yé é wɔra élé fua gi loo?

²⁷ Yé é a pélisia Moizi valé balelayemunu lé sɛbɛnu faa gi yé ébo tawe gɔɔn wo lɛ sɛbɛnu faa gi.

²⁸ Fla lé wo ke gona a ta, wo bɔ aan wo a sɔnɔ yé é léé, ’é go a zi zia.

²⁹ Naa, wa tunu a fele nya léé: Yiri bɔ baa, yé nyanadi pa. ’I vo ko va. Yé é wɔra, vole wo va we gi.

³⁰ Bléyian va lé wa fɛblele zi Jézu buru si; yé dé é Bale bɔ vɔ é a bɔi yé é a nɔ wo lɛ.

³¹ Yé wo yuɛ va kini yé wa dɔɔ; tɔɔn, a ta saan wo lee.

³² Wo lé ’wo ke lɛ léé: Bléyian va lé é ke wefena ko lɛ zia, ’té éé sɛbɛnu giwenu fé, gi nanale ’ka da lɛ ko bli gi loo?

³³ Wo nwa lɛrɛ duo nya yé wo go ’wo pa gi Jérusalɛm yé wo bɔ mi vu ta do ma, ’té woo valé ’wo bɔlunu a é zénle ékeva, ’té wa fé léé:

³⁴ Mizan nwa webozen nya, yé é bɔra Simɔn va.

³⁵ Yé we lé ’bɛ kɛlɛ wo ’é lɛ zia, é valé fɛan zo lé wo Jézu dɔɔ élé buru bɔi bléyi va, wa zuo fe wo lɛ.

Jézu bɔra é zuomunu va

³⁶ Bléyian va lé wo ke we ’ko fena, Jézu bozen da wo méléna yé é lé wo lɛ léé: ’Ka vo drɔɔ ma.

³⁷ Wo kana, yé wo gi nyɛ kini yé é dɔ wo gi léé, wo mi léli ɛ ye.

³⁸ Naa, Jézu lé wo lɛ léé: Mɛmalé ka gi vuruu? Mɛmalé gi bɔrɔle ’ko zo ke ka bli gii?

³⁹ Maa lé, webozen nya; ’ka an bɛnu valé an ganenu nagini. ’Ka bɛ mane an ma yé ka ye; mi léli wi ’ka lo, yé a wɔlɛ ’ka lo, fɛan zo lé ka an yé ’ko, a zo lo.

⁴⁰ É a we ’ko fena aan wo, ’té é ’é ganenu valé é bɛnu nagɔɔn‐an wo lɛ.

⁴¹ Wo gi nanale zi wo ’ka wo bli vo lɛ a lɛ tan lo, ’té wo gi a é vurule wo ma duowo, é lé wo lɛ léé: Fɛblele a ka lee ’koo?

⁴² Yé wo pɔ panele valé zɔrɔnyɔnɔ nɔ a lɛ.

⁴³ É a si, yé é a ble wo yuɛ va.

⁴⁴ A zuo yé é lé wo lɛ léé: Bléyian va lé maa ke yi la ka va, maa a fe ka lɛ léé, we lé wa gyɛ an ma we nya Moizi lé bélidɔwe koo, balelayemunu lé sɛbɛnu koo, lɛrɛvɔ sɛbɛ koo, wo gi, é a lé wo faa lɛ é sɔɔ. Yeean é kɛlɛ ’ko loo?

⁴⁵ Yé é wo bɔn gi kini Bale lé sɛbɛnu gi ’male we ma.

⁴⁶ Yé é lé wo lɛ léé: A zo lé wa gyɛ léé: Krist é dan nyané ble lɛ yé é dan nwa lɛ gamunu va yi fié a yaazan nya,

⁴⁷ yé wo dan bli nɔlale valé mi ma we vole lé we fe lɛ a tɔ nya bɛnnu faa lɛ, é sia Jérusalɛm.

⁴⁸ Ka a we ’konu nayezannu nya.

⁴⁹ Yé fɛ lé an Ti a fe léé, é dan a nɔ lɛ ka lɛ, maa ɛ dan a zén lɛ ka ta; naa, ’ka vo fla ’ko la fɔɔ yé Bale é ka suu élé lagi plɛplɛ nya.

Jézu gole la gi

⁵⁰ É go wo nya fɔɔ Bétani sɔnɔ, yé é bɛ pla wo ta, yé é wo drɔɔ vo.

⁵¹ Bléyian va lé é a wo drɔɔ vona é si wo va yé Bale goan la gi.

⁵² Dé wa bɔ faa, wo go Jérusalɛm gi nanale blɛn nya;

⁵³ ’té wa yifaama Balebangikɔn gi, ’té woo Kazambale tɔ zin fé, ’té wa drɔɔ voo.